Воҳидҳои Ҳосилавӣ

Чунончи, барои муқаррар кардани суръати хаттӣ ба сифати муодилаи муайянкунанда аз ифодаҳои суръати ҳаракати мунтазами ростхатта : v=l/t истифода бурдан мумкин аст. Ҳангоми дарозии масофаи тайшуда (бо метрҳо) ва вақти t, ки дар давоми он масофаи мазкур тай шудааст (бо сония), суръатро бо метр бар сония (м/с) чен мекунанд. Аз ин сабаб воҳиди суръат дар Системаи байналмилалии воҳидҳо (СИ) – метр бар сония – суръати нуқтаи ростхатта ва мунтазам ҳаракаткунандаест, ки ҳангоми он нуқта дар муддати 1 с масофаи 1 метрро тай мекунад. Агар ба муодилаи муайянкунанда зариби ададӣ дохил шуда бошад, барои ҳосил кардани воҳиди ҳосилавӣ ба қисми рости муодила он миқдори ададии бузургиҳои аввалаеро ворид мекунанд, ки миқдори ададии воҳиди ҳосилавии муайяншаванда ба воҳид (як) баробар шавад. Мас., воҳиди энергияи кинетикии Системаи байналмилалии воҳидҳо – килограмм-метр дар квадрат (кг-м²) бар сония дар квадрат (с²) ин энергияи кинетикии ҷисми массааш 2 кг аст, ки бо суръати 1м/с ҳаракат мекунад ё энергияи кинетикии ҷисми массааш 1 кг аст, ки бо суръати √2 м/с дар ҳаракат аст. Ин воҳидро ҷоул (Ҷ) меноманд. Воҳидҳои ҳосилавӣ инҳоанд: м² (воҳиди масоҳат), м/с (воҳиди суръат), Ҳс = 1/с (воҳиди басомад), Па (воҳиди фишор), Вт (воҳиди тавоноӣ), Ф (воҳиди электргунҷоиш) ва ғ.

• Воҳидҳои ҳосилавӣ // Вичлас — Гӯянда. — Д. : СИЭМТ, 2015. — (Энсиклопедияи Миллии Тоҷик : [тахм. 25 ҷ.] / сармуҳаррир Н. Амиршоҳӣ ; 2011—2023, ҷ. 4). — ISBN 978-99947-33-77-4.