Mqaras Tmukuy Ni Knciyan

Mtbiyax balay qmpah ka rudan Truku sbiyaw,mgrbu balay do mtbiyax qmpah ni mskeeman balay miyah sapah paah qmpahan dha. Mnhdu mtbiyax do o musa maduk bbuyu ka snsnaw, kykuyuh o tminun sapah. Quri ka qngqaya djiyun dha o sowki, parih, suqu, btug. Phmaun dha o sari, masu, pgu, basaw, sqmu, brisan, beyluh, bunga. Emptukuy ni emphuma ana manu pnegalang brah na o asi ka plealay musa smapuh utux tmninun（utux bari） han, kiya ka mha suyang bi hru na ni malu bi gnhiyi na msa ka kari rudan sbiyaw. Gaya smapuh o saw nii, Msgasut alang ga, mk4 jiyax ka pnsrmalan ni spida hraan idas ska rabi ka smapuh bbuyu hiya. Paah sapah mowsa smapuh ka Msgasut o asi ka madas kingal laqi snaw emptghuy hyaan musa, Msgasut o rngagan na ka laqi snaw kndadax mowsa siida, “Mowsa ta smapuh utux ka sayang da, iya bi squwaq ni gmlux balay”. Babaw na nii do phngun na ka tahut ngalun na ka qbulit ni qhuni, sqada na ngangut ni brahan na mtahu. (Pusu na ka nii ga tealax smudal lnglungan ni psbgurah euda), iyax jiyax musa smapuh o ini phngi ka tahut nii. Babaw na nii ptungan na ka harung gaga jiyun laqi snaw ni hmiru harung musa spuhan, smapuh siida o dmuuy harung mhiyug kiyig ka laqi snaw nii.. Madas kana ana manu ghak pnegalang, ni kana ana manu nengalan uqun, kiya o masu, sari, sqmu, beyluh, bunga, pgu, basaw……. Mnhdu smapuh pnaah spuhan dhuq alang do miyah hyaan kana ka tnealang peangal ghak nadas Msgasut, yaasa klaun dha nadas Msgasut nii ka ghak o suyang bi ni mrana bi gnhiyi niya. Kiya ka kiya ni ini tduwa hmut musa tmukuy ka seejiq, asi ka plealay musa tmukuy ka Msgasut kiya ka suyang bi hru na mrana bi gnhiyi na, kmtuy o saw kiya uri, asi ka Msgasut ka plealay musa kmtuy, kiya ka ini tmbrii ka seejiq mkan siida. Nasi aji saw kiya dga, ini kmalu hru na ni naqih gnhiyi na uri, duri o tmbriun mhuqil ka seejiq, ana qbhni saw kiya uri, msa ka kari hnici rudan Truku sbiyaw. Saw nii ka kari Msgasut, Utux tmninun! Ana manu，ana nami rbangun ka isu, yaasa kana klgan ghak uqun ni pnegalang nangal nami o snalu baga su kana, babaw tnukuy nami do thdagan , shdaan su, pqyuxan su, sdmlan su, sbhuran su ni pkdakil bitaq emphpah ni mghiyi kana lala kntuy nami . Duri o nii su dmuuy kana kneudus samat, qbhni, kuwi bbuyu ni qsurux gsilung ni yayung, bitaq kana ymyami nii o gaga suyang baga su kana. Brahaw misu balay Utux Tmninun！ Hngkawas nii o wada nami mnduwa mangal uqun ni hiyi pnegalang paah qmpahan breenux ni ddgiyaq. Saw nii nami pslwilun mkug brah su hini sayang； Kiya o masu, payay, bunga, sari, beyluh, sqmu, brisan, sibus, blbul, trabus, pdpajiq, hlama, siyang, ni samat, sinaw ni qsiya mhmahun nnii o mnda huway su ni biyax su kana. Kiya do ngali nami hngkawas ktngian ka hngkawas nii ni pbliqi nami ka bgurah hngkawas duri. . Iya pstmayi mnarux mreeru ka elealang ni saw aji uqun kuwi ka kana pnegalang. Musa qmpah qmpahan, mksa bbuyu, ni kana lqlaqi nami o empniqun ka hjyuun dha aji mowda mksula elug. Iya pngali luqih elug ni saw mha rinah emblaiq ni mqaras sunan tmdahu hangan su, smtama sunan ni mqaras sunan isu Utux Bari ana manu. “Utux Bari hakawas sayang ka kndsan nami o malu balay knlwaan su, gmhak nami o malu balay nangal nami ni mttuku balay, kksa nami bbuyu o kmalu utux, biqi knkla ni klwai ka lqlaqi nami, hkawas duri o sbliqi nami duri. Mhuway su balay utux bari. Sus Bari! ” Msapuh ： Balay bi ka kari nami nii! Kana seejiq : Balay bi! Msapuh ： Mqaras nami sunan, Isu o utux tmninun. Kana seejiq : Balay bi! Msapuh  : Ana rabang Utux Tmninun! Kana Seejiq  : Ana rabang！ Msapuh  : Mqaras nami sunan Utux Tmninun! Kana Seejiq  : Mqaras nami sunan! Msapuh  : Tmdahu nami sunan Utux Tmninun! Kana Seejiq  : Tmdahu nami sunan! Msapuh  : Waw！ Ana rabang Kana Seejiq  : Waw! Waw! Waw! Ana rabang! Ana rabang! Ana rabang!

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.