عبرانی بائبل (Hebrew Bible جاں Hebrew Scriptures) (لاطینی: Biblia Hebraica) بائبل دے علما دی جانب توں تنک (عبرانی: תנך) دے لئی استعمال کیتی جانے والی اصطلاح اے۔
عبرانی بائبل دے موجودہ نسخیاں دا شمار دو ہزار توں زیادہ اے۔ ایہ نسخہ جات مختلف اشیاء اُتے لکھے نیں تے مختلف حالتاں وچ محفوظ نیں۔ کوئی نسخہ چنگی حالت وچ اے کوئی بُری حالت وچ، کوئی پھٹا ہویا اے، کسے دے الفاظ بمشکل نظر آندے نیں۔ تے کوئی ایسا اے کہ گویا حالے لکھیا گیا اے۔ ایہ نسخے مختلف ملکاں توں دستیاب ہوئے نیں۔ مثلاً ملک کنعان توں تے بابل دی سرزمین، مغربی ایشیا، براعظم افریقہ، بحر ہند دے جزائر توں، غیر یہود دے کتب خانیاں توں، اطالیہ تے ہسپانیہ دے ملکاں توں چین تے مالابار (ہندوستان) دے یہودی ربیاں توں تے کتبِ مقدسہ دے مدفون توں (جتھے اہل یہود انہاں نوں دفن کر دیندے سن) ایہ نسخہ جات دورِ حاضرہ وچ دستیاب ہوئے نیں۔
ایہ تمام نسخہ جات جو دوَرِ حاضرہ وچ دستیاب ہوئے نیں تقریباً لفظ بلفظ تے حرف بحرف اک دوسرے نال ملدے نیں۔ تے شاذونادر انہاں دو ہزار نسخہ جات وچ (جو مختلف ملکاں توں ملے نیں تے مختلف زمانیاں وچ مختلف کاتباں دے ہتھوں لکھے گئے نیں) کوئی اختلاف اساں نوں نئیں ملدا، ایتھے تک کہ اگر کسے کاتب نے کسے لفظ اُتے کسے خاص وجہ توں کوئی نشان لگا دتا تے بعد دے کاتباں نے اس نشان نوں وی نقل کر دتا اے۔ مثلاً پیدائش 33: 4 وچ اے ۔" عیسو اس نوں (یعنی یعقوب نوں) ملنے دوڑا تے اسے گلے لایا تے اس دی دھون نال لپٹیا تے اسنوں چوما۔" قدیم زمانہ وچ کسے کاتب نے الفاظ "تے اسنوں چوما" اُتے نقطے لگادتے تے یاں لکھ دتا "اسنوں چوما ۔" بعد دے کاتباں نے ایسی صحت دے نال اس نسخہ نوں نقل کیتا کہ اج تک ساڈی عبرانی بائبل وچ انہاں الفاظ اُتے نقطے چھاپے جاندے نیں۔ تے کوئی نئیں جاندا کہ انہاں لفظاں دا کیہ مطلب اے۔ اک یہودی ربی دا قول اے، کہ عیسو نے یعقوب نوں چومتے وقت دنداں نال کٹیا سی تے ایہ نقطے اس دے دنداں دے نشان ظاہر کر دے نیں! بہر حال ایہ دو ہزار نسخے اس قدر صحت دے نال نقل کیتے گئے نیں کہ انہاں دے نقطے تے شوشے وی اک دوسرے نال ملدے نیں۔
ایہ دو ہزار نسخہ جات تقریباً اک ہزار سال توں زیادہ پرانے نئیں نیں۔ اس امر وچ عہدِ جدید دی کتب دے نسخیاں نوں فوقیت حاصل اے، کیونجے انجیلی مجموعہ دے نسخے تاحال دوسری صدی دے دستیاب ہوئے نیں۔ لیکن عہد عتیق دی قدیم کتاباں قریباً تن ہزار سال ہوئے لکھی گئی سن۔ انہاں دے نسخے جو ساڈے کول موجود نیں، صرف اک ہزار سال پرانے نیں۔ انہاں وچ سب توں قدیم نسخہ تورات دی پنج کتاباں دا اے جو برطانیہ دے عجائب خانہ وچ محفوظ اے۔ لینن گراڈ وچ کتُب ِ انبیا دا اک نسخہ اے جس دی تریخ 916ء تبث اے۔ آکسفورڈ وچ وی اک نسخہ موجود اے جس وچ عبرانی کتُب مقدسہ دی تقریباً تمام کتاباں لکھی نیں۔ ایہ نسخہ دسویں صدی دا اے۔ پس عہد عتیق دی آخری کتاب دی تریخ تصنیف تے انہاں قدیم نسخیاں وچ قریباً اک ہزار سال دا وقفہ اے۔
مذکورہ بالا تے ہور وجوہ دے باعث ساڈے کول کتُب عہد عتیق دے پرانے نسخے موجود نئیں نیں تے جو موجود وی نیں اوہ تقریباً سب دے سب جاں تے غیر اقوام دے دار العلوم تے کتُب خانیاں توں جاں انہاں یہودی دفن گاہاں توں دستیاب ہوئے نیں۔
حال ای وچ خبر ملی اے کہ عبرانی دا اک قدیم ترین نسخہ حیدرآباد (دکن۔ واقع ہندوستان) توں دستیاب ہویا اے جو کھجور دے پتیاں (Palm Leaves) اُتے لکھیا اے۔ ایہ نسخہ عثمانیہ یونیورسٹی دی سنسکرت اکاڈیمی وچ سالہا سال توں محفوظ سی۔ اس نسخہ اُتے تورات دی پہلی کتاب پیدائش دا 37واں باب عبرانی وچ لکھیا اے۔
یروشلیم دی عبرانی اکاڈیمی دے فضلا اس نادر نسخہ دی جانچ پڑتال کر رہے نیں۔ ایسا معلوم ہُندا اے کہ ایہ نسخہ کسے یہودی عالم نے دوہزارسال ہوئے لکھیا سی جدوں یروشلیم دی تباہی دے بعد اہل یہود جنوبی ہند نقل مکانی کرکے آ گئے سن۔ ایہ نسخہ اس لحاظ توں وی یکتا اے کہ دنیا بھر دے نسخیاں وچ ایہی اک نسخہ اے جو کھجور دے پتیاں اُتے لکھیا اے۔
This article uses material from the Wikipedia شاہ مکھی پنجابی (Shāhmukhī Pañjābī) article عبرانی بائبل, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). لکھت CC BY-SA 4.0 لسنس تھلے ہیگا اے۔ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki شاہ مکھی پنجابی (Shāhmukhī Pañjābī) (DUHOCTRUNGQUOC.VN) is an independent company and has no affiliation with Wiki Foundation.