Porchémue
Ch't' articl'ye est êcrite en Jèrriais |
Porchémue (en Angliais : Portsmouth) est eune ville en Angliétèrre. La ville a 'té ieune des pus împortantes caûchies d'pis bein des siècl'yes.
La ville est jeunm'lée auve Caën.
Histouaithe
Les Romains avaient fondé un hâvre dans l' vaîthinné à Portchester, mais la fondâtion d'la ville même dé Porchémue fut entréprînse par un Nouormand, Jean d' Gisors, en 1180.
La ville fut bâtie preunmiéthement sus l'île dé Portsea tch'est achteu r'jouainte à la tèrre. Lé hâvre donne sus l'Solent, lé dêtrait entré l'île dé la Grande Brétangne et l'Île dé Witte, à l'entrée du Ch'na, v'là tchi faîthait eune mangnifique base pouor la Mathinne Rouoyale.
La Mary Rose, navithe du rouai, fut bâti à Porchémue en 1510 et capsaïzit dans l'Solent en 1545. Prêsèrvé souos l'sablion, l'navithe fut r'lévé en 1982 et achteu est exhibé dans un musée à Porchémue.
Lé navithe Victory, l'amitha au Lord Nelson duthant la Batâle dé Trafalgar, est exhibé étout à Porchémue.
L'Unnivèrsité d'Porchémue fut êtablyie en 1869 et d'vînt eune unnivèrsité en 1992.
Caûchie
La compangnie Brittany Ferries fait couôrre des batchieaux d'Porchémue à Caën, Chèrbourg et Saint Mâlo. Temps pâssé y'avait des batchieaux entré Porchémue et l's Îles d'la Manche.
Gens
Des gens d'Porchémue sont:
- Isambard Kingdom Brunel (né à Porchémue en 1806)
- Charles Dickens (né à Porchémue en 1812)
- James Callaghan (Preunmié Minnistre du Rouoyaume Unni, né à Porchémue en 1912)
Un Jèrriais, Bèrtram Falle, dé tchi la maîson fut acatée et dêmolie par T.B. Davis pouor la pliant'tie du Par Howard Davis, fut êlu Député à Porchémue en mil neu chents dgix. Huit fais êlu à la Chambre des C'meunes, en mil neu chents trente-quat' i' fut êl'vé à la Chambre des Lords auve lé titre dé Lord Portsea. I' r'présentait l's întéthêts d's Îlemans duthant l'Otchupâtion à tigue dé corps. Nou dit qu'i' 'tait l'drein lord à êt' cachi rédguliéthement au Parlément dans eune cârrosse à deux j'vaux.
This article uses material from the Wikipedia Nouormand/Normaund article Porchémue, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nouormand/Normaund (DUHOCTRUNGQUOC.VN) is an independent company and has no affiliation with Wiki Foundation.