Zoetekoeke

West-Vlamsche streekvariantn
Nederlands woord
Ontbijtkoek, Peperkoek
Streekvariant
Uutsproake	Toale
pennepisse krudekoeke paindepiesj krunekoeke	Kortryks Poperiengs Werviks Ypers

Omdat 't gemakt es ip boasis van sirope van brune suker en ruggeblomme is 't dounker va kleur. Der is dikkersn ôok sterk smoakende zêem in verwerkt.

De boasiskruudn die de noame en ôok 't grôotste dêel van de smoake geevn, zyn: kanêle, gembre, kruudnoagel (kreudnoagle en knuffienoagle in ZO WVL) en notemuskoat. Eventueel kant'er nog en klêen bitje corianderzoad, kardemoen, foelie, anys, calissieout en al de sortn zochte dounkere pepers (Jamaica) by.

't Wordt mêestal in schyvjes vôorgesneedn en der kunn sukerkorrelkes ip gestrôoid liggn.

Mêestal vind je zoetekoeke in bakskesvorme moar in fêestelikke sezoenen lik Kestdag, Nieuwjoare, Valenting en 't Poasn vind je z'ôok in de vorme van en herte; ideoal vô en amoureuze attentie an je "zoetekoeke".

Qua smoake (en ingrediënten) trekt pennepisse straf noa speculoasiekoekn.

Vele vlêesgerechtn uut het Middn-Ôostn en Turkeye kommn beter uut me 'n poar schelln krudekoeke d'rin. Probeer moa ne kêe in 't Vlams gerecht kenyn met bruun bier, da ol redelik zoete es, 'n poar schellen pennepisse by te doen: ge goat peizen da je in Libanon zit.

De AN-uutdrukkienge een hart van peperkoek es nie gebruukt in West-Vloandern; ier zeggn me: j'ei 'n erte van koekebrôod of j'es koekegoed. Let ip da je nie verwart met J'is koekeround, want da's nie zo vleiend. Koekeround wil zeggen dat de persoon in kwestie in 't heêl nie snugger is.

Bekende Vlamsche merken van zoetekoeke zyn Lotus, Meli en Vondelmolen. Intusschen faillit, moa vroeger e grôte noame wos De Werkende Bie.