ᱮᱨᱱᱮᱥᱛᱳ ᱪᱮ ᱜᱮᱵᱷᱟᱨᱟ (/tʃeɪ ɡəˈvɑːrə/; Spanish: ; (᱑᱔ ᱡᱩᱱ ᱑᱙᱒᱘ ᱠᱷᱚᱱ ᱙ ᱚᱠᱴᱚᱵᱚᱨ ᱑᱙᱖᱗) ᱫᱚ ᱟᱨᱡᱮᱱᱴᱤᱱᱟ ᱨᱮᱱᱟᱜ ᱢᱤᱫ ᱢᱟᱨᱠᱵᱟᱫᱤ ᱨᱟᱡᱟᱨᱤ, ᱰᱟᱠᱛᱟᱨ,ᱚᱱᱚᱞᱤᱭᱟᱹ, ᱟᱹᱠᱤᱞᱟᱱ ᱢᱟᱹᱱᱢᱤ, ᱜᱮᱨᱤᱞᱟ ᱱᱮᱛᱟ, ᱠᱤᱣᱵᱟ ᱵᱤᱯᱞᱚᱵᱽ ᱨᱮᱱ ᱢᱩᱬᱩᱛ ᱢᱟᱹᱱᱢᱤᱭ ᱛᱟᱸᱦᱮᱸᱠᱟᱱᱟ᱾ ᱩᱱᱤᱭᱟᱜ ᱟᱥᱚᱞ ᱧᱩᱛᱩᱢ ᱫᱚ ᱮᱨᱱᱮᱥᱛᱚ ᱜᱮᱵᱷᱟᱨᱟ ᱫᱮ ᱞᱟ ᱥᱮᱨᱱᱟ (ᱮᱥᱯᱮᱱᱤᱭᱳ: Ernesto Guevara de la Serna) ᱛᱟᱸᱦᱮᱸᱠᱟᱱᱛᱟᱭᱟ᱾ ᱛᱚᱵᱮ ᱜᱚᱴᱟ ᱫᱷᱟᱹᱨᱛᱤ ᱨᱮ ᱩᱱᱤ ᱫᱚ ᱞᱟ ᱪᱮ ᱥᱮ ᱠᱷᱟᱹᱞᱤ ᱪᱮ ᱢᱮᱱᱛᱮᱜᱮ ᱡᱟᱹᱥᱛᱤ ᱠᱩ ᱪᱤᱱᱦᱟᱹᱣᱫᱤ ᱛᱟᱸᱦᱮᱸᱱᱟ᱾
᱑᱙᱒᱘ ᱥᱮᱨᱢᱟ ᱨᱮᱱᱟᱜ ᱑᱔ ᱡᱩᱱ ᱪᱮ ᱜᱮᱵᱷᱟᱨᱟ ᱟᱨᱡᱮᱱᱴᱤᱱᱟ ᱨᱮᱭ ᱡᱟᱱᱟᱢ ᱞᱮᱱᱟ᱾ ᱟᱹᱠᱩ ᱢᱚᱬᱮ ᱵᱚᱭᱦᱟ ᱵᱷᱤᱛᱨᱤᱨᱮ ᱩᱱᱤᱜᱮ ᱡᱚᱛᱚᱠᱷᱚᱱ ᱞᱟᱹᱴᱩ ᱩᱛᱚᱹᱨᱤᱡ ᱮ ᱛᱟᱸᱦᱮᱸᱠᱟᱱᱟ᱾ ᱠᱟᱹᱴᱤᱡ ᱠᱷᱚᱱ ᱜᱮ ᱪᱮ ᱫᱚ ᱟᱹᱰᱤ ᱪᱷᱟᱴᱯᱟᱴᱮ ᱛᱟᱸᱦᱮᱸᱠᱟᱱᱟ᱾ ᱚᱱᱟ ᱧᱮᱞ ᱠᱟᱛᱮ ᱜᱮ ᱟᱡ ᱵᱟᱵᱟ ᱫᱚᱭ ᱦᱩᱫᱤᱥ ᱞᱮᱫᱟ ᱡᱮ ᱱᱩᱭ ᱜᱤᱫᱨᱟᱹ ᱟᱜ ᱢᱟᱭᱟᱢ ᱨᱮ ᱫᱚ ᱟᱭᱨᱤᱥ ᱦᱩᱞ ᱨᱮᱱᱟᱜ ᱢᱟᱭᱟᱢ ᱵᱚᱦᱮᱞᱚᱜ ᱠᱟᱱᱟ᱾ ᱠᱟᱹᱴᱤᱡ ᱠᱷᱚᱱ ᱜᱮ ᱪᱮ ᱫᱚ ᱨᱮᱸᱜᱮᱡ, ᱱᱟᱪᱟᱨ ᱢᱟᱹᱱᱢᱤ ᱠᱩ ᱧᱮᱞ ᱠᱟᱛᱮ ᱟᱹᱰᱤ ᱵᱟᱝ ᱢᱚᱡᱮ ᱟᱹᱭᱠᱟᱹᱣᱮᱛ ᱛᱟᱸᱦᱮᱸᱱᱟ ᱟᱨ ᱩᱝᱠᱩ ᱪᱮᱠᱟᱛᱮᱭ ᱩᱯᱠᱟᱨ ᱠᱳᱣᱟ ᱚᱱᱟᱭ ᱪᱤᱱᱛᱟᱹᱭᱮᱛ ᱛᱟᱸᱦᱮᱸᱱᱟ᱾ ᱚᱱᱟᱛᱮ ᱟᱹᱰᱤ ᱠᱟᱹᱴᱤᱡ ᱠᱷᱚᱱ ᱜᱮ ᱨᱟᱡᱟᱨᱤ ᱪᱮᱛᱟᱱᱨᱮ ᱟᱭᱢᱟ ᱜᱮᱭᱟᱱᱮ ᱦᱟᱢᱮᱴ ᱫᱟᱲᱮ ᱞᱮᱫᱟ᱾
ᱪᱮ ᱜᱮᱵᱷᱟᱨᱟ ᱑᱙᱔᱘ ᱥᱮᱨᱢᱟ ᱨᱮ ᱵᱩᱭᱮᱱᱥ ᱟᱭᱟᱨᱥ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱷᱚᱱ ᱰᱟᱠᱛᱟᱨᱤ ᱯᱟᱲᱦᱟᱣ ᱞᱟᱹᱜᱤᱛᱮ ᱵᱷᱳᱨᱛᱤ ᱞᱮᱱᱟ᱾ ᱩᱱ ᱡᱚᱠᱷᱚᱡ ᱑᱙᱕᱑ ᱥᱮᱨᱢᱟ ᱨᱮ ᱚᱞᱚᱜ ᱯᱟᱲᱦᱟᱣ ᱨᱮ ᱢᱤᱫ ᱥᱮᱨᱢᱟ ᱵᱟᱹᱜᱤ ᱠᱟᱛᱮ ᱟᱡᱨᱮᱱ ᱜᱟᱛᱮ ᱠᱚᱲᱟ ᱟᱞᱵᱟᱨᱴᱳ ᱜᱨᱟᱱᱟᱰᱳ ᱥᱟᱶ ᱢᱚᱴᱚᱨ ᱥᱟᱭᱠᱮᱞ ᱛᱮ ᱠᱚᱧᱮ ᱟᱢᱮᱨᱤᱠᱟ ᱫᱟᱲᱟᱱᱮ ᱩᱰᱩᱝᱞᱮᱱᱟ᱾ ᱚᱱᱟ ᱫᱟᱲᱟᱱ ᱨᱮᱱᱟᱜ ᱩᱱᱤᱭᱟᱜ ᱟᱸᱥ ᱫᱚ ᱛᱟᱸᱦᱮᱸᱠᱟᱱᱟ ᱯᱮᱨᱩ ᱨᱮᱱᱟᱜ ᱥᱟᱱ ᱯᱮᱵᱞᱳᱨ ᱞᱮᱯᱟᱨ ᱠᱚᱞᱳᱱᱤ ᱨᱮ (ᱠᱩᱥᱴᱷᱳ ᱨᱳᱜᱤ ᱠᱳᱣᱟᱜ ᱢᱤᱫ ᱠᱚᱞᱳᱱᱤ) ᱥᱮᱪᱷᱟᱥᱮᱵᱚᱠ ᱦᱤᱥᱟᱹᱵᱛᱮ ᱠᱟᱹᱢᱤ᱾ ᱢᱟᱪᱩ ᱯᱤᱪᱩ ᱪᱟᱞᱟᱜ ᱚᱠᱛᱚᱨᱮ ᱟᱛᱚ ᱴᱚᱞᱟᱨᱮᱱ ᱨᱮᱸᱜᱮᱪ ᱠᱤᱥᱟᱹᱱ ᱠᱩ ᱧᱮᱞᱛᱮ ᱟᱹᱰᱤᱜᱮ ᱫᱩᱠᱷᱮ ᱟᱹᱭᱠᱟᱹᱣᱞᱮᱫᱟ᱾ ᱱᱩᱠᱩ ᱠᱤᱥᱟᱹᱱ ᱫᱚ ᱠᱤᱥᱟᱸᱲ ᱠᱳᱣᱟᱜ ᱚᱛ ᱦᱟᱥᱟ ᱪᱟᱥ ᱠᱟᱛᱮ ᱟᱹᱰᱤ ᱱᱟᱪᱟᱨ ᱛᱮᱠᱩ ᱵᱟᱸᱪᱟᱜ ᱠᱟᱱ ᱛᱟᱸᱦᱮᱸᱱᱟ᱾ ᱱᱚᱣᱟᱠᱩ ᱫᱟᱲᱟᱱ ᱫᱚ ᱟᱡ ᱟᱭᱟᱜ ᱰᱟᱭᱮᱨᱤ ᱨᱮᱭ ᱚᱞ ᱫᱚᱦᱚᱞᱮᱫᱟ᱾ ᱚᱱᱟ ᱱᱤᱭᱟᱹᱛᱮ The Motorcycle Diaries ᱧᱩᱛᱩᱢᱟᱱ ᱥᱤᱱᱮᱢᱟ ᱩᱰᱩᱝ ᱞᱮᱱᱟ᱾
ᱱᱤᱭᱟᱹ ᱫᱟᱲᱟᱱ ᱨᱮ ᱟᱡ ᱟᱨᱡᱮᱱᱴᱤᱱᱟ, ᱪᱤᱞᱤ, ᱯᱮᱨᱩ,ᱤᱠᱩᱭᱮᱰᱚᱨ,ᱠᱚᱞᱚᱢᱵᱤᱭᱟ, ᱵᱷᱮᱱᱮᱡᱩᱭᱮᱞᱟ, ᱯᱟᱱᱟᱢᱟ, ᱢᱤᱭᱟᱢᱤ ᱛᱟᱞᱟᱛᱮ ᱵᱩᱭᱮᱱᱥ ᱟᱭᱟᱨᱥ ᱜᱚᱴᱟᱣ ᱫᱟᱲᱟᱣ ᱠᱟᱫᱟ᱾ ᱱᱚᱣᱟ ᱫᱟᱲᱟᱱ ᱢᱩᱪᱟᱹᱫ ᱨᱮ ᱪᱮᱭ ᱢᱮᱱᱞᱮᱫᱟ ᱠᱚᱧᱮ ᱟᱢᱮᱨᱤᱠᱟ ᱫᱚ ᱵᱷᱮᱜᱟᱨ ᱵᱷᱮᱜᱟᱨ ᱫᱤᱥᱟᱹᱢ ᱨᱮᱱᱟᱜ ᱢᱤᱫ ᱡᱚᱱᱚᱲ ᱫᱚ ᱵᱟᱝ ᱠᱟᱱᱟ ᱵᱚᱨᱚᱝ ᱢᱤᱫ ᱫᱤᱥᱟᱹᱢ ᱠᱟᱱᱟ ᱡᱟᱸᱦᱟᱸᱨᱮ ᱨᱮᱸᱜᱮᱸᱪ ᱢᱟᱹᱱᱢᱤ ᱠᱳᱣᱟᱜ ᱯᱷᱩᱨᱜᱟᱹᱞ ᱞᱟᱹᱠᱛᱤ ᱠᱟᱱᱟ᱾
ᱠᱤᱣᱵᱟ ᱨᱮ ᱞᱟᱹᱲᱦᱟᱹᱭ ᱚᱠᱛᱚᱨᱮ ᱵᱤᱯᱞᱳᱵᱤ ᱯᱷᱤᱫᱮᱹᱞ ᱠᱟᱥᱛᱨᱚ ᱨᱮᱱ ᱟᱯᱱᱟᱨ ᱦᱚᱲᱮ ᱛᱟᱸᱦᱮᱸᱠᱟᱱᱟ ᱪᱮ᱾ ᱞᱟᱹᱲᱦᱟᱹᱭ ᱨᱮ ᱪᱮ ᱫᱚ ᱟᱭᱢᱟ ᱞᱮᱠᱟᱛᱮ ᱯᱷᱤᱫᱮᱹᱞ ᱠᱟᱥᱛᱨᱚᱭ ᱜᱚᱸᱲᱚᱸ ᱟᱠᱟᱫᱤᱭᱟ᱾ ᱜᱮᱵᱷᱟᱨᱟ ᱜᱨᱮᱹᱱᱮᱹᱰ ᱠᱟᱨᱠᱷᱟᱱᱟ, ᱯᱤᱴᱷᱟᱹ ᱵᱮᱱᱟᱣ ᱪᱩᱞᱦᱟᱹ ᱟᱨ ᱚᱞᱚᱜ ᱯᱟᱲᱦᱟᱣ ᱵᱟᱝ ᱵᱟᱰᱟᱭ ᱦᱚᱲᱠᱚ ᱞᱟᱹᱜᱤᱛ ᱯᱟᱲᱦᱟᱣ ᱪᱤᱛ ᱨᱮᱱᱟᱜ ᱠᱩᱨᱩᱢᱩᱴᱩ ᱠᱚ ᱪᱮ ᱜᱮᱭ ᱠᱚᱨᱟᱣ ᱞᱮᱫᱟ᱾ ᱤᱱᱟᱹ ᱵᱟᱫᱽ ᱠᱟᱛᱮ ᱦᱚᱸ ᱦᱟᱥᱯᱟᱛᱟᱞ, ᱞᱟᱹᱲᱦᱟᱹᱭ ᱞᱟᱹᱜᱤᱫ ᱥᱚᱲᱠᱚ ᱥᱟᱯᱲᱟᱣ, ᱠᱷᱚᱵᱚᱨ ᱠᱟᱜᱚᱡᱽ ᱦᱚᱸᱭ ᱩᱰᱩᱝ ᱞᱮᱫᱟ᱾ ᱴᱟᱭᱤᱢ ᱢᱮᱜᱟᱡᱤᱱ ᱨᱮ ᱪᱮ ᱫᱚ ᱯᱷᱤᱫᱮᱹᱞ ᱠᱟᱥᱛᱨᱚ ᱨᱮᱱ ᱵᱚᱦᱚᱜ ᱢᱮᱱᱛᱮ ᱠᱚ ᱞᱮᱠᱷᱟ ᱞᱤᱫᱤᱭᱟ᱾
ᱪᱮ ᱜᱮᱵᱷᱟᱨᱟ ᱫᱚ ᱱᱤᱭᱚᱢ ᱠᱟᱹᱱᱩᱱ ᱢᱟᱱᱟᱣᱦᱚᱲᱮ ᱛᱟᱸᱦᱮᱸᱠᱟᱱᱟ᱾ ᱚᱱᱟ ᱠᱷᱟᱛᱤᱨ ᱯᱷᱩᱨᱜᱟᱹᱞ ᱵᱟᱹᱦᱤᱱᱤ ᱨᱮᱱ ᱠᱚᱢᱟᱱᱰᱟᱨ ᱦᱤᱥᱟᱹᱵᱛᱮ ᱦᱚᱸ ᱠᱚ ᱞᱮᱠᱷᱟᱞᱤᱫᱤᱭᱟ᱾ ᱠᱟᱹᱤ ᱵᱟᱝ ᱠᱚᱨᱟᱣ ᱦᱚᱲ ᱠᱚ ᱫᱚ ᱩᱱᱤ ᱜᱩᱞᱤ ᱜᱚᱪ ᱛᱮ ᱦᱚᱸ ᱵᱟᱭ ᱵᱚᱛᱚᱨᱚᱜ ᱠᱟᱱ ᱛᱟᱸᱦᱮᱸᱱᱟ᱾
ᱵᱚᱞᱤᱵᱷᱤᱭᱟ ᱥᱮᱱᱟᱵᱟᱦᱤᱱᱤ ᱟᱜ ᱠᱟᱛᱷᱟ ᱞᱮᱠᱟᱛᱮ ᱩᱱᱠᱩ ᱫᱚ ᱑᱙᱖᱗ ᱥᱮᱨᱢᱟ ᱨᱮᱱᱟᱜ ᱗ ᱚᱠᱴᱚᱵᱚᱨ ᱪᱮ ᱠᱩ ᱥᱟᱵ ᱞᱤᱫᱤᱭᱟ ᱟᱨ ᱙ ᱚᱠᱴᱚᱵᱚᱨ ᱛᱤᱠᱤᱱ ᱑.᱑᱐ ᱢᱤᱱᱤᱴ ᱨᱮᱭ ᱜᱚᱪ ᱞᱮᱱᱟ᱾ ᱟᱫᱚ ᱪᱮ ᱟᱜ ᱜᱚᱭ ᱜᱩᱨ ᱱᱤᱭᱟᱹᱛᱮ ᱱᱟᱱᱟ ᱦᱩᱱᱟᱹᱨ ᱠᱟᱛᱷᱟ ᱠᱩ ᱯᱟᱥᱱᱟᱣ ᱟᱠᱟᱱᱟ᱾
᱑᱙᱙᱗ ᱥᱮᱨᱢᱟ ᱨᱮ ᱪᱮ ᱥᱟᱶ ᱮᱴᱟᱜ ᱥᱮᱱᱟ ᱠᱳᱣᱟᱜ ᱛᱚᱯᱟ ᱥᱮᱸᱫᱽᱨᱟ ᱧᱟᱢ ᱞᱮᱱᱟ᱾
ᱪᱮ ᱜᱮᱵᱷᱟᱨᱟ ᱠᱤᱣᱵᱟᱱ ᱯᱟᱹᱨᱥᱤ ᱛᱮ ᱗᱐ ᱜᱚᱴᱟᱝ ᱟᱨᱴᱤᱠᱮᱹᱞᱮ ᱚᱞ ᱞᱮᱫᱟ, ᱟᱨᱦᱚᱸ ᱩᱠᱩ ᱧᱩᱛᱩᱢ ᱛᱮ ᱒᱕ ᱜᱚᱴᱟᱝ ᱮ ᱚᱞ ᱞᱮᱫᱟ ᱢᱮᱱᱛᱮ ᱵᱟᱰᱟᱭ ᱟᱠᱟᱱᱟ᱾ ᱢᱚᱬᱮ ᱜᱚᱴᱟᱝ ᱯᱚᱛᱚᱵ ᱨᱮᱱᱟᱜ ᱮᱛᱦᱚᱵ ᱮ ᱚᱞ ᱟᱠᱟᱫᱟ᱾ ᱑᱙᱕᱘ ᱠᱷᱚᱱ ᱑᱙᱖᱕ ᱥᱮᱨᱢᱟ ᱫᱷᱟᱹᱵᱤᱡ ᱒᱕᱐ ᱜᱚᱴᱟᱝ ᱞᱮᱠᱟ ᱵᱷᱟᱥᱚᱱ ᱟᱨ ᱥᱟᱠᱠᱷᱟᱛᱠᱟᱨᱮ ᱮᱢ ᱟᱠᱟᱫᱟ᱾ ᱦᱚᱲ ᱠᱩ ᱴᱷᱮᱱᱮ ᱚᱞ ᱟᱠᱟᱫ ᱗᱐ ᱜᱚᱴᱟᱝ ᱪᱤᱴᱷᱤ ᱦᱚᱸ ᱢᱮᱱᱟᱜ ᱛᱟᱭᱟ᱾ ᱪᱮ ᱟᱜ ᱚᱞ ᱱᱤᱭᱟᱹ ᱙ ᱠᱷᱚᱱᱰᱚ ᱨᱮᱱᱟᱜ ᱯᱚᱛᱚᱵ ᱱᱤᱛ ᱫᱷᱟᱹᱵᱤᱡ ᱩᱰᱩᱝ ᱟᱠᱟᱱᱟ᱾
This article uses material from the Wikipedia ᱥᱟᱱᱛᱟᱲᱤ article ᱪᱮ ᱜᱮᱵᱷᱟᱨᱟ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.