ᱡᱮᱜᱮᱛ ᱡᱟᱠᱟᱛ ᱥᱟᱱᱛᱟᱲ ᱢᱚᱦᱚᱞ

ᱱᱟᱜᱟᱢ

᱑᱙᱖᱐ ᱥᱟᱞ ᱨᱮ ᱨᱟᱺᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱵᱮᱨᱮᱫ ᱮᱱ ᱥᱟᱶᱛᱮ ᱟᱹᱫᱤᱵᱟᱹᱥᱤ ᱟᱨ ᱴᱚᱴᱷᱟᱨᱤ ᱯᱟᱹᱨᱥᱤ ᱵᱤᱵᱷᱟᱜᱽ (Tribal and Regional language department) ᱵᱮᱨᱮᱫ ᱮᱱᱟ ᱾ ᱚᱱᱟ ᱨᱤᱱᱤᱡ ᱰᱤᱨᱮᱠᱴᱚᱨ ᱫᱚ ᱰᱨ ᱨᱟᱢᱫᱚᱭᱟᱞ ᱢᱩᱱᱰᱟᱹ ᱠᱚ ᱫᱚᱦᱚ ᱠᱮᱫᱮᱭᱟ ᱾ ᱛᱟᱭᱚᱢ ᱛᱮ ᱩᱱᱤ ᱚᱱᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱡᱚᱜᱚ ᱪᱟᱱᱥᱮᱞᱚᱨ ᱦᱚᱸᱭ ᱦᱩᱭ ᱞᱮᱱᱟ ᱾

ᱚᱱᱟ ᱵᱤᱵᱷᱟᱜᱽ ᱨᱮᱭᱟᱜ ᱠᱟᱹᱢᱤ ᱞᱮᱠᱟᱛᱮ ᱮᱴᱟᱜ ᱯᱨᱚᱯᱷᱮᱥᱚᱨ ᱟᱨ ᱜᱟᱶᱛᱟ ᱠᱚ ᱢᱮᱥᱟ ᱠᱟᱛᱮ ᱯᱩᱭᱞᱩ ᱫᱷᱟᱣ ᱡᱟᱹᱛᱤᱭᱟᱹᱨᱤ ᱥᱟᱱᱛᱟᱲ ᱯᱟᱹᱨᱥᱤ ᱟᱨ ᱥᱟᱶᱦᱮᱫ ᱦᱮᱞᱢᱮᱞ ᱠᱚ ᱥᱟᱯᱲᱟᱣ ᱠᱮᱜᱼᱟ ᱮᱞ ᱵᱤ ᱮᱥ ᱮᱢ ᱠᱚᱞᱮᱡᱽ ᱨᱮ ᱾ ᱱᱚᱶᱟ ᱫᱚ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱤᱱᱤᱡ ᱵᱷᱤ ᱥᱤ ᱨᱟᱢᱫᱚᱭᱟᱞ ᱢᱩᱱᱰᱟᱹ ᱟᱰᱤ ᱠᱤᱱ ᱠᱩᱥᱤ ᱟᱫ ᱟ ᱾ ᱫᱤᱜᱟᱢᱵᱚᱨ ᱦᱟᱸᱥᱫᱟᱜ ᱫᱚ ᱚᱱᱟ ᱨᱮᱱᱤᱡ ᱥᱟᱯᱲᱟᱣ ᱪᱮᱭᱟᱨᱢᱮᱱ ᱮ ᱛᱟᱦᱮᱸ ᱠᱟᱱᱟ ᱾ ᱱᱚᱶᱟ ᱡᱟᱹᱛᱤᱭᱟᱹᱨᱤ ᱥᱟᱱᱛᱟᱲ ᱯᱟᱹᱨᱥᱤ ᱟᱨ ᱥᱟᱶᱦᱮᱫ ᱥᱮᱱᱮᱞᱮᱫ ᱠᱷᱚᱱ ᱜᱮ ᱡᱮᱜᱮᱛ ᱡᱟᱠᱟᱛ ᱥᱟᱱᱛᱟᱲ ᱢᱚᱦᱚᱞ ᱵᱮᱨᱮᱫ ᱨᱮᱭᱟᱜ ᱩᱭᱦᱟᱹᱨ ᱫᱚ ᱦᱮᱡᱟᱫ ᱠᱚᱣᱟ ᱾ ᱩᱱᱠᱩ ᱠᱚ ᱵᱟᱰᱟᱭ ᱧᱟᱢ ᱠᱮᱜᱼᱟ ᱡᱮ ᱥᱟᱱᱛᱟᱲ ᱫᱚ ᱥᱤᱧᱚᱛ ᱥᱩᱢᱩᱝ ᱨᱮᱫᱚ ᱵᱟᱹᱱᱩᱜ ᱵᱚᱱᱟ ᱵᱚᱨᱚᱢ ᱱᱮᱯᱟᱞ, ᱵᱟᱝᱞᱟᱫᱮᱥ, ᱵᱷᱩᱴᱟᱱ ᱟᱨ ᱢᱚᱨᱤᱥᱚᱥ ᱮᱢᱟᱱ ᱫᱤᱥᱚᱢ ᱨᱮᱦᱚᱸ ᱢᱮᱱᱟᱜ ᱠᱚᱣᱟ ᱾ ᱱᱚᱶᱟ ᱡᱚᱛᱚ ᱫᱤᱥᱚᱢ ᱨᱤᱱ ᱥᱟᱱᱛᱟᱲ ᱢᱮᱥᱟ ᱠᱟᱛᱮ ᱟᱵᱚᱣᱟᱜ ᱟᱹᱨᱤ ᱪᱟᱹᱞᱤ, ᱨᱟᱭ ᱨᱤᱛ, ᱟᱪᱟᱨ ᱵᱮᱵᱷᱟᱨ, ᱵᱚᱸᱜᱟ ᱵᱩᱨᱩ ᱮᱢᱟᱱ ᱞᱟᱹᱠᱛᱤ ᱠᱟᱱᱟ ᱾

ᱡᱚᱥ ᱟᱨ ᱩᱫᱤᱥ

ᱡᱮᱜᱮᱛ ᱨᱤᱱ ᱡᱚᱛᱚ ᱥᱟᱱᱛᱟᱲ ᱡᱩᱢᱤᱫᱽ ᱠᱚ ᱾
ᱡᱩᱢᱤᱫᱽ ᱛᱟᱦᱮᱸᱱ ᱞᱟᱹᱜᱤᱫ ᱪᱤᱨᱜᱟᱹᱞ ᱠᱚ ᱾
ᱥᱮᱪᱮᱫ, ᱠᱟᱹᱣᱰᱤ ᱟᱹᱨᱤ, ᱥᱟᱶᱛᱟ ᱟᱹᱨᱤ ᱟᱨ ᱦᱚᱲᱢᱚ ᱥᱟᱶᱟᱨ ᱨᱮ ᱜᱚᱲᱚ ᱜᱚᱯᱚᱲᱚ ᱵᱚ ᱛᱟᱦᱮᱸᱱᱟ ᱾
ᱞᱤᱪᱟᱹᱲ ᱠᱚ ᱵᱚ ᱦᱚᱦᱚ ᱟᱨ ᱵᱚ ᱜᱚᱲᱚ ᱟᱠᱚᱣᱟ ᱾
ᱡᱟᱹᱛᱤᱭᱟᱹᱨᱤ ᱟᱨ ᱡᱮᱜᱮᱛ ᱡᱟᱹᱛᱤᱭᱟᱹᱨᱤ ᱢᱤᱫᱩᱱ ᱵᱚ ᱫᱚᱦᱚᱭᱟ ᱚᱸᱰᱮᱱ ᱠᱚ ᱦᱚᱲᱟᱜ ᱟᱱᱟᱴ ᱵᱟᱰᱟᱭ ᱟᱨ ᱥᱟᱦᱟᱭ ᱞᱟᱹᱜᱤᱫ ᱾
ᱟᱵᱚᱣᱟᱜ ᱩᱫᱤᱥ ᱫᱚ UNO's Indigenous peoples forum ᱨᱮ ᱥᱤᱠᱨᱩᱛᱤ ᱧᱟᱢ ᱠᱟᱱᱟ ᱾

ᱥᱮᱱᱮᱞᱮᱫ ᱠᱚ

ᱱᱤᱛ ᱦᱟᱹᱵᱤᱡ ᱛᱮ ᱤᱨᱟᱹᱞ ᱜᱚᱴᱟᱝ ᱥᱮᱱᱮᱞᱮᱫ ᱦᱩᱭ ᱟᱠᱟᱱᱟ, ᱚᱱᱟ ᱠᱚ ᱞᱟᱛᱟᱨ ᱨᱮ ᱚᱞ ᱮᱱᱟ ᱾

ᱯᱩᱭᱞᱩ ᱥᱮᱱᱮᱞᱮᱫ

ᱯᱩᱭᱞᱩ ᱥᱮᱱᱮᱞᱮᱫ ᱑᱙᱙᱑ ᱥᱟᱞ ᱨᱮ ᱫᱤᱥᱚᱢ ᱡᱟᱦᱮᱨ ᱛᱷᱟᱱ ᱠᱚᱨᱚᱱᱰᱤ ᱨᱮ ᱑᱓-᱑᱕ ᱰᱤᱥᱮᱢᱵᱚᱨ ᱦᱟᱹᱵᱤᱡ ᱦᱩᱭ ᱮᱱᱟ ᱾ ᱵᱤᱦᱟᱨ ᱨᱤᱱᱤᱡ ᱩᱱᱡᱷᱚᱜᱤᱡ ᱢᱩᱬᱩᱛ ᱢᱚᱱᱛᱨᱤ ᱢᱟᱹᱱ ᱞᱟᱞᱩ ᱯᱨᱚᱥᱟᱫᱽ ᱭᱟᱫᱚᱵᱽ ᱩᱰᱷᱟᱹᱣ ᱟᱠᱷᱲᱟ ᱨᱮᱭ ᱥᱮᱞᱮᱫ ᱞᱮᱱᱟ ᱾

ᱫᱚᱥᱟᱨ ᱥᱮᱱᱮᱞᱮᱫ

ᱯᱩᱭᱞᱩ ᱥᱮᱱᱮᱞᱮᱫ ᱥᱟᱹᱛᱮᱱ ᱛᱟᱭᱚᱢ ᱟᱹᱰᱤ ᱨᱟᱹᱥᱠᱟᱹ ᱛᱮ ᱥᱚᱦᱮᱫ ᱠᱚ ᱫᱚᱥᱟᱨ ᱥᱮᱱᱮᱞᱮᱫ ᱱᱮᱯᱟᱞ ᱫᱤᱥᱮᱢ ᱨᱮᱠᱚ ᱫᱚᱦᱚ ᱠᱮᱜᱼᱟ ᱾ ᱱᱚᱣᱟ ᱫᱚ ᱑᱓ ᱟᱨ ᱑᱔ ᱢᱟᱨᱪ ᱑᱙᱙᱓ ᱥᱟᱞ ᱨᱮ ᱡᱷᱟᱯᱟ ᱦᱚᱱᱚᱛ ᱨᱮᱭᱟᱜ ᱪᱚᱸᱫᱽᱨᱚᱜᱤᱨᱤ ᱨᱮ ᱦᱩᱭ ᱞᱮᱱᱟ ᱾

ᱛᱮᱥᱟᱨ ᱥᱮᱱᱮᱞᱮᱫ

ᱛᱮᱥᱟᱨ ᱥᱮᱱᱮᱞᱮᱫ ᱫᱚ ᱥᱤᱧᱚᱛ ᱫᱤᱥᱚᱢ ᱨᱮᱭᱟᱜ ᱨᱟᱡᱽᱜᱟᱲ ᱱᱟᱶᱟ ᱫᱤᱞᱞᱤ ᱨᱮ ᱑᱔ ᱟᱨ ᱑᱕ ᱚᱠᱴᱚᱵᱚᱨ ᱑᱙᱙᱕ ᱥᱟᱞ ᱨᱮ ᱥᱟᱯᱲᱟᱣ ᱞᱮᱱᱟ ᱾ ᱱᱚᱶᱟ ᱥᱮᱱᱮᱞᱮᱫ ᱨᱮᱫᱚ ᱢᱟᱨᱟᱝ ᱯᱮᱲᱟ ᱞᱮᱠᱟᱛᱮ ᱫᱤᱥᱚᱢ ᱫᱚᱨᱵᱟᱨᱤᱭᱟᱹ ᱢᱟᱱᱚᱛᱟᱱ ᱥᱤᱵᱩ ᱥᱚᱨᱮᱱ ᱥᱮᱴᱮᱨ ᱮ ᱛᱟᱦᱮᱸ ᱠᱟᱱᱟ ᱾

ᱯᱩᱱᱟᱜ ᱥᱮᱱᱮᱞᱮᱫ

ᱯᱩᱱᱟᱜ ᱥᱮᱱᱮᱞᱮᱫ ᱫᱚ ᱟᱹᱰᱤ ᱥᱮᱨᱢᱟ ᱛᱟᱭᱚᱢ ᱒᱐ ᱠᱷᱚᱱ ᱒᱒ ᱰᱤᱥᱮᱢᱵᱚᱨ ᱒᱐᱐᱘ ᱥᱟᱞ ᱨᱮ ᱴᱟᱴᱟ ᱚᱰᱤᱴᱚᱨᱤᱭᱚᱢ ᱡᱟᱢᱥᱮᱫᱽᱯᱩᱨ ᱨᱮ ᱦᱩᱭ ᱞᱮᱱᱟ ᱾ ᱱᱚᱶᱟ ᱥᱮᱱᱮᱞᱮᱫ ᱨᱮᱫᱚ ᱡᱷᱟᱨᱠᱷᱚᱸᱰ ᱨᱮᱱᱤᱡ ᱢᱩᱬᱩᱛ ᱢᱚᱱᱛᱨᱤ ᱢᱟᱱᱚᱛᱟᱱ ᱥᱤᱵᱩ ᱥᱚᱨᱮᱱ, ᱟᱥᱟᱢ ᱵᱤᱫᱷᱟᱱᱥᱚᱵᱷᱟ ᱨᱮᱱᱤᱡ ᱰᱮᱯᱩᱴᱤ ᱥᱯᱤᱠᱟᱨ ᱢᱟᱱᱚᱛᱟᱱ ᱯᱨᱤᱛᱷᱤᱵᱤ ᱢᱟᱹᱡᱷᱤ, ᱱᱮᱯᱟᱞ ᱫᱤᱥᱚᱢ ᱨᱮᱱᱤᱡ ᱫᱤᱥᱚᱢ ᱫᱚᱨᱵᱟᱨᱤᱭᱟ (MP) ᱢᱟᱱᱚᱛᱤᱭᱟᱹ ᱡᱚᱵᱟ ᱥᱚᱨᱮᱱ ᱟᱨ ᱤᱝᱞᱮᱱᱰ ᱠᱷᱚᱱ ᱰᱟᱠᱛᱚᱨ ᱫᱷᱩᱱᱤ ᱥᱚᱨᱮᱱ ᱥᱟᱶ ᱛᱮ ᱟᱨᱦᱚᱸ ᱟᱹᱰᱤ ᱟᱭᱢᱟ ᱢᱟᱹᱱᱟᱱ ᱦᱚᱲ ᱥᱮᱞᱮᱫ ᱠᱚ ᱛᱟᱦᱮᱸ ᱠᱟᱱᱟ ᱾

ᱢᱚᱬᱮᱭᱟᱜ ᱥᱮᱱᱮᱞᱮᱫ

ᱢᱚᱬᱮᱭᱟᱜ ᱥᱮᱱᱮᱞᱮᱫ ᱫᱚ ᱱᱮᱯᱟᱞ ᱫᱤᱥᱚᱢ ᱨᱮᱭᱟᱜ ᱢᱚᱨᱚᱝ ᱦᱚᱱᱚᱛ ᱨᱮᱭᱟᱜ ᱵᱤᱨᱟᱴ ᱨᱮ ᱒᱓-᱒᱔ ᱮᱯᱨᱤᱞ ᱒᱐᱑᱐ ᱥᱟᱞ ᱨᱮ ᱥᱟᱯᱲᱟᱣ ᱞᱮᱱᱟ ᱾ ᱱᱚᱶᱟ ᱨᱮᱫᱚ ᱥᱟᱥᱟᱯᱲᱟᱣᱤᱡ ᱮ ᱛᱟᱦᱮᱸ ᱠᱟᱱᱟ ᱟᱥᱟᱢ ᱥᱚᱨᱠᱟᱨ ᱨᱮᱱᱤᱡ ᱠᱮᱵᱤᱱᱮᱴ ᱢᱚᱱᱛᱨᱤ ᱢᱟᱱᱚᱛᱟᱱ ᱯᱨᱤᱛᱷᱤᱵᱤ ᱢᱟᱹᱡᱷᱤ ᱾ ᱜᱟᱞᱚᱪᱤᱭᱟᱹ ᱞᱮᱠᱟᱛᱮ ᱠᱚ ᱛᱟᱦᱮᱸ ᱠᱟᱱᱟ ᱳᱰᱤᱥᱟ ᱯᱚᱱᱚᱛ ᱫᱚᱨᱵᱟᱨᱤᱭᱟᱹ (MLA) ᱢᱟᱱᱚᱛᱟᱱ ᱨᱟᱢᱪᱚᱸᱫᱽᱨᱚ ᱦᱟᱸᱥᱫᱟᱜ, ᱵᱤᱦᱟᱨ ᱨᱤᱱᱤᱡ ᱟᱭᱟᱨ ᱮᱢ ᱮᱞ ᱮ ᱢᱟᱱᱚᱛᱟᱱ ᱥᱩᱨᱡᱚ ᱥᱤᱝ ᱵᱮᱥᱨᱟ ᱟᱨ ᱫᱷᱩᱱᱤ ᱥᱚᱨᱮᱱ ᱾

ᱛᱩᱨᱩᱭᱟᱜ ᱥᱮᱱᱮᱞᱮᱫ

ᱛᱩᱨᱩᱭᱟᱜ ᱥᱮᱱᱮᱞᱮᱫ ᱫᱚ ᱢᱟᱭᱠᱮᱞ ᱡᱚᱱ ᱚᱰᱤᱴᱚᱨᱤᱭᱚᱢ ᱵᱤᱥᱴᱩᱯᱩᱨ ᱡᱟᱢᱥᱮᱫᱽᱯᱩᱨ ᱨᱮ ᱑᱙-᱒᱐ ᱚᱠᱴᱚᱵᱚᱨ ᱒᱐᱑᱓ ᱥᱟᱞ ᱨᱮ ᱦᱩᱭ ᱞᱮᱱᱟ ᱾ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱱᱤᱡ ᱢᱩᱬᱩᱛ ᱢᱚᱱᱛᱨᱤ ᱢᱟᱱᱚᱛᱟᱱ ᱦᱮᱢᱚᱱᱛ ᱥᱚᱨᱮᱱ ᱢᱩᱠᱷᱤᱭᱟᱹ ᱯᱮᱲᱟ ᱞᱮᱠᱟ ᱛᱮᱭ ᱥᱮᱞᱮᱫ ᱞᱮᱱᱟ ᱾

ᱮᱭᱟᱭᱟᱜ ᱥᱮᱱᱮᱞᱮᱫ

ᱮᱭᱟᱟᱜ ᱥᱮᱱᱮᱞᱮᱫ ᱫᱚ ᱵᱷᱚᱸᱡᱽ ᱵᱷᱚᱵᱚᱱ ᱨᱟᱣᱨᱠᱮᱞᱟ ᱳᱰᱤᱥᱟ ᱯᱚᱱᱚᱛ ᱨᱮ ᱐᱕ ᱐᱖ ᱰᱤᱥᱮᱢᱵᱚᱨ ᱒᱐᱑᱕ ᱥᱟᱞ ᱨᱮ ᱥᱟᱯᱲᱟᱣ ᱞᱮᱱᱟ ᱾

ᱤᱨᱟᱹᱞᱟᱜ ᱥᱮᱱᱮᱞᱮᱫ

ᱤᱨᱟᱹᱞᱟᱜ ᱥᱮᱱᱮᱞᱮᱫ ᱫᱚ ᱥᱤᱧᱚᱛ ᱫᱤᱥᱚᱢ ᱨᱮᱭᱟᱜ ᱟᱥᱟᱢ ᱯᱚᱱᱚᱛ ᱨᱮ ᱥᱟᱯᱲᱟᱣ ᱞᱮᱱᱟ ᱾

ᱥᱟᱹᱠᱷᱭᱟᱹᱛ

ᱵᱟᱦᱨᱮ ᱡᱚᱱᱚᱲ

This article uses material from the Wikipedia ᱥᱟᱱᱛᱟᱲᱤ article ᱡᱮᱜᱮᱛ ᱡᱟᱠᱟᱛ ᱥᱟᱱᱛᱟᱲ ᱢᱚᱦᱚᱞ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.