Edgard Vrolijk: Politico di Aruba

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Vrolijk (n. 15 di juni 1977 na Aruba) ta un politico y parlamentario Arubano. Desde 8 di juli 2021 e ta Presidente di Parlamento di Aruba.

Edgard Vrolijk

Pais di nashonalidat	Reino Hulandes
Nòmber di dilanti	Edgard
Fecha di nasementu	15 yüni 1977
Okupashon	politiko

Edgard Vrolijk a lanta den districto di Santa Cruz, den bario di Shete. Na edad hopi jong e ta cuminsa hunga futbol. Na edad di 15 aña e ta switch di SV Arsenal pa SV Estrella, club cu a titula campeon na varios ocasion. Vrolijk tabata miembro di seleccion Arubano y a participa na diferente clasificacion internacional di CONCACAF. Tambe como hoben el a cuminsa ta activo como coach, prome den futbol y despues den beisbol. El a sigui activo como coach y miembro di directiva di SV Estrella te dia di awe.

Na aña 2000 Vrolijk ta termina su estudio na Instituto Pedagogico Arubano (IPA) como docente di scol primario. Entre 2000 y 2017 e ta traha na Cacique Macuarima School y unda e tabata activo tambe como coach den deporte escolar. Na 2021 e ta termina su estudio den ley na Universidad di Aruba. Su tesis pa grado master tabata titula: “De concept–rijkswet Caribische Hervormingsentiteit: De autonome positie van de landen binnen het Koninkrijk, de procedures bij een consensusrijkswet en de Caribische Hervormingsentiteit als zelfstandig bestuursorgaan”.

Na 2013 Vrolijk ta drenta den arena politico, debutando como nr. 15 riba lista di MEP. Den eleccion di 2013 e ta saca 586 voto. Despues di a saca 749 voto personal riba posicion number 10 den eleccion di 2017 e ta drenta Parlamento di Aruba como miembro di fraccion di MEP. Na 2019 e tabata iniciado di un "proyecto piloto di e-learning" na varios scol basico. Hunto cu Rocco Tjon, Vrolijk ta entrega e mesun aña un ley di iniciativa pa screening di ministernan, e asina yama "Landsverordening integriteit ministers". Despues cu parlamento a trata esaki pa di dos bes, e ley a keda aproba na oktober 2021 cu diesnuebe voto pro y uno contra. E ta logra mantene su asiento den parlamento pa un di dos termino despues di obtene 619 voto den e eleccion di 25 di juni 2021. Dia 8 di juli 2021, durante e prome reunion di e parlamento den su constelacion nobo, e ta wordo elegi como presidente di parlamento y na apertura di aña parlamentario na september 2021 re-elegi como tal.

Vrolijk ta casa cu Charissa Jarzagaray y hunto nan tin tres yiu muhe.