VLC media player (comunemente noto come VLC) el ze un łetor multimediale a gratis open source multipiataforma, capase de reproduzer file audio e video in diversi formadi e so vari dispozidivi, zviłupà dal projeto VideoLAN.
VLC el ga cominsià come projeto cadèmego inte'l 1996 co'l nome de VideoLAN Client, drìoman modifegà in VLC media player, el ze stà zviłupà come un client e un server par el streaming so ła rede del campus. El ze stà inisialemnte zviłupà da studenti de l'École Centrale Paris ma drìoman el ze stà portà vanti da programadori de tuto el mondo, el ze coordenà da l'organizasion sensa fin de łucro VideoLAN.
El 1º de febraro 2001, dopo sincue ani de zviłupo, el còdeze de VLC el ze stà riscrivesto da zero e distribuìo soto łisensa GPL. Dal 2009 el projeto VLC se ga separà da ła École Centrale Paris e zviłupà in modo indipendente da'l projeto VideoLAN.
El logo del cono stradałe doparà in VLC, dezenjà a man inte ła varsion ad alta risołusion inte'l 2006 da Richard Øiestad, sarìa un refarimento a na cołesion de coni stradałi tenjesta da l'asociasion dei studenti de networking de l'École Centrale.
VLC el ze un łetor multimediałe disponibiłe par i pì difuzi sistemi operativi tra cui: Microsoft Windows, Android, Linux, Apple iOS e macOS.
El suporta in modo nativo ła mazor parte dei codec audio e video, sti codec i ze prezenti inte'l file de instałasion del programa. El łetor dòpara ła łibrarìa codec libavcodec del projeto FFmpeg par zestir tanti dei formadi suportai, e utiłiza ła łibrarìa de decritasion DVD libdvdcss par zestir i playback dei DVD sifrai. El pol riprodur serti tipi de file anca se danezai e/o inconpleti, o riprodurne el contenjùo intanto che i vien descargai da na rede peer-to-peer (P2P).
VLC el pol èsar utiłizà come server e client par el streaming e ła ricesion dei flusi de rede, e'l ze capase de trazmeter tuto ciò che pol łèzer. El ga un server integrà in grado de uzar vari protocołi par el streaming in unicast o in multicast so IPv4 e IPv6, so un network a banda łarga e ła transcodifaga de file multimediałi.
So Windows, Linux e altre piataforme VLC fornise un plugin par Firefox, el cuało parmete ai utenti de vizuałizar serti file de Quicktime e Windows Media diretamente inte ła pàjina web sensa utiłizar prodoti spesìfeghi de Apple o Microsoft. Da ła varsion 0.8.2, VLC fornise anca un plugin ActiveX, che permete ła vizuałizaison de sti file anca in Internet Explorer.
Da ła varsion 3.0.0 A se pol vizuałizar video a 360° e in varsion beta ze disponibiłe el suporto a Google Chromecast.
Da ła varsion sperimentałe 4.0.0 ze stà riscrivesta l'intarfasa gràfega e introduzesta in beta ła łibrarìa par el formado AV1.
VLC pol łèzar tanti formadi e contenjidori audio e video conforme el sistema operativo so'l cuało el vien efetuà. Tra i formadi audio A ze suportà ła łetura de CD Audio, file WAV, FLAC, MP3 e altri; tra i vari formadi e contenjidori video A ze suportà H.263, H.264, HEVC(H.265), Matroska (MKV), AVI, DVD e molti altri. Dal 2020 VideoLAN łaora ativamente par el zviłupo de codec opensource par i formadi AOMedia Video 1(AV1) tramite ła łibrarìa dav1d. Vista l'enorme cuantità de formadi veci e novi e ła só rełativa obsołesensa, par na łista ezauriente e ajornà vardar el sito ofisiałe del programa.
This article uses material from the Wikipedia Vèneto article VLC media player, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El contegnùo el xe disponibile soto CC BY-SA 4.0, almanco che no ghe sia scrito difarente. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Vèneto (DUHOCTRUNGQUOC.VN) is an independent company and has no affiliation with Wiki Foundation.