Лазурівка

• Довжка тїла: 11-13 cm
• Роспятя крыл: 20 цм
• Вага: 11 ґ

Їй шпеціфічнов ознаков, котра єй одрїзнять од подобной звычайной синицї, є синє тимя головы і тмава смуга через очі і спідню часть горла. Чоло і лиця мать білы, затылок, крыла і хвостовы пірка синї, хырбет жовткасто зеленый, бріхова часть тїла є сирово жовта з узков чорнов смужков, ногы синяво сивы і фарба оч тмаво бура. Молоды синицї суть наперед сивы із світло синєм надыхом на крижах, пізнїше здобывають выразне жовтїше зафарблїня як їх родічі.

Лазурівка є сталый вид. Жыє в листяных і змішаных лїсах, парках, алейах, загородах, але і в сентрах векшых міст. На зиму творить змішаны ґрупы а тыж як другы виды синицї вынимать ся і тот вид незвычайнов чіперностёв і велёраз під час гляданя стравы вісить долов головов. Неприязны хвилї перебывать скрыта в невеликій ямцї в земли. Лазурівка ся найчастїше озывать выразным „ті-ті-ті“, як варовный звук хоснує выразне „чіір“.

В природї ся звычайно дожывать 1,5 рока.

Страва

Лазурівка належыть міджі цїнных пожерачів рослиновых шкодцїв, як суть наприклад гусеніцї мотыля, вшелиякы мушкы, хоць на ярь любить обжерати і молоды квітя листяных стромів або різне насїня, особливо пак сонячніцёвы. В зимушнім часї собі страву рада спестрить бурьскыма орїшками або шмальцём в сітьцї.

Розмножованя

Гнїздить в дуплах стромів або в деревяных будьках завішеных на стромах а до свого гнїзда ся вертать каждый рік.

 

Як є їй гнїздо огрожене, зъїжыть хохолку на голові, зачне сычати і до предатора неогрожено клювати. Гнїздо собі будує звычайно з мохів, піря або різной травы а єдну аж дві зношкы яєць кладе міджі апрілём і маём. Єдна зношка бывать в порївнаню з іншыма співаками дуже богата і обычайно рахує сїм аж дванадцять білых, червенкасто флякастых яєць.

Саміця на яйцях сидить 12-14 днїв.

 

Молодята опущають гнїздо по 17-18 днях жывота.

 

 

 

Лазурівку першыраз описав Карл Лінней в роцї 1758 в своїм дїлї Systema naturae (Сістема природы) під науковым іменом Parus caerulaus.

Розознаваме у нёй дакілько підвидів:

• Cyanistes caeruleus caeruleus - векшына ареалу виду в Европі.
• C. caeruleus obscurus - брітаньскы островы.
• C. caeruleus balearicus - Балеары.
• C. caeruleus ogliastrae - Піренейскый півостров, Корзіка, Сардінія, южна Ґреція і Крета.
• C. caeruleus orientalis - область міджі Волґов і Уралом.
• C. caeruleus satunini - Крім, Кавказ.
• C. caeruleus calamensis - Ґреція.
• C. caeruleus raddei - Іран.
• C. caeruleus persicus - Іран.
• C. caeruleus teneriffae - остров Тенеріфе (Канарьскы островы).
• C. caeruleus ultramarinus - северна Африка.
• C. caeruleus cyrenaicae - Лібія.
• C. caeruleus degener - Канарьскы островы - часто триманый як самостоячій вид.
• C. caeruleus ombriosus - Канарьскы островы - часто триманый як самостоячій вид.
• C. caeruleus palmensis - Канарьскы островы (остров Ла Палма) - часто триманый як самостоячій вид.

 

Вікісклад має мултімедіалны дата на тему:

Лазурівка

Тоты даны суть часточно або цалком основаны на перекладї статї Sýkora modřinka на чеській Вікіпедії.