Li leucôze inzotike des bovrins, c' est ene maladeye des bovrins avou des crexhioûles a totes les glandes al linfe et dins les ôtes texhous avou des blankès globules.
C' est on magnant må
Li maladeye est cåzêye pa on virûsse, li virûsse del leucôze inzotike des bovrins.
Li leucôze e inzotike ås vatches a stî discrîte pol prumî côp dins les anêyes 1860.
Elle esteut aprume sipårdowe dins les contrêyes di l' Ess di l' Almagne d' adon (li Prûsse levantrece, li Pomeraneye, li Meclenbork, [li [Brandenbork]] et l' Sake (c' est po çoula k' on l' loméve, e-n almand, “ostelbische Krankheit”, maladeye å Levant di l' Ele).
Al fén del deujhinme guere daegnerece, les cinsîs d' avår la, ki n' vlént nén dmorer dizo l' mambornance des Rûsses (askepiaedje di l' Almagne di l' Es) afoujhît viè l' Almagne di l' Ouwess avou leus biesses, ey amoenner li rascråwe e Chlechvik-Osteyn ey el Basse Sake.
Dispu l' tins, li maladeye s' aveut eto ståré, avou l' martchandaedje des bounès vatches di ces payis la (come li raece “Ostene”), dins les ôtes payis del Mer baltike, Daenmåtche, Suwede eyet Finlande.
C' est dandjreus pal minme voye (l' apoirtaedje di vatches a laecea po-z amidrer les cenes do payis) ki l' leucôze si stitcha ezès Stats Unis, pu, did la, totavå les Amerikes (Canada, Amerike nonnrece, et kécfeye ossu rivni e l' Urope).
Lacobén k' on n' l' a måy conoxhou el Walonreye, wice k' i gn a nén tant d' vatches laeçreces ki ça.
Li må passe d' ene rascråwêye vatche a ses veas pal voye do laecea. Mins li tins d' covaedje del maladeye est foirt long (di 9 moes a 9 ans). Ça fwait ki, å pus sovint, c' est des vatches di 5 a 8 ans ki vont esse malådes clinicmint.
Ça fwait ossu ki l' maladeye ni s' resconterrè waire dins les cinses avou des tetåds (raeces al tchå), paski les biesses î vikèt bråmint moens viyes (et k' i gn a pont d' raece di cisse sôre la ki s' a spårdou a pårti des payis foirt rascråwés).
Gn a, avou, des ôtes voyes di stitchaedje do virûsse d' ene biesse a l' ôte, metans les pikeures avou l' minme aweye, et kécfeye les hagnants insekes.
So 300 cas studyîs al sicole veterinaire di Hanôve, n aveut 2 åcint di biesses di 2 ans, 8 % di 3 ans, 11 % di 4 ans, 24 % di 5 ans, 21 % di 6 ans, 11 % di 7 ans, 12 % di 8 ans, 7 % di 9 ans, 4 % di 10 ans et pus vî.
Mins i n' est nén impossibe ki des djonnes biesses di 12 a 24 moes soeyénxhe dedja acsûtes.
Gn a k' on torea d' acsût po 150 vatches dins les statistikes, tot biesmint paski les måyes sont touwés po leu tchå estant co djonne. Les gayets ni sont pus waire wårdés po siervi les vatches laeçreces dispu l' diswalpaedje di l' esminçaedje artificiel.
Totes les biesses avou des senes ricnoxhåves clinicmint vont crever, après on tins ki dipind del fôme clinike. Ça pout aler foirt rade, moirt subite u må ki deure on djoû u deus (maladeye awiyante k' atake ki cour u ki råye li misse). Po l' acsujhaedje des glandes did dizo l' pea, li maladeye pout durer sacwants moes dispu k' on-z a veyou li prumire crexhioûle.
Dins les ståves rascråwés pår, li leucôze inzotike pout touwer 0,5 a 2 åcint des biesses tos ls ans.
Come gn a des blankès globules pattavå l' coir, li maladeye si mosterrè dizo ene grande varyîsté di senes clinikes.
Li pus åjheymint ricnoxhåve, come di djusse, c' est les crexhioûles di dzo l' pea : babetchreces, sipalreces, coxhreces, dirîtetreces.
Ces biesses la ni baxhèt nén dins l' laecea, et magnî avou ostant d' apetit.
Bråmint des biesses d' on ståve avou del leucôze inzotike vont aveur bråmint dtrop d' linfocites dins leu contaedje des celules do sonk. Divant les anêyes 1980, on-z eployive les contaedjes des celules do sonk po vey les vatches ki diswalpént l' maladeye, divant k' ele ni fjhénxhe des sintomes, et ls evoyî a l' abatwer po s' mete cwite del maladeye.
This article uses material from the Wikipedia Walon article Leucôze inzotike des bovrins, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Li contnou est dzo l' licince CC BY-SA 4.0 a moens k' ça soeye dit ôtrumint. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Walon (DUHOCTRUNGQUOC.VN) is an independent company and has no affiliation with Wiki Foundation.