ၽႅၼ်ႇတီႈ ၵူးၵႄႇ

Google Maps ၼႆႉ မၼ်းပဵၼ်ၵၢၼ်ၸွႆႈသၢင်ႈ Web mapping ၶွင် ၶွမ်ႇပၼီႇ Google ဢၼ်ၼိုင်ႈသေ မၼ်းႁဵတ်းသၢင်ႈပၼ် ၽႅၼ်ႇတီႈလၢဝ်ထိမ်း ဢၼ်ၵပ်းၵၢႆႇလူၺ်ႈ တၢင်း တွၼ်ႈတႃႇၽူႈဢွၵ်ႇၶၢဝ်းတၢင်း၊ လူတ်ႉၵႃး၊ လူတ်ႉၶိူင်ႈ၊ ပႆႇတိၼ် ၸၵႂႃႇၸိူဝ်းၼႆႉယဝ်ႉ။ Google Maps ၼႆႉ တႄႇပိုတ်ႇတၢင်ႇမႃး မိူဝ်ႈ လိူၼ်ၾႅပ်ႉဝႃႇရီႇ ပီ 2005 ၼၼ်ႉယဝ်ႉ။ ယွၼ်ႉပိူဝ်ႈဝႃႈ Google Maps ၼႆႉ မၼ်းၵမ်ႉထႅမ်ပၼ် API လႄႈ ၸိူဝ်းပဵၼ် ဝႅပ်ႉသၢႆထူၼ်ႈသၢမ် third-part ၸိူဝ်းၼၼ်ႉၵေႃႈ ၸၢင်ႈႁဵတ်း embedded သေၵေႃႈ ၸႂ်ႉလႆႈမႃးယဝ်ႉ။ တွၼ်ႈတႃႇ ၽူႈတႂ်ႉတိုဝ်းတင်းလူမ်ႈၾႃႉ ပေႃးတေၶဝ်ႈႁူမ်ႈမႃးလႆႈၼႆ ဢဝ် Google Map Maker သေ ႁဵတ်းသၢင်ႈပၼ်မႃးယူႇယဝ်ႉ။ Google Map ၼႆႉ ပဵၼ်ၽၢင်ယႅမ်ႈဢၼ်လႆႈ ၵူမ်ႈတူၺ်းတၢင်းတႂ်ႈ (လၢႆးၼူၵ်ႉႁၼ်) ၼၼ်ႉယဝ်ႉ။ ပေႃးပဵၼ်ၽၢင်ယႅမ်ႈတီႈဝဵင်းယႂ်ႇဝဵင်းလူင်ၼႆ ၸႂ်ႉတိုဝ်းၶႅပ်းႁၢင်ႈလၢဝ်ထိမ်း ဢၼ်လုၵ်ႉတီႈၵၢင်ႁၢဝ်သေထႆႇဝႆႉတီႈ တၢင်းသုင် လုၵ်ႉဢဝ် 800 ထတ်း တေႃႇ 1500 ထတ်းၼၼ်ႉယဝ်ႉ။ ၸိူဝ်းပဵၼ် ၶႅပ်းႁၢင်ႈလၢဝ်ထိမ်းၵမ်ႉပႃႈၼမ်ၼႆႉ တႃႇတေယုၵ်ႉသုင်ၶိုတ်းဝၼ်းမၼ်းၼႆႉ ၵႆႉႁိုင်မွၵ်ႈ သၢမ်ပီၼႆႉယဝ်ႉ။ Google Maps ၼႆႉ ယွၼ်ႉၸႂ်ႉဝႆႉ Mecrator projection လႄႈ ၼႃႈလိၼ်ၸိူဝ်းမီးတီႈၸဵင်ႇၵၢၼ်းလူၵ်ႈၼၼ်ႉ ဢမ်ႇၼႄပၼ်လႆႈ တႅတ်ႈတႅတ်ႈတေႃးတေႃး။ Google Maps ဢၼ်တေၸၢင်ႈၸႂ်ႉလႆႈတီႈ ၶွမ်းတၢင်ႇၽိူၼ်ႇၼၼ်ႉၵေႃႈ လႆႈမူၼ်ႉမႄးႁဵတ်းဢွၵ်ႇမႃးမိူဝ်ႈပီ 2013 ၼၼ်ႉယဝ်ႉ။ တွၼ်ႈတႃႇၾူင်းမိုဝ်းထိုဝ်တႄႉ ႁဵတ်းဢွၵ်ႇမႃးပၼ် မိူဝ်ႈပီ 2008 ၼၼ်ႉယဝ်ႉ။ ထိုင်မႃး ပီ 2013 ၼၼ်ႉ ဢၼ်ပဵၼ် Google Maps ၼၼ်ႉ ၶဝ်ႈပႃးၼႂ်းသဵၼ်ႈမၢႆ app ဢၼ်ၵူၼ်းၼႂ်းလူၵ်ႈ ၸႂ်ႉတိုဝ်းၼမ်သေပိူၼ်ႈၼၼ်ႉယဝ်ႉ။ မိူဝ်ႈပီ 2012 ၼၼ်ႉ လုၵ်ႉတီႈ ႁူင်းၵၢၼ် ၶွမ်ႇပၼီႇ Google လႆႈပိုၼ်ၶၢဝ်ႇဝႃႈ ၵူၼ်းႁၢပ်ႇၵၢၼ် တွၼ်ႈတႃႇ ထႆႇပၼ်ႁၢင်ႈ Google Maps ၼႆႉ မီး 7,100 ၵေႃႉ ဝႃႈၼႆႉယဝ်ႉ။