Deujhinme Lete Sint På Ås Djins D' Corinte

Come si no el dit bén, c' est ene lete d' apoisse sicrîte pa sint På avou Timoté et evoyeye ås noveas crustins d' Corinte, et di tot l' payis alintoû (l' Acayeye, asteure, li Grece). I lzî aveut ddja scrît ene prumire lete divant.

On est a pô près seur ki c' est bén sint På k' a scrît l' messaedje. Mins motoit ki ci n' est nén ene seule lete, mins deus u minme puzieurs. On acsegne aprume les tchaptrês 11 a 13, la ki l' ton est bråmint pus straegne et rprotchiveus ki dins les 10 prumîs tchaptrês.

• 1:1–11 Salutåcions d' intrêye
• 1:12 – 7:16 – På disfind çou k' il a fwait et acsegnî, mostrant k' i voet voltî les cis d' Corintwès.
• 8:1 – 9:15 – Dimande di portchesse po les pôves di l' eglijhe di Djeruzalem.
• 10:1 – 13:10 – Disfinse pu hagnante di si acsegnmint.
• 13:11–13 – Salutåcions d' cloyaedje.

Les rapoirts di sint På avou les Corintwès si plèt espliker insi:

• Prumî voyaedje; i va dmorer la 18 moes (Ouve des Apoisses 18:11). Adon-pwis, i va cwiter Corinte et passer cåzu troes ans a Efeze (Ouve des Apoisses 19:8, 19:10, 20:31). Çoula trevna a pô près di l' an 53 a l' an 57.
• Tins di s' prumire anêye a efeze, På lezî scrît ene lete po les prevni (di n' nén candjî d' idêye) (Prumire lete ås Corintwès 5:9).
• Tins di s' deujhinme anêye, i scrît li prumire lete sint På ås Corintîs.
• I rva a Corinte on deujhinme côp, dandjreus å mitan di s' troejhinme anêye a Efeze (come i dijheut k' i freut dins l' prumire lete, 16:6). Dins l' deujhinme lete, i lome ci vizite la «li poenneuse vizite».

Ça fwait ki, di dj' mi dins mi-minme, dji n' erirè nén dé zels estant peneus (deujhinme lete, 2:1)

• På scrît li «lete des låmes» (nén ene lete d' apoisse).

Dji vos a scrît di ç’ façon la afén çki, arivant dlé vozôtes, dji n’ soeye nén rindou peneus pås cis ki m’ divrént ragaiyi, paski dji croe moirdicusse ki m’ prôpe contintmint serè l’ contintmint da vozôtes tertos (2:3.).

• I scrît adon li deujhinme lete dijhant k' i les vout aler rtrover on troejhinme côp (12:14, 13:1). Li lete nis dit nén li plaece k' elle a stî scrîte, mins on pinse ki c' est cwand il va cwiter Efeze po ndaler el Macedwene (Ouve des Apoisses, 20), k' adon, ci sereut di Flipe u d' Tessalonike.
• Après awè evoyî l' lete, På rala dandjreus pol troejhinme côp a Corinte, ca les Ouves des Apoisses (20:2–3) rilevnut k' i passa troes moes el Grece. Il î scrijha si lete ås Romins, la k' il preye li bondjoû å Romins del pårt des mwaisses mimbes di l' eglijhe d' Efeze.

  so Wikisourd: Deujhinme lete sint På ås djins d’ Corinte

 

I gn a so les cmons Wiki des imådjes ou fitchîs son a vey avou l' deujhinme lete ås djins d' Corinte .