ਸ਼ੋਸ਼ਲ-ਮੀਡੀਆ ਸ਼ਬਦਾਵਲੀ ਕੋਸ਼

ਸ਼ਬਦਾਵਲੀ ਦੇਖਦੇ ਸਮੇਂ-

• ਜੇ ਕਿਸੇ ਅੰਗਰੇਜ਼ੀ ਸ਼ਬਦ ਦੇ ਇੱਕ ਤੋਂ ਵੱਧ ਅਰਥ ਹਨ ਤਾਂ ਪੰਜਾਬੀ ਵਿੱਚ ਉਹੀ ਅਰਥ ਲਿਖਿਆ ਗਿਆ ਹੈ ਜੋ ਸ਼ੋਸ਼ਲ-ਮੀਡੀਆ ਦੀ ਦੁਨੀਆਂ ਵਿੱਚ ਢੁਕਦਾ ਹੈ ਜਿਵੇਂ ਕਿ Fan ਦਾ ਪ੍ਰਸ਼ੰਸਕ ਲਿਖਿਆ ਗਿਆ ਨਾ ਕਿ ‘ਪੱਖਾ’।

• ਹਰ ਸ਼ਬਦ ਦੇ ਕਈ ਵਿਆਕਰਣਿਕ ਰੂਪ ਹੁੰਦੇ ਹਨ, ਜੋ ਕਿ ਅਸਾਨੀ ਨਾਲ ਬਣਾਏ ਜਾ ਸਕਦੇ ਹਨ। ਉਦਾਹਰਣ ਲਈ ਅੰਗਰੇਜ਼ੀ ਸ਼ਬਦ Connect ਦਾ ਪੰਜਾਬੀ ਅਨੁਵਾਦ ‘ਜੋੜਨਾ’ ਲਿਖਿਆ ਗਿਆ ਹੈ, ਬਾਕੀ ਰੂਪ Connected (ਜੋੜਿਆ), Connecting (ਜੋੜ ਰਿਹਾ), Connection (ਜੋੜ) ਆਦਿ  ਅਸਾਨੀ ਨਾਲ ਬਣ ਸਕਦੇ ਹਨ, ਇਸ ਕਰਕੇ ਨਹੀਂ ਲਿਖੇ ਗਏ। ਜਿੱਥੇ ਕਿਤੇ ਮੂਲ ਸ਼ਬਦ ਤੇ ਵਿਆਕਰਣ ਰੂਪਾਂ ਦਾ ਜ਼ਿਆਦਾ ਵਖਰੇਵਾਂ ਲੱਗਾ ਓਥੇ ਹੀ ਇੱਕ ਤੋਂ ਵੱਧ ਸ਼ਬਦ ਲਿਖੇ ਗਏ ਹਨ, ਜਿਵੇਂ ਕਿ Speak ਦਾ ‘ਬੋਲਣਾ’ ਤੇ Speaker ਦਾ ‘ਬੁਲਾਰਾ’।

• ਕਈ ਜਗ੍ਹਾ ਇੱਕੋ ਅੰਗਰੇਜ਼ੀ ਸ਼ਬਦ ਨੂੰ ਵੀ ਦੋ ਪੰਕਤੀਆਂ ਵਿੱਚ ਲਿਖਿਆ ਗਿਆ ਹੈ। ਅਜਿਹਾ ਓਥੇ ਕੀਤਾ ਗਿਆ ਹੈ ਜਿੱਥੇ ਅੰਗਰੇਜ਼ੀ ਸ਼ਬਦ ਦਾ ਦੂਸਰਾ ਅਰਥ ਬਿਲਕੁਲ ਵੱਖਰਾ ਹੈ, ਜਿਵੇਂ ਕਿ Volume ਦਾ ਇੱਕ ਅਰਥ ‘ਜਿਲਦ’ ਹੈ ਤੇ ਦੂਜਾ ਅਰਥ ‘ਅਵਾਜ਼’। Link ਦਾ ਇੱਕ ਅਰਥ ‘ਲਿੰਕ/ਕੜੀ’ ਹੈ ਤੇ ਦੂਜਾ ਅਰਥ ‘ਜੋੜਨਾ’।

• ਪੰਜਾਬੀ ਵਾਲੇ ਖਾਨੇ ਵਿੱਚ;
  • ਕਈ ਜਗ੍ਹਾ ਪੰਜਾਬੀ ਅਨੁਵਾਦ ਵਿੱਚ ਇੱਕ ਤੋਂ ਵੱਧ ਮਿਲਦੇ-ਜੁਲਦੇ ਸ਼ਬਦ ਲਿਖੇ ਗਏ ਹਨ ਤਾਂ ਜੋ ਅਨੁਵਾਦ ਕਰਦੇ ਸਮੇਂ ਵਾਕ ਦੇ ਅਰਥ ਸਪੱਸ਼ਟ ਕਰਨ ਲਈ ਢੁਕਵਾਂ ਸ਼ਬਦ ਵਰਤਿਆ ਜਾ ਸਕੇ।
  • ਜੇ ਸਿਰਫ਼ ਅੰਗਰੇਜ਼ੀ ਸ਼ਬਦ ਦਾ ਲਿਪੀਅੰਤਰਨ ਰੂਪ ਲਿਖਿਆ ਹੋਇਆ ਤਾਂ ਇਸਦਾ ਮਤਲਬ ਕਿ ਪੰਜਾਬੀ ਵਿੱਚ ਸਿੱਧਾ ਜਾਂ ਛੋਟਾ ਰੂਪ ਨਹੀਂ ਮਿਲ ਰਿਹਾ ਤੇ ਤਕਨੀਕੀ ਅਨੁਵਾਦ ਵਿੱਚ ਇਸੇ ਨੂੰ ਅਪਣਾਉਣਾ ਪੈਣਾ ਜਿਵੇਂ ਕਿ Format ਦਾ ‘ਫਾਰਮੇਟ’, Reel ਦਾ ‘ਰੀਲ’, Mobile ਦਾ ‘ਮੋਬਾਈਲ’।
  • ਜੇ ਪਹਿਲੀ ਜਗ੍ਹਾ ਲਿਪੀਅੰਤਰਨ ਰੂਪ ਲਿਖਿਆ ਹੋਇਆ, ਤੇ ਅੱਗੇ ਹੋਰ ਸ਼ਬਦ ਲਿਖੇ ਹਨ ਤਾਂ ਇਸਦਾ ਮਤਲਬ ਕਿ ਅੰਗਰੇਜ਼ੀ ਵਾਲਾ ਸ਼ਬਦ ਪੰਜਾਬੀ ਵਿੱਚ ਵੀ ਪ੍ਰਚਲਤ ਹੋ ਚੁੱਕਾ ਹੈ। ਇਸਤੋਂ ਅੱਗੇ ਲਿਖੇ ਸ਼ਬਦ ਸਮਝਾਉਣ ਲਈ ਜਾਂ ਕਿਸੇ ਜਗ੍ਹਾ ਵਿਸਥਾਰ ਆਦਿ ਲਈ ਵਰਤੇ ਜਾ ਸਕਦੇ ਹਨ।