Kitab Al Asmaa
Iga Adlis n ismawn (s tɛrabt: كتاب الاسماء kitāb al-asmā’) yan msmun awal aɛrabt-aclḥi n Ibn Tunart.
Nttan ad igan aqbur akkʷ ɣ id msmun awal n tutlayin timaziɣin, ḥḍan t ɣila ɣ tinidlisn n MMSH n Aix-en-Provence (Tasdawit n Marsey). Ittyura ɣ tasut tis 12 ɣ usggwas n 1145 (540 hijrya).
Amara nns
|
Abu Ɛabdullah Muḥammad Ibn Jaɛfar al-Qaysi, ittuysan s yism n Ibn Tunart nɣ Ibn Tunirt. Ilul ɣ 1085 (478 hijrya) ɣ Qalɛa n Bni Ḥammad ɣ ugafa n tmazirt n Dzayr. Ikml tiɣri nns ɣ Buji d Dzayr tamdint, mn bɛd ɣ Kurdu ɣ Wandalus. Ikka tt inn iga lqaḍi d aslmad ɣ Fas lli ɣ d immut ɣ 1172. Ikka tt inn iga yan umara amaziɣ.
Mad gis illan
Kkuẓ n warratn ad ufan n "Adlis n ismawn", kraygat yan gisn ur irwas wayyaḍ. Munn kullu ɣ yan warra ig win tasut tis 18 ar tis 20. Gan s kkuẓ-itsn win umara Ibn Tunart. Tis-kkuẓt, talli akk gisn istawhman, gis uggar n 2.500 n ukccumn iɛrabn d usuɣl nnsn s tclḥit. Ikccumn ad smunn tn ɛla ḥsab imrsi nnsn (tazzit n ufgan, imudar n tgmmi, imɣi...).
Zɣ kullu tutlayin timaziɣin n ɣilad, talli akkʷ irwasn tamaziɣt taqburt nna s yura Ibn Tunart adlis nns tga tt Tclḥit. Mayad ar bahra itbayan ɣ iwaliwn d tguriwin n umawal ad acku llan gisn kra n tguriwin nna ur aɣ tn tafat abla ɣ tutlayt taclḥit d ur llin ɣ tutlayin timaziɣin yaḍn, zun d: Aɣwy, Afulkiy, Asid, Tigmmi, Iḍgam, iḍaggʷn, Dar, atg.
Llant daɣ kra n tguriwin ɣ udlis ad nna ur illin ɣ taclḥit tatrart, wala ɣ tutlayin timaziɣin yaḍn, zun d: Kasra (ɣar).
Isaɣuln
Isaɣuln
This article uses material from the Wikipedia Taclḥit article Kitab Al asmaa, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Mayad illa ddu CC BY-SA 4.0 abla iɣ ittuybdar mas ur t-igi. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Taclḥit (DUHOCTRUNGQUOC.VN) is an independent company and has no affiliation with Wiki Foundation.