Gunilla Wolde

Brorsson; 15. syeinimáánu 1939 Göteborg, Ruotâ – 15. cuáŋuimáánu 2015 Kalmar, Ruotâ) lâi ruátálâš párnáikirječällee já kovvejeijee. Suu párnáikirjeh láá uáli jo pivnoheh já láá jurgâlum aainâs-uv 26 kielân, ml. kuulmâ sämikielân (orjâlâškielân, juulevsämikielân já maadâsämikielân). Wolde kirjeh iä lah val jurgâlum anarâškielân.

Barbro Gunilla Kristina Brorsson šoodâi syeinimáánu 15. peeivi 1939 Göteborgist, Ruotâst. Suu eeči lâi merâalmai, eennâmviljâleijee já kävppijâs Gabriel Bror Hildebrand Brorsson (1907–1976), já suu enni lâi pyecceitipšoo já toimâtteijee Gunnel Maria Brorsson (j.s. Vestergren) (1907–2001). Peerâ aasâi Älmstast, mii lii Ålandmeerâ riddoost Tukholma taavaabeln.

Ive 1955 Brorsson jođeškuođij Bergh máinusškoovlâ Tukholmast. Ive 1957 sun naajâi Rolf Gustafssonáin (1935–2004), mut jo ive 1962 suoi iäránáin. Ovdebáá ive sun jođeškuođij Konstfackskola, mast sun valmâštui seinimáálájeijen ive 1965. Siämmáá ive sun naajâi juuriist Peter Woldein (1937–2004). Suoi iäránáin ive 1999.

Ovdil ko sun algâttij karrieeris párnáikirječällen Wolde poorgâi pooliitlâš já saatiirlâš pilesárgon maŋgáid ruátálâš aavisáid já lostáid tegu Dagens Nyheter, Svenska Dagbladet já Aftonbladet. Sun meid sáárgui kuuvijd maaŋgâi kirječällei kirjijd. 1960-lovo loopâst Wolde čäliškuođij já sárguškuođij jieijâs-uv kiirjijd.

Wolde vuossâmuš jieijâs kirje Totte går ut almostui ive 1969. Totte-kirjeh šoddii sárgusijn, maid Wolde lâi sárgum Per-uccâalgasis. Wolde naabur lâi kuástideijee Harriet Alfons, kii meridij almostittiđ sárgusijd kovekirjen. Kirjeest Totte-nommâsâš páárnáš viggá kárvudâttâđ olgopihtâsijdis. Kirje maailm lii aaibâs ereslágán ko tot, mii lâi távjá tallain párnáikiirjijn, moh lijjii iänááš ellee- teikkâ párnáimainâseh.

Jo siämmáá ive almostui nubbe-uv kirje: Totte badar. Ive 1974 almostui vuossâmuš kirje Emma-nieidâst: Emma och lillebror. Totte- já Emma-kiirjijd sun čaalij ohtsis 20, 10 kuábbáá-uv rááiđust. Ive 1969 rääjist 1980-lovo loopâ räi Wolde čaalij já kuvvij mestâ jyehi ive ucemustáá kyehti kirje. Sun čaalij já sáárgui meid nuorâikiirjijd hiäppušijn.

Wolde ášáliih kirjeh láá lamaš uáli pivnoheh jo aalgâ rääjist. Ovdâmerkkân suu kirjeh luoihâttuvvojii 774 867 kerdid Ruotâ almolâš kirjeráájuin já škovlâkirjeráájuin ive 1994. Talle sun lâi 10. saajeest kirjeráájui pivnohumos kirječällei luoihâttemlistoost. Veikkâ Wolde jaamij jo ive 2015, sun kirjeh láá ivveest nuubán ain pivnoheh.

Gunilla Wolde kirjij luoihâttemmereh Ruotâ almolâš kirjeráájuin já škovlâkirjeráájuin iivij 2005–2022

Totte-kirjeh

• 1969 – Totte badar
• 1969 – Totte går ut
• 1970 – Totte städar
• 1970 – Totte bygger
• 1972 – Totte går till doktorn
• 1972 – Totte klär ut sig
• 1973 – Totte bakar
• 1973 – Totte leker med kisse
• 1973 – Totte och Malin
• 1973 – Totte är liten

Emma-kirjeh

• 1974 – Emma och lillebror
• 1975 – Annorlunda Emma och Per
• 1975 – Emma dammsuger
• 1975 – Emmas lillebror är sjuk
• 1976 – Emmas dagis
• 1976 – Emmas första dag på dagis
• 1977 – Emma hos doktorn.
• 1977 – Emmas verkstad.
• 1985 – Emma går till tandläkaren
• 1985 – Emma tvärtemot