Rosenplanten

Rosenplanten wasst in de ganze Welt, sunnerlich up de nördliche Hälft. De Blöte hett meist twee Geslechter. Se is in’n Krink um en Ass upboot, mit fiev Kroonblöer un fiev Kelkblöer. De Kroonblöer könnt avers ok fehlen. Faken hefft de Blöten en Stieg Stoffblöer. De Tahl is verscheden un liggt twuschen 1 un veele. Faken sünd dat just twee-, dree- oder veermol so veel, as dat Kroonblöer gifft. De Steele stoht free. De Fruchtknutten sitt unnen an. De Fruchtblöer könnt mit den Fruchtknutten tohopenwussen ween. Binnen de Familie gifft dat Fleeschfrücht un ok Schienfrüchte. To de Rosenplanten höört so bekannte Fruchtplanten to, as de Eerdbeer, de Huusappel, de Himbeer, de Beer, de Plumm un annere.

Rosenplanten
Systematik
Ornen: Rosenhaftige (Rosales) Familie: Rosenplanten (Rosaceae)
Wetenschoplich Naam
Rosaceae
(Juss.)

De Blöer stoht meist ut’neen un hefft Stöhnblöer. In de Familie gifft dat allerhand Zier- un Bruukplanten. An un for sik warrt de Familie unnerdeelt in veer Unnerfamilien: Rosoideae, Spiraeoideae, Maloideae un Amygdaloideae. Bi jungste Unnersöken is avers rutkamen, dat düsse Unnerfamilien nich monophyleetsch sünd. Wie se nu akraat tohopen passt, is avers noch nich klaar.

Unner annern höört to de Rosenplanten düsse Geslechter

• Acaena (Geslecht Stekelnoot)
• Alchemilla (Geslecht Froenmantel)
• Amelanchier (Geslecht Krintenboom)
• Aronia (Geslecht Appelbeer)
• Crataegus (Geslecht Maidoorn)
• Cydonia
• Fragaria (Geslecht Eerdbeer)
• Malus (Geslecht Appels)
• Potentilla
• Prunus (Geslecht Plumm)
• Pyracantha (Geslecht Füerdoorn)
• Pyrus (Geslecht Beer)
• Rosa (Geslecht Rosen)
• Rubus (Geslacht Brommbeer)
• Sorbus

• Projekt:Plantennaams up Platt