Robben

Robben sünd Söög- un Roofdeerter, de in't Meer leevt un darum flossenaartige Benen hefft. Man kann de Robben in dree Familien unnerdelen: de Seehunnen, de Ohrenrobben un de Walrossen. Dat Walross is 3 bit 4,5 m lang, lett geelbruun un hett förchterlich lange Ecktähnen an 'n Baberkeev. De Achterfööt laat sik na vorn dreihn. Disse grote Robb swemmt goot un kann bit to 10 Minuten un 30 m deep duken. Ehr Levensruum is dat Drieviesrebett in de Polarmeren. An de düütschen Küsten vun de Noord- un Oostsee leevt blot de Seehund. All de annern Robben kaamt blots sprangwies vör. De Saddel- un Boortrobb un de Klappmütz kammt ut dat Drieviesrebett nich herut. Blots de Ringelrobb mit ehre hellen Ringe up dunkeln Grund is tosamen mit de graue, swaartpleckige Kegelrobb ok an Fels- un Steenküsten antodrapen. De Seehund is bit to 2 m lang. He heet so, wiel sien Kopp so utsüht as de vun enen Hund. Siene bekrallten Achterflossen kann he blots na achtern richten. Liekers kann he up dat Land rutschen un sik dar utrauhn oder van de Sünn beschienen laten. De Seehund is en groten Fischröver. Fröher wurr he wegen sien Speck un dat glatte Fell stark verfolgt.