ظفر اقبال (جم: 27 ستمبر، 1932ء) پنجاب پاکستان دے مشہور پنجابی تے اردو شاعر تے کالم لکھاری نیں ۔ اوہناں دے پُتر آفتاب اقبال مشہور ٹیلی وژن اینکر ، سوجھواݨ ، کالم لکھاری تے صحافی نیں ۔
ظفر اقبال | |
---|---|
جم | ظفر اقبال 27 سپتامبر 1933 (عمر: ۹۰ سال) بہاول نگر، پنجاب |
قلمی ناں | ظفر |
کم کِتہ | شاعر، کالم نگار |
بولی | پنجابی |
قومیت | پاکستانی |
نسل | پنجابی |
تعلیم | بی اے، ایل ایل بی |
مادر علمی | گورنمنٹ کالج لہور پنجاب یونیورسٹی |
صنف | غزل، نظم، کالم |
وڈے کم | ہرے ہنھیرے پنڈوکڑی تے ہور لِکھتاں |
وڈے اعزاز | پرائڈ آف پرفارمنس |
نیانے | آفتاب اقبال، جنید اقبال |
ظفر اقبال 27 ستمبر 1932ء نوں بہاول نگر، پنجاب وچ پیدا ہوئے ۔ اوہناں دے والد پنڈ چک نمبر 49/3R ضلع اوکاڑا دے اک معزز زمیندار سن ۔
ظفر اقبال نے مُڈھلی پڑھائی بہاول نگر توں ای کیتی تے میٹرک ایم سی ہائی سکول اوکاڑا توں 1950 وچ کیتا ۔ انٹرمیڈیئٹ ایف سی کالج لہور تے گریجوئیشن گورنمنٹ کالج لہور توں کیتی ۔ ظفر اقبال نے ایل ایل بی دا امتحان لاء کالج پنجاب یونیورسٹی توں پاس کیتا ۔
وکالت دا امتحان پاس کرن مگروں اوہناں نے اوکاڑا کچہری وچ پریکٹس شروع کر دِتی ۔ اوہ اک وار اوکاڑا بار ایسوسی ایشن دے صدر بݨے ۔ پہلاں اوہناں نے اوکاڑے فیر لہور وچ 2003 تک بحیثیت اٹارنی پریکٹس کیتی ۔
ظفر اقبال دے وکھو وکھ اخباراں وچ 'دال دلیا' دے سرلیکھ ہیٹھ چھپݨ آلے کالم اپݨے پڑھݨہاراں دا کُھلا پسار رکھدے نیں ۔ ظفر اقبال دو وار اوکاڑا پریس کلب دے صدر رہ چکے نیں ۔
ظفر اقبال اک مشہور پنجابی تے اردو شاعر نیں ۔ پرائمری سکولنگ ویلے ای اوہناں دا دھیان تے رجحان شاعری ول ہوگیا سی ۔ اوہناں دے استاد نور احمد انجم قریشی آپ وی شاعر سن تے پڑھیار نیاݨےآں نوں وی املاء دے طور تے شعر لکھ کے دیندے سی ۔ شفیق الرحمان دیاں لِکھتاں پڑھ کے اوہناں وچ لکھݨ دی تحریک پیدا ہوئی ۔ اوہناں نے غزل دے پیرائے وچ فنی تے موضوعاتی پدھر اُتے روایت توڑن دے حوالے نال اپݨی اک وکھری تے بھرویں پچھاݨ بنائی ۔ 1973 وچ اوہناں نے پہلا کالم سرور سکھیرا دے پرچے دھنک وچ لکھیا ۔ کلاسیکی شاعرااں توں اُلٹ ظفر دی شاعری محبت نوں مافوق الفطرت دے بجائے سائنسی تے جسمانی طور تے پیش کردی اے ۔ ڈاکٹر تبسم کاشمیری نے اوہناں نوں 20 ویں صدی دی ادب دی تجدید قرار دتا ۔ سابق وزیر اعلا پنجاب ، حنیف رامے اوہناں نوں نویں ڈھنگ تے نویں تصوراں دا شاعر کہندے سی ، اوہ آپ وی اک لکھاری تے ادبی نقاد سی ۔ ظفر اقبال 16 فروری 1995 توں 1 مارچ 1997 تک اردو سائنس بورڈ دے آگو رہ وی چکے نیں ۔
صدر پاکستان نے اوہناں دی سلاہݨ جوگ خدمات اُتے 1999 وچ اوہناں نوں پرائڈ آف پرفارمنس عطا کیتا ۔ 2014 وچ صدر پاکستان ولوں اوہناں نوں ہلال امتیاز نال نوازیا گیا ۔
اوہ مونھ زور ہوا دا لہرا، میں دیوے دی لَمب ۔ ۔ جیوں جیوں میرے نیڑیوں لنگھے، تیوں تیوں جاواں کَمب
|
سارے باغ وچ پیا رہیا اوہدی خُشبو دا شور ۔ ۔ گھاء وچ ستا سی طوطے دا ٹُکیا ہویا اَمب
|
نہ بدل اسماناں اُتے، نہ زمیناں تے پاݨی ۔ ۔ مینوں پھیتی پھیتی کر گئی کیہڑے مینھ دی جَھمب
|
فرشاں تے عرشاں دے پینڈے مُک گئے جد دا میں ۔ ۔ اپݨے بوہے تے آ بیٹھا توڑ کے اپݨے کَھمب
|
میں پہیے دے تھلے، گھوڑا نہر وچ ڈِگھ پیا ۔ ۔ ایسے پُل اُتے آ ٹُٹݨا سی ٹانگے دا بَمب
|
This article uses material from the Wikipedia شاہ مکھی پنجابی (Shāhmukhī Pañjābī) article ظفر اقبال, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). لکھت CC BY-SA 4.0 لسنس تھلے ہیگا اے۔ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki شاہ مکھی پنجابی (Shāhmukhī Pañjābī) (DUHOCTRUNGQUOC.VN) is an independent company and has no affiliation with Wiki Foundation.