شیوکمار سوامی: بھارتی سَنْت
شیوکمار سوامی (پیدائشی نام شیوانا؛ 1 اپریل 1907–21 جنوری 2019) بھارت کے ایک روحانی قائد، فلاح کار اور ماہرِ تعلیم تھے۔ نیز وہ لنگایت دھرم کی مذہبی شخصیت اور صوبہ کرناٹک میں سِدّھا گنگا مٹھ کے سربراہ تھے۔ انھوں نے شری سِدّھا گنگا ایجوکیشن سوسائٹی بھی قائم کی۔ انھیں لنگایت دھرم کے کٹّر ماننے والے کے طور پر تسلیم کیا جاتا تھا۔ انھیں ریاست کرناٹک میں ندیڑادووا دیوارو (چلتا پھرتا دیوتا/ساکشات دیوتا) کے طور پر بھی جانا جاتا تھا۔
| شیوکمار سوامی | |
|---|---|
 سنہ 2007ء میں شیو کمار سوامی | |
| معلومات شخصیت | |
| پیدائشی نام | (کنڑا میں: ಶಿವಣ್ಣ) |
| پیدائش | 1 اپریل 1907 ویراپورا، مگدائی، سلطنت خداداد میسور (موجودہ کرناٹک، بھارت) |
| وفات | 21 جنوری 2019 (بعمر 111 سال، 295 دن) تمکر، کرناٹک، بھارت |
| شہریت |  بھارت  برطانوی ہند |
| دیگر نام | سدھا گنگا سوامیجیگلو، ندیڑادووا دیوارو، کائیکا یوگی، تریویدا داؤشی |
| عملی زندگی | |
| پیشہ | فلاح کار، سربراہ سدھا گنگا مٹھ |
| تنظیم | سِدّھا گنگا ایجوکیشن سوسائٹی |
| اعزازات | |
| پدم بھوشن (2015ء) کرناٹک رتن (2007ء) | |
درستی - ترمیم  | |
وہ ان لوگوں میں شامل تھے جن کی ہندوستان میں زندہ رہنے والے طویل العمر افراد میں تصدیق ہو چکی تھی۔ انھیں ہندوستان کے تیسرے بڑے شہری اعزاز، پدم بھوشن سے حکومت ہند نے 2015ء میں نوازا۔
ابتدائی زندگی
شیو کمار 1 اپریل 1907 کو سلطنت خدادا میسور (موجودہ دور میں بھارتی ریاست کرناٹک کی رام نگر ڈسٹرکٹ) میں مگدائی کے قریب ایک گاؤں ویراپورا میں پیدا ہوئے۔ ان کا پیدائشی نام شیوانا رکھا گیا۔ وہ گنگا ماں اور ہونے گوڑا کے تیرہ بچّوں میں سب سے چھوٹے تھے۔ جب وہ آٹھ سال کے تھے تو ان کی والدہ کا انتقال ہو گیا۔ ایک بچّے کے طور پر وہ گاؤں میں مذہبی مراکز کے دوروں کے مواقع پر اپنے والدین کے ساتھ ہوتے تھے اور خاص طور پر شیوا گنگا متعدّد بار جاتے تھے۔
انھوں نے اپنی ابتدائی تعلیم ویرا پورا کولی مٹھ اور نوا گلی گاؤں کے ایک مڈل اسکول میں حاصل کی، جو موجودہ دور کی تمکور ڈسٹرکٹ میں واقع ہے۔ انھوں نے میٹرک کا امتحان 1926 میں پاس کیا۔ اس دوران مختصر عرصے کے لیے وہ سِدّھا گنگا مٹھ میں رہائشی طالب علم بھی تھے۔ انھوں نے سینٹرل کالج بنگلور سے پری-یونیورسٹی کورس مکمّل کیا اور 1930 میں طبیعیات اور ریاضی کے اختیاری مضامین کے ساتھ بیچلرز کی سند حاصل کی۔ ان کو کنڑ، سنسکرت اور انگریزی زبانوں پر عبور حاصل تھا۔
اسی سال جنوری میں اپنے دوست اور سِدّھا گنگا مٹھ کی سربراہی کے وارث شری مرولارادھیا کے انتقال کے بعد سوامی کو اُدّانا شیو یوگی سربراہ کی جانب سے شری مرولارادھیا کی جگہ منتخب کر لیا گیا۔ 3 مارچ 1930 کو رسمی تقریب کے بعد سوامی، ورکت آشرم میں داخل ہو گئے۔
سماجی خدمات
انھوں نے کُل 132 تعلیمی اور تربیتی ادارے قائم کیے، جن میں نرسری سے لے کر انجینیئرنگ، سائنس، فنون اور انتظام کے شعبہ جات کے کالجوں کے ساتھ ساتھ عملی تربیت کے مراکز بھی شامل تھے۔ انھوں نے ایسے تعلیمی ادارے قائم کیے، جو سنسکرت کی روایتی تعلیم کے ساتھ ساتھ جدید سائنس اور ٹیکنالوجی پر مبنی تعلیم بھی فراہم کرتے ہیں۔ اپنے فلاحی کاموں کے باعث ان کا وسیع پیمانے پر احترام کیا جاتا تھا۔
سوامی گُرُو کُل میں 5 سے 16 سال کی عمر کے کسی بھی حصّے کے 10 ہزار سے زائد بچّے زیرِ تعلیم ہیں، جن کا تعلّق تمام مذاہب، ذاتوں اور عقیدوں سے ہے؛ جنہیں مفت کھانا، تعلیم اور سائبان (تری ویدا دسوہی) فراہم کیے جاتے ہیں۔ مٹھ کا دورہ کرنے والے زائرین اور ملاقاتیوں کو مفت کھانا فراہم کیا جاتا ہے۔ مرکزی مذہبی رہنما کی راہ نمائی میں ایک سالانہ زرعی میلہ مقامی آبادی کے لیے منعقد کیا جاتا ہے۔ 2007 سے سوامی جی کی صد سالہ سال گرہ کے موقع پر حکومتِ کرناٹک نے شیو کمار سوامی جی پراشاستی کے نام پر ادارے کے قیام کا اعلان کیا۔ سابق صدر بھارت، عبدالکلام نے تمکور میں ان سے ملاقات کی اور سوامی جی کی تعلیم اور انسانیت کی فلاح کے لیے خدمات کو سراہا۔
صحت
25 جون 2016 کو سوامی جی کو یرقان لاحق ہونے کے باعث ہسپتال میں داخل کر لیا گیا اور علاج کے بعد ان کو ہسپتال سے فارغ کر دیا گیا۔ 12 مئی 2017 کو ان کے اندر مختلف انفیکشنوں کی تشخیص ہوئی، لیکن علاج کے بعد ان کی صحت مکمّل طور پر بحال ہو گئی۔ ستمبر 2017 میں انھیں دوبارہ ہسپتال میں داخل کر لیا گیا۔ 26 جنوری 2018 کو ان میں نمونیا اور پِتّے کے انفیکشن کی تشخیص ہوئی، لیکن ہسپتال میں مختصر قیام کے بعد ان کی صحت مکمّل بحآل ہو گئی۔ جون 2018 میں انھیں دوبارہ ہسپتال میں داخل کر لیا گیا، کیونکہ پِتّے کا انفیکشن دوبارہ عود کر آیا تھا۔
1 دسمبر 2018 کو انھیں دوبارہ ہسپتال میں داخل کر لیا گیا، جس کی وجہ جگر کی ٹیوب کا انفیکشن تھا۔ گو کہ ابتدائی طور پر انھیں ہسپتال سے فارغ کر دیا گیا، لیکن 3 دسمبر 2018 کو انھیں دوبارہ ہسپتال میں داخل کر لیا گیا۔ 8 دسمبر 2018 کو ان کا جگر کے بائی پاس کا آپریشن ہوا اور پِتّا نکال دیا گیا۔ یہ آپریشن محمد ریلا نے انجام دیا۔ یہ جراحت کامیاب رہی اور آئی۔سی۔یو۔ میں کچھ دن گزارنے کے بعد انھیں ہسپتال سے فارغ کر دیا گیا۔ 29 دسمبر 2018 کو انھیں پھیپھڑوں کا انفیکشن تشخیص ہوا اور 3 جنوری 2019 کو انھیں ہسپتال میں داخل کر لیا گیا۔ 11 جنوری 2019 کو انھیں اعانتِ حیات کی مشین (life support) پر منتقل کر دیا گیا، کیونکہ ان کی حالت بگڑ گئی تھی۔ 16 جنوری 2019 کو صحت مکمّل بحال نہ ہونے کے با وجود سوامی کو ان کی وصیت کے مطابق واپس سِدّھا گنگا مٹھ منتقل کر دیا گیا۔ 21 جنوری 2019 کو ان کی حالت تشویش ناک بتائی جاتی تھی اور اسی دن ہندوستان کے معیاری وقت کے مطابق صبح 11 بج کر 44 منٹ پر وہ وفات پا گئے۔ حکومتِ کرناٹک نے 22 جنوری 2019 کو عام تعطیل اور تین یوم کے لیے ریاستی سوگ کا اعلان کیا۔
اعزازات اور اعترافات
ان کی فلاحی خدمات کے اعتراف میں سوامی جی کو 1965 میں کرناٹک یونیورسٹی کی جانب سے ادب میں ڈاکٹریٹ (ڈاکٹر آف لٹریچر) کی سند سے نوازا گیا۔ ان کی صد سالہ سال گرہ کی تقریب کے موقع پر حکومتِ کرناٹک نے سوامی جی کو کرناٹک رتن کے اعزاز سے نوازا، جو ریاست کرناٹک کا سب سے بڑا شہری اعزاز ہے۔ 2015 میں حکومتِ ہندوستان نے انھیں پدم بھوشن کے اعزاز سے نوازا۔
2017 میں حکومتِ کرناٹک اور ان کے مدّاحوں نے ان کی سماجی خدمات کے اعتراف میں انھیں بھارت رتن سے نوازنے کا تقاضا کیا۔ سوامی جی کی وفات سے ایک ہفتے قبل کرناٹک کے وزیر اعلیٰ، ایچ ڈی کمار سوامی نے سوامی جی کی فلاحی خدمات کے اعتراف میں انھیں بھارت رتن سے نوازنے کا تقاضا کیا۔
حوالہ جات
This article uses material from the Wikipedia اردو article شیوکمار سوامی, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). تمام مواد CC BY-SA 4.0 کے تحت میسر ہے، جب تک اس کی مخالفت مذکور نہ ہو۔ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki اردو (DUHOCTRUNGQUOC.VN) is an independent company and has no affiliation with Wiki Foundation.