周 吳

初期

吳國初期嘅歷史具體係點係唔知嘅。不過，司馬遷嘅《史記·吳太伯世家》有紀錄。周朝嘅古公亶父（即係周太王，係周王室始祖）有三粒仔。大仔吳太伯（吳國祖先，創立時國號叫句吳），二仔虞仲，因為繼位嘅係佢哋嘅細佬季歷（即係周公季，係周文王嘅老豆），佢哋唔想爭王位，於是出走到吳地來讓位，史稱太伯奔吳，據文獻話，佢先出走到衡山（係指古南嶽安徽天柱山，唔係而家湖南衡山），再去到太湖一帶。因為當地人撐佢哋，於是佢哋就做咗當地諸侯。後來季歷想嗌返兩位兄弟返中原，吳太伯同虞仲不單之唔制，重斷髮紋身。嗰時紋身係異族風習，佢哋紋曬全身意思就係再都唔返中原。太伯同虞仲自己喺吳地立國，國號「句吳」，之後太伯過咗，無仔，就由虞仲繼位。

興盛

第19任君主壽夢即位後就改國號，將「句吳」嘅「句」字去咗，叫「吳」，並且自己稱王，叫吳王。到第24任君主（自稱王起係第6任吳王）闔閭時係吳國最強勢嘅時候。佢起用兩位名臣孫武、伍子胥，令吳國強到差啲打到當時嘅超級大國楚國滅亡。之後佢進攻新興嘅越國，闔閭喺戰場上負重傷而死，臨死前要個仔夫差發誓爲父報仇，最後闔閭葬喺虎丘。

夫差喺伍子胥嘅輔佐下恢復吳國元氣，最後打到越國爭啲滅國。越王勾踐作為手下敗將，令越國淪為屬國，要向吳國謝罪、進貢，其中包括當時最靚嘅靚女西施。

滅國

伍子胥好積極噉主張滅除後患，不過夫差呢個時候警戒心鬆弛咗，無視忠言，重搞到伍子胥自殺。

最後，吳國畀越國謀臣范蠡裝咗入愣（音：leng¹），前473年越滅吳，夫差自殺。

吳越之爭留低咗好多故仔。

• 吳越同舟
• 臥薪嘗膽
• 沉魚（西施）