Hambargen

Wapen/Flagg	Koort
Basisdaten
Bundsland: Neddersassen Landkreis: Oosterholt Samtgemeen: Hambargen Gemeen: Hambargen
Inwahners:
Postleettall:	27729
Vörwahl:	04793
Geograafsche Laag:	53° 19′ N, 8° 49′ O

Hambargen (hoochdüütsch Hambergen) is en Dörp in de Gemeen Hambargen (Samtgemeen Hambargen) in’n Landkreis Oosterholt, Neddersassen.

To Hambargen höört von öllers ok de lüttjeren Öörd Bullwinkel, Schrum un Kiebitzsegen mit to.

De Oort liggt op de Oosterholter Geest. Dat Water ut dat Rebeed flütt in’n Westen un Noorden över Gravens na’n Giehler Beek un in’n Oosten na de Beek un wieder in de Hamm. In’n Noordoosten liggt dat Naturschuulrebeed Heilsmoor.

De Naveröörd sünd Lübbs un Bullwinkel in’n Noorden, Paddewisch un Wallhöben in’n Noordoosten, Heißenbuttel mit Neenkroog in’n Oosten, Heilsdorp in’n Süüdoosten, Spreddig un Ströh in’n Süden, Olenbüttel, Kiebitzsegen un Vörwohl in’n Süüdwesten, Ohlenst un Schrum in’n Westen un Bilohm Bremerhorn un Wohlthöben in’n Noordwesten.

Hambargen kummt 1056 toeerst in de Oorkunnen vör. Dat weer en lütt Good in’n Besitt von de Arzbischöp von Bremen.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Hambargen in’n Kanton Oosterholt höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Hambargen in’n Kanton Oosterholt.

De Oort hett vör 1885 to de Vaagdie Hambargen von dat Amt Oosterholt tohöört. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en, grötteren Kreis Oosterholt tohoopgahn is.

An’n 1. April 1937 sünd de Gemenen Hambargen un Ströh un de gröttere Deel von Heißenbuttel to een Gemeen tohoopgahn, de sietdem ok den Naam Gemeen Hambargen driggt.

Inwahnertall

* tohoop mit Bullwinkel

Religion

 

Hambargen is evangeelsch-luthersch präägt un billt mit de Cosmae-un-Damiani-Kark en egen Kaspel. De Kark is 1335 inricht worrn. Vörher hett dat Rebeed to dat Kaspel Scharmbeek höört.

För de Kathoolschen is de Hillige-Familie-Kark in Oosterholt-Scharmbeek tostännig.

De Oort hett en egen Karkhoff an de Schoolstraat.

Verenen

De Schüttenvereen Hambargen is 1909 grünnt worrn.

Hambargen hett en egene freewillige Füürwehr, de 1893 grünnt worrn is.

1995 is in’n Noordoosten von Hambargen en eerst Windrad boot worrn, dat en Leistung von 0,6 Megawatt hett. 2001 sünd dor noch fiev Windrääd von’n Typ Vestas V47/660 (Leistung 0,66 MW) tokamen. Allens tohoop hett düsse Windpark, de von de WKN AG bedreven warrt, also en Leistung von 3,9 MW.

Twüschen Lübbs un Hambargen is 2016 von’n Bedriever wpd en tosätzlichen Windpark mit söven Windrääd von’n Typ Enercon E101/3050 boot worrn, de 186 Meter hoog sünd un tohoop en Leistung von 21,35 Megawatt hebbt. De Kösten för de Anlagen weren knapp 35 Milljonen Euro.

Verkehr

An Hambargen langs löppt de Bundsstraat 74, de in’n Noordoosten över Kuhs un Basdaal na Bremervöör geiht un in’n Süüdwesten na Oosterholt-Scharmbeek, Hu’e un Bremen-Noord.

De nächste Autobahn is de Autobahn 27 (Afsnidd Bremen–Bremerhoben). De Opfohrt 13 Uthleer liggt so 18 Kilometer in’n Westen von Hambargen an de K 48.

De nächste Bahnhoff is so bi dree Kilometer wied weg in’n Süüdwesten de Bahnhoff Olenbüttel an de Bahnlien Bremen–Bremerhoben.

Scholen

De Kinner ut dat Dörp gaht na de Grundschool Hambargen un later op de Gesamtschool an’n Wällenbarg oder op dat Gymnasium Oosterholt-Scharmbeek.

Freetied

Dat Hallenbad in Hambargen heet Hambad un is 1975 boot worrn.

De Journalist Reiner Pfeiffer hett von de Johren 1990 bet to sien Dood 2005 in Hambargen leevt. De Basketballspelerin Katja Bavendam is 1985 in Hambargen boren. 1942 hebbt Helmut un Loki Schmidt in de Hambarger Kark freet.

• Websteed von de Samtgemeen Hambargen (hoochdüütsch)