Tractat De Saint-Germain-En-Laye

Fa partida dei tractats de patz que marcan la fin de la Premiera Guèrra Mondiala (1914-1918). Definís lo reglament dau conflicte entre leis Aliats e Àustria. Sei clausas organizèron lo partiment de la partida austriana d'Àustria-Ongria entre leis Estats venguts independents en 1918 (Polonha, Checoslovaquia, Iogoslavia...), l'annexion de certanei territòris frontaliers per Itàlia e Romania e la mesa en plaça de l'Àustria contemporanèa. De mai, la fusion entre Àustria e Alemanha foguèt enebida. En mai d'aquò, lei fòrças militaras austrianas foguèron limitadas e lo país deguèt pagar de reparacions. Enfin, leis Estats novèus poguèron reclamar la restitucion deis òbras d'art presentas dins lei colleccions imperialas reünidas per lei Habsborg.

Aqueu tractat confiermèt la disparicion d'Àustria-Ongria, poissança majora en Euròpa dempuei la fin de l'Edat Mejana. Pasmens, sa consequéncia principala foguèt la desorganizacion prefonda de l'economia de l'Euròpa Centrala en causa de la multiplicacion dei frontieras dins la region. En particular, aquò entraïnèt una crisi economica e sociala grèva en Àustria. Ansin, l'oposicion au sistèma de Versalhas foguèt un sentiment fòrt dins la populacion austriana, çò que favorizèt l'annexion dau país per l'Alemanha Nazi d'Adolf Hitler en 1938.

• Premiera Guèrra Mondiala.
• Tractat de Versalhas.

• (fr) Georges Morgain, La Couronne autrichienne et le Traité de Saint-Germain, Sirey, 1927.