ᱢᱚᱭᱩᱨᱵᱷᱚᱸᱡᱽ ᱡᱤᱞᱞᱟᱹ ᱨᱮᱱᱟᱜ ᱯᱚᱨᱚᱢᱯᱚᱨᱟ ᱢᱩᱸᱫᱽ ᱠᱷᱚᱱ ᱥᱤᱢ ᱛᱩᱯᱩᱫ ᱫᱚ ᱟᱹᱰᱤ ᱧᱩᱛᱩᱢᱟᱱᱟ ᱾ ᱵᱟᱹᱲᱛᱤ ᱠᱟᱛᱮ ᱵᱤᱨᱵᱩᱨᱩ ᱛᱮ ᱮᱥᱮᱫ ᱟᱠᱟᱱ ᱮᱛᱚᱢ ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱟᱹᱛᱩ ᱠᱚᱨᱮ ᱥᱤᱢ ᱛᱩᱯᱩᱫ ᱫᱚ ᱟᱹᱰᱤ ᱥᱚᱠᱛᱚ ᱧᱮᱞᱚᱜ-ᱟ ᱾ ᱱᱚᱶᱟ ᱠᱚ ᱮᱞᱟᱠᱟ ᱨᱮ ᱫᱚ ᱦᱟᱯᱛᱟ ᱦᱟᱴ ᱠᱚᱨᱮ ᱦᱚᱸ ᱯᱟᱲᱟ ᱴᱟᱺᱰᱤ ᱛᱟᱦᱮᱸᱱᱟ ᱾ ᱡᱟᱦᱟᱸ ᱫᱚ ᱥᱤᱢ ᱯᱟᱲᱟ ᱦᱚᱸ ᱠᱚ ᱢᱮᱛᱟᱜ ᱠᱟᱱᱟ ᱾ ᱱᱚᱶᱟ ᱵᱮᱜᱚᱨ ᱥᱮᱨᱢᱟᱠᱤᱭᱟᱹ ᱮᱱᱮᱡ ᱥᱮᱨᱮᱧ ᱦᱮᱯᱨᱟᱣ ᱟᱨ ᱯᱟᱨᱟᱵᱽ ᱯᱩᱱᱟᱹᱭ ᱠᱚ ᱨᱮ ᱥᱤᱢ ᱛᱩᱯᱩᱫ ᱫᱚ ᱦᱩᱭᱩᱜ-ᱟ ᱾ ᱟᱭᱢᱟ ᱴᱚᱴᱷᱟ ᱠᱷᱚᱱ ᱦᱚᱲ ᱥᱟᱺᱰᱤ ᱥᱤᱢ ᱥᱟᱵ ᱠᱟᱛᱮ ᱠᱚ ᱦᱤᱡᱩᱜ-ᱟ ᱟᱨ ᱠᱩ ᱛᱩᱯᱩᱫ ᱠᱚᱣᱟ ᱾ ᱟᱭᱢᱟ ᱧᱮᱧᱮᱞᱤᱭᱟᱹ ᱠᱚ ᱦᱚᱸ ᱱᱚᱸᱰᱮ ᱵᱟᱹᱡᱤ ᱥᱟᱵ ᱞᱟᱹᱜᱤᱫ ᱠᱚ ᱜᱷᱮᱨᱟᱣ ᱠᱟᱜ-ᱟ ᱾ ᱱᱚᱶᱟ ᱥᱩᱨ ᱨᱮ ᱦᱟᱹᱰᱤ ᱠᱚ ᱦᱚᱸ ᱟᱹᱰᱤ ᱩᱥᱛᱟᱹᱭ ᱠᱚ ᱦᱟᱴ ᱠᱟᱜ-ᱟ, ᱦᱟᱺᱰᱤ ᱧᱩ ᱠᱟᱛᱮ ᱟᱨ ᱵᱟᱹᱡᱤ ᱥᱟᱵ ᱠᱟᱛᱮ ᱟᱭᱢᱟ ᱦᱚᱲ ᱟᱠᱚᱣᱟᱜ ᱫᱷᱚᱱ ᱥᱚᱢᱯᱩᱛᱤ ᱫᱚ ᱠᱚ ᱵᱩᱰᱟᱹᱣ ᱪᱟᱵᱟᱭᱮᱜ-ᱟ ᱾ ᱛᱩᱯᱩᱫ ᱥᱟᱺᱰᱤ ᱨᱮᱱᱟᱜ ᱜᱚᱱᱚᱝ ᱫᱚ ᱥᱟᱫᱷᱟᱨᱚᱱ ᱥᱤᱢ ᱠᱚᱨᱮᱱᱟᱜ ᱜᱚᱱᱚᱝ ᱠᱷᱚᱱ ᱯᱩᱱ ᱢᱚᱬᱮ ᱜᱩᱬ ᱵᱟᱹᱲᱛᱤ ᱠᱚ ᱜᱚᱱᱚᱝᱚᱜ ᱠᱟᱱᱟ ᱾
ᱢᱤᱫ ᱢᱟᱨᱟᱝ ᱰᱟᱹᱦᱤ ᱨᱮ ᱢᱟᱫ ᱡᱟᱹᱱᱩᱢ ᱠᱚ ᱛᱮ ᱯᱩᱱ ᱠᱚᱬ ᱠᱚ ᱡᱷᱟᱹᱱᱴᱤ ᱮᱴᱮᱫ ᱠᱟᱜ-ᱟ ᱟᱨ ᱚᱰᱚᱠ ᱵᱚᱞᱚᱱ ᱦᱚᱨ ᱦᱚᱸ ᱛᱟᱦᱮᱸᱱᱟ ᱾ ᱵᱷᱤᱛᱨᱟᱹ ᱨᱮᱱᱟᱜ ᱴᱷᱟᱶ ᱫᱚ ᱥᱤᱢ ᱛᱩᱯᱩᱫ ᱠᱚ ᱞᱟᱹᱜᱤᱫ, ᱡᱟᱦᱟᱸ ᱫᱚ ᱯᱟᱲᱟ ᱢᱮᱱᱛᱮ ᱠᱚ ᱢᱮᱛᱟᱜ ᱠᱟᱱᱟ ᱾ ᱟᱯᱱᱟᱨᱤᱡ ᱛᱩᱯᱩᱫ ᱥᱟᱺᱰᱤ ᱭᱤᱡ ᱡᱚᱲ ᱧᱟᱢ ᱠᱟᱛᱮ ᱠᱟᱺᱛᱠᱟᱹᱨ ᱫᱚ ᱥᱤᱢ ᱠᱟᱹᱛ ᱮ ᱛᱚᱞ ᱟᱠᱚᱣᱟ ᱾ ᱥᱟᱺᱰᱤ ᱥᱟᱵ ᱠᱟᱛᱮ ᱯᱟᱲᱟ ᱵᱷᱤᱛᱤᱨ ᱛᱮ ᱠᱚ ᱵᱚᱞᱚᱱᱟ ᱟᱨ ᱥᱟᱢᱟᱝ ᱯᱟᱦᱴᱟ ᱨᱤᱱᱤᱡ ᱠᱟᱺᱛᱠᱟᱨ ᱥᱤᱢ ᱥᱟᱵ ᱠᱟᱛᱮ ᱜᱮᱡ ᱞᱮᱱ ᱠᱷᱟᱱ ᱛᱤᱢᱤᱱ ᱜᱷᱟᱹᱲᱤᱠ ᱨᱟᱹᱯᱟᱹᱜᱤ ᱚᱪᱚ ᱧᱚᱜ ᱠᱟᱛᱮ ᱠᱚ ᱟᱲᱟᱜ ᱜᱚᱫ ᱠᱟᱠᱚᱣᱟ ᱾ ᱱᱚᱶᱟ ᱚᱠᱛᱚ ᱨᱮ ᱵᱟᱨᱦᱮ ᱨᱤᱱ ᱦᱚᱲ ᱫᱚ ᱵᱟᱹᱡᱤ ᱠᱚ ᱥᱟᱵᱟ ᱾ ᱱᱤᱡᱚᱨ ᱯᱟᱴᱷᱟ ᱨᱤᱱᱤᱡ ᱥᱤᱢ ᱟᱜ ᱨᱚᱝ ᱤᱫᱤ ᱠᱟᱛᱮ ᱠᱚ ᱠᱚ ᱠᱟᱞᱠᱟᱞᱟᱣᱜ-ᱟ ᱟᱨ ᱛᱩᱯᱩᱫ ᱨᱮᱱᱟᱜ ᱚᱨᱡᱚ ᱞᱟᱹᱜᱤᱫ ᱛᱟᱺᱜᱤ ᱠᱚ ᱛᱟᱦᱮᱸᱱᱟ ᱾ ᱥᱟᱺᱰᱤ ᱠᱚ ᱛᱩᱯᱩᱫ ᱛᱮ ᱟᱹᱰᱤ ᱡᱩᱨ ᱠᱚ ᱢᱟᱭᱟᱢᱚᱜ-ᱟ ᱠᱟᱹᱛ ᱛᱮ ᱵᱟᱡᱟᱣ ᱠᱟᱛᱮ ᱟᱨ ᱛᱤᱢᱤᱱ ᱫᱚ ᱠᱚ ᱜᱩᱡᱩᱜ-ᱟ ᱟᱨ ᱛᱤᱢᱤᱱ ᱫᱚ ᱫᱟᱹᱲ ᱚᱰᱚᱠᱚᱜ-ᱟ ᱾ ᱦᱟᱨᱟᱣᱩᱡ ᱥᱟᱺᱰᱤ ᱫᱚ ᱯᱟᱹᱰᱩ ᱠᱚ ᱢᱮᱛᱟ ᱠᱚᱣᱟ ᱟᱨ ᱡᱤᱛᱟᱹᱣ ᱟᱠᱟᱱ ᱥᱟᱺᱰᱤ ᱜᱚ ᱡᱤᱛᱠᱟᱹᱨ ᱠᱚ ᱢᱮᱛᱟ ᱠᱚᱣᱟ ᱾ ᱡᱤᱛᱠᱟᱹᱨ ᱥᱟᱺᱰᱤ ᱨᱤᱱᱤᱡ ᱢᱟᱹᱞᱤᱠ ᱴᱷᱮᱱ ᱯᱟᱹᱰᱩ ᱫᱚ ᱠᱚ ᱪᱟᱞ ᱟᱭᱟ ᱾
Humane Society Cockfighting factsheet Archived ᱒᱐᱐᱙-᱐᱙-᱑᱓ at the Wayback Machine.
This article uses material from the Wikipedia ᱥᱟᱱᱛᱟᱲᱤ article ᱥᱤᱢ ᱛᱩᱯᱩᱫ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.