Luis Giusti: Ingeniero di Venezuela

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

27 di novèmber 1944 na Lagunillas, Venezuela) ta un eksperto internashonal venezolano riba tereno di petroli i energia. E tabata presidente di Petróleos de Venezuela (PDVSA), entre 1994 i 1999.

Luis Giusti
Profeshon	Ingeniero

Luis Giusti a nase na estado Zulia, den munisipio di Lagunillas i ta yu di Luis Germán Giusti Paolini i Leonor Isabel López Pérez, ambos miembro di famianan konosí na estadonan Tachira i Zulia. El a bai skol na Maracaibo na Colegio Gonzaga i a kontinua su estudio na Universidat di Zulia. Despues di gradua na 1966 komo ingeniero petrolero e ta obtené su master na Universidat di Tulsa, Oklahoma na 1971.

Giusti ta kuminsa su karera na Shell Venezuela na 1966. Na 1976, despues ku a nashonalisá e industria petrolero venezolano, e ta bai traha pa Maraven, un compania supsidiario di PDVSA. Eynan e tabatin un karera largu i exitoso, okupando funshonnan riba tereno di explorashon, produkshon, refineria, planning i merkadeo te su nombramentu komo visepresidente di e empresa.

Na 1994 Giusti ta wòrdu asigná presidente di PDVSA dor di presidente Rafael Caldera i ta entregá su retiro e mesun dia ku Hugo Chávez a asumí e presidensia di Venezuela. Bou di su mando e sektor petrolero venezolano a eksperensiá reformanan drástiko, entre nan e programa di integrashon di e tres operadónan nashonal: Maraven, Lagoven i Corpoven. Giusti tabata tambe e inisiadó i ehekutivo di e maneho konosí komo Apertura Petrolera. E apertura di e merkado di zeta tabata hasi posibel, pa promé bes desde e nashonalisashon di e sektor na 1975, pa kapital priva fo'i exterior partisipa den e sektor di petroli di Venezuela, logrando asina atraé un suma estimá na 30 bion dollar den e periodo 1995-2004. E meta prinsipal tabata pa desaroyá explotashon komersial den e Faha di Orinoko. Apesar ku e ta un di e vèltnan mundialmente mas grandi, e ta un vèlt di krudo tipo ultrapisá ku ta mas difisil pa prosesá i ku ta rekerí invershonnan substansial pa su desaroyo. Durante su último sinku aña na PDVSA el a konsolidá e posishon internashonal di e empresa realisando akuerdonan ku Mobil, Phillips, Chevron i Amerada Hess.

Luis Giusti ta biba na Merka i ta aktivo komo konsehero, entre otro riba tereno akadémiko i energétiko. E ta konsehero di e "Center for Strategic & International Studies" (CSIS) na Washington D.C., partikularmente pa e tereno di energia i asuntunan latino-merikano. E ta miembro di e konseho konsultativo di Riverstone-Carlyle i miembro di direktiva, i konsehero spesial di e presidente, di "Centre for Global Energy Studies" na London. Entre 2000 i 2005 e tabata konsehero eksterno di e grupo Royal Dutch Shell.

Na 2022 Giusti ta e kara di e grupo Giusti/Socap Corporation ku bou nòmber di Caribbean Petroleum Refinery (CPR) a ser asigná komo "preferred bidder" pa bira operadó di e refineria na Kòrsou. Despues ku a resulta ku den e negosiashonnan algun dokumento tabata falsifika a para esakinan kompletamente na 2023. CPR sinembargo a duna di konose di ta keda interesá den tuma over e refineria inkluso e terminal na Bullenbaai.