Francesco Ii D''e Ddoje Sicilie: Urtemo Munarca d''O Regno d''e Ddoje Sicilie

Figlio d'ô rre Ferdinando II d''e Ddoje Sicilie e d'â primma mugliera 'e chisto, Maria Cristina 'e Savoia. Era nepute pe' parte 'e pate d'ô rre Francesco I d''e Ddoje Sicilie e 'e ll'Infanta 'e Spagna Maria Isabella, e pe' chella 'e mate d'ô rre Vittorio Emanuele I 'e Zardegna e 'e ll'arceduchessa Maria Teresa d'Austria-Este.

Spusato 'ncap'ô 1859 ch'â duchessa Maria Sofia 'e Baviera, figlia d'ô duca Massimiliano 'e Baviera e d'â mugliera 'e chisto Luisa 'e Baviera, 'a cocchia avette schitto na figlia, Cristina, ca mperò murette sulo tre mise aropp'â nasceta.

Sagliette ô trono a ll'anno 1859 aropp'â morte d'ô pate sujo, 'o rre Ferdinando II d''e Ddoje Sicilie. Francesco recevette na 'mpurtante ufferta da Cavour resultante esse 'a presa 'e pussesso 'e metà d'ô Stato Vaticano se isso avesse recanusciuto ll'aggrannimento d'ô Piemonte, tanno 'n piena fase 'e 'spanzione. Ll'ufferta fuje mperò refutata da Francesco.

'Int'ô mese 'e majo 'e ll'anno 1860, Giuseppe Garibaldi e mille cammise russe sbarcajeno a Marsala e occupajeno 'ncap'a poche juorne tutta l'isula d'â Sicilia senza truvà grossa resestenza melitare d'ê truppe rialiste. Garibaldi e ll'uommene suoje, aropp'â varie cummattemiente, trasetteno a Napule e prennettero pussesso d'ô Regno. 'A famiglia riale se refuggiaje a Gaeta, addo' resestette quase n'anno (nfin'ô 13 'e frevaro 1861).

'O 17 'e màrzo 1861 fuje deciarrata 'a nasceta d'ô Regno d'Italia e tre juorne apriesso capetulaje ll'urtema furtezza d'ô Regno d''e Ddoje Sicilie, Civitella del Tronto.

Francesco e 'a mugliera jetteno azzò a Romma pe' recevere 'o supporto papale. Cu' ll'occupazzione taliana d'ô Lazio e 'e Romma, Francesco e Maria Sofia avetteno a lassà pure chesta cetà e appriesso se spartetteno de facto. Francesco murette a Arco 'n Tirolo, tanno terretuorio 'e ll'Impero austriaco, 'o 27 'e dicembre 1894.

• Burbone 'e Napule
• Regno d''e Ddoje Sicilie
• Unità d'Italia
• Regno d'Italia
• Spedizzione d''e Mille