Robert Boxus: Scrijheu e walon

I baga a Viyé-l'-Boulet e 1905, a Nameur e 1908, pu a Brussele e 1939. I mora e 1961.

Come waloneu, il est cnoxhou, aprume, come diccionairî. Mins i scrijha eto des arimés, des romans, des pîces di teyåte et des pîces pol radio.

Robert Boxus esteut mimbe del SLLW.

Il esteut po-z esse riprins dins l' pordjet (nén adiercî) d' antolodjeye des scrijheus e walon do Payis d' Hu.

I voet dins les livreyes di Hu les gazetes e walon "Li Clabot" eyet "Li ptit Lidjwès" et lzî evoyî ses prumîs scrijhaedjes (avou l' accint d' Lidje) e 1904 (il aveut 13 ans).

Pu i scrît avou l' accint d' Nameur (1908-1914). C' est po ça k' i serè rprins dins l' Antolodjeye des powetes walons namurwès.

El guere di 14, i s' ritrouve prijhnî avou des Rûsses, et studyî les lingaedjes slaves. I ratoûne des scrijheus do rûsse e francès, et do francès e rûsse.

Après, i boute pol walon a Nameur et a Hu. C' est lu k' ahive li Cavo hutwès. Et scrire "Histoire de la littérature wallonne au pays de Huy".

Après l' guere di 40, i dvént prezidint di l' "Association des écrivains wallons en Brabant". C' est lu ki va askepyî e 1954 li gazete des scrijheus e walon ey e francès "Reflets de chez nous".

Il a fwait deus gros motlîs so les plantes et so les biesses.

Li rcweraedje so les biesses, c' est : Vocabulaire wallon namurois des noms d'animaux (rahouca C23), eplaidî e 1938.

Si mwaisse ricweraedje so les yebes ås maladeyes si lome "La flore médicale wallonne" (rahouca C89). Il a stî eplaidî a Hu e 1939.

Il a stî recråxhî, å no do Cåvea hutwès: c' est l' Dictionnaire wallon hutois des noms de plantes indigènes et cultivées (sins date) (rahouca E26).

Il a eplaidî dins l' Bourdon (do l° 1 å l° 63), pa bokets on Vocabulaire wallon namurois (rahouca C73).

Il a scrît sacwants ptits romans :

• «Bietris» (Bêtris) la k' i note l’ accint d’ Hu) eplaidî e fouyton dins « Journal de Huy » e 1913.
• «Les flamåjhes» (sicrît e 1914 tot notant l’ accint d’ Nameur, eplaidî e fouyton dins Vers l’Avenir e 1955).
• «Li Li bôze da Dôre Barbayan» (sicrît e 1926 tot notant sifwaitmint l’ accint d’ Nameur, nén eplaidî) .
• «Goliate» (tot notant l’ accint d’ Hu), Ed. Mosa, Hu, 1949.

• Emile Dantinne, Etude sur Robert Boxus, Editions Europax, Brussele, 1955
• Adèle Durieux, "Robert Boxus, écrivain wallon", Institut Jules Destrée, 1967.

• Live Boxus so les plantes (motlî)
• Goliate (roman d' cåzantès biesses)