Бравнова Универзита

Сема найстарша универзита США

Бравнова универзита
Brown University англ.
лат. Universitas Brunensis
Гесло	In Deo Speramus лат. In God We Hope англ. Бог нам поможе русин.
Первоназва	Коледж Род Айленда
Заложена	1764
Тип	приватна
Факулты	80+
Штуденты	7 043
Ашпиранты	2 629
Професоры	816
Сѣдлиско	Провиденс, Род Айленд, США Providence, RI 02912, USA
Веб-сайт	https://www.brown.edu
Бравнова универзита на Викискладѣ

Бравнова универзита, закладена в року 1764 яко Коледж Род Айленда и плантаций в Провиденсу, е сема найстарша высока школа в Споеных штатах и една зоз девятьох колониалных универзит, котры екзистовали на територии будучых США еще до взнику той державы. Една з восьмох елитных универзит США, што суть познаты як Давна Восѣмка або Блющова лига.

Днешня назва универзиты походить од ей закладательох, родины Бравн: Николаса Бравна, его сына Николаса Бравна мл., Джона, Йозефа и Мозеса Бравнох. 8. септембра 1803 справча Корпорация коледжа официално рѣшила, же особа, котра пожертвуе на коледж $5 000 буде мати право дати назву высшой школѣ. 6. септембра 1804 Николас Бравн мл. даровав коледжу потребну суму и одтогды на его честь надале коледж называть ся Бравнова универзита.

Зоз Бравновов универзитов по рок 2016 звязаны семеро Нобеловы лавреаты.

В США не екзистуе едина система вступу. Векшина высшых школ, меджи нима и Бравнова универзита, мать свои властны критерии. В найвецей престижных америцкых высокых школах число приятых е ниже як 10% од подавшых жадость. До той категории належить и Бравнова универзита, де од року 2015 тот процент стабилно ся знижать, а в року 2019 досяг 6,6%, а на найпопуларнѣйшый фах медика — 2,9%, з чим ся Бравнова универзита умѣстила на пяту позицию в США.

• Меджи абсолвентами Бравновой универзиты на рок 2014 были восьмеро милиардарѣ.
• Од року 1991 на универзитѣ выучуе политологию професор Сергей Хрущов, сын Никиты Хрущова, совѣтского найвысшого штатника з рокох 1953–1964.
• Абсолвентом Бравновой универзиты быв Джон Ф. Кеннеди мл., сын президента США Джона Ф. Кеннеди з рокох 1961–1963.

• Walter C. Bronson (1914). The History of Brown University, 1764–1914. Providence.
• Brown: Official website (по англицкы). https://www.brown.edu/. [перевірено 2019-08-30]. 
• Encyclopedia Brunoniana | Bicentennial celebration (по англицкы). Brown University. https://www.brown.edu/Administration/News_Bureau/Databases/Encyclopedia/search.php?serial=B0180. [перевірено 2019-08-30].