Filastrocche napulitane
‘A gallina zoppa zoppa,
quanti penne tene ncoppa?
E ne tene vintitrè,
uno, doje e tre.
E teneva nu turnesièllo,
e s’accattàje nu susamièllo;
mièzo a me, mièzo a te,
mièzo a’ figlia d’ ‘o Re!
Quanno è bello a ghì pe’ mmare,
‘a Maronna ncoppe ‘a nave,
San Giuseppe a lu timone
E Giesù Cristo pe’ patrone,
l’angiulille pe’ marenare,
quanno è bello a ghì pe’ mmare.
Aiza, aiza, aiza
acala acala acala
accosta accosta accosta
sperann ca s'ntosta
â saluta nosta!
Carùso, mellùso,
miette ‘a capa ‘int’a ‘o pertùso,
ca si vene ‘o scarrafòne
te ròseca ‘o mellòne.
Ce steva ‘na vota ‘nu rre miré scarrafunaro
ca jeva a caccia
mi caccia, mi caccia, e che cacciaje?
‘na zoccola c' 'e mustacce!
Chiòve e ghièsce ‘o sole,
tutte ‘e vecchie fanno ammore;
fanno ammore cu ‘a tiàna,
tutte ‘e vecchie so’ ruffiàne;
fanno ammore ‘inte ‘o ciardino,
tutte ‘e vecchie malandrìne.
Fieto, fetillo,
chi l’ha fatto ‘stu sciatìllo?
Lu sciatìllo è gghiuto all’uòrto,
e chi fete ‘e cane muòrto ?
Icche, ecche, occo,
‘o ppane, ‘o vino e ‘o cocco.
Abbìcco, abbàcco, abbòcco,
tabaccàro sotto e ncoppa.
I’ me cocco dinte a ‘stu lietto,
‘a Maronna ncoppe a ‘stu pietto,
i’ dormo e Essa veglia,
si è caccòsa me resbèglia.
I’ me cocco e me songo cuccàto,
Giesù cristo m’è pate,
‘a Maronna m’è mamma,
e sante me so’ pariente,
i’ me cocco e nun aggio paura ‘e niente.
Maria ‘a mariòla
Porta a bèvere ‘e galline,
e galline fanno ll’ove
e Maria ‘a mariola.
Mo’ vene Natale
e stò senza denare,
me fumo na pippa
e me vaco a cuccà.
Quanno è stanotte
ca sparano ‘e botte,
me metto ‘o cazòne e vaco a vedè.
Nuvena, nuvena,
ca màmmeta è prena
ha fatto nu figlio
e se chiamma Michele,
e tene na figlia
c’addora ‘e tabacco
e quanno cammina
l’abbàllano ‘e pacche.
Quann' ero guaglione assaie me piaceva
'e senti' na novena a nott'e Natale
Quann' ero guaglione mammà me purtava
'a senti' na novena a nott'e Natale
Mo' vene Natale nun tenco denare
me fumo na pippa e me vaco a cuccà
Mo' vene Natale se sparano 'e botte
Me metto 'o cappotto 'e me vaco a vedè
Me resta 'o ricordo 'nzerrato dint' o core
'e chelli serate cu mamma vicino
sunava 'a zampogna 'a gente guardava
'a gente diceva è nato Gesù
Quann' ero guaglione 'a nott' e Natale
'o core sbatteva aspettann' a Gesù, aspettann' a Gesù
Mo' vene Natale nun tenco denare
me fumo na pippa e me vaco a cuccà
Mo' vene Natale e sona 'a zampogna
Me metto 'o cappotto 'e me vaco a vedè
Nuvena, nuvena,
ca màmmeta è prena
ha fatto nu figlio
e se chiamma Michele,
e tene na figlia
c’addora ‘e tabacco
e quanno cammina
l’abbàllano ‘e pacche.
Mo' vene Natale nun tenco denare
me fumo na pippa e me vaco a cuccà
Mo' vene Natale se sparano 'e botte
Me metto 'o cappotto 'e me vaco a vedè
Munzù, munzù, munzù,
è gghjuta 'a zoccola 'int'a 'o rraù.
'A signora nun 'o vo' cchiù,
magnatillo tutto tu.
Nce steva na vota,
'nu monaco devoto,
dinte â na cella
teneva ‘e saciccèlle,
jetta na jatta
e se ne magnaje quatto;
venette ‘o priore
cu nu turcetùro
e nce facette cacà a una a una.
Nce steva na vota
'nu viecchio e na vecchia,
ncopp'â nu monte,
sott'â nu specchio,
sott'â nu specchio
ncopp'â nu monte,
aspettame lloco ca mo’ te lo conto…
Nonna, nonna, nunnarella
ca ‘o lupo s’ha mangiato ‘a pecurella.
E pecurella mia comme farraje,
quanno mocca a lu lupo te travarraje?
E pecurella mia comme faciste,
quanno mmocca a lu lupo te vriste?
E pecurella mia comme campaste,
quanno mmocca a lu lupo te truvaste ?
Quanno mammeta fa ‘a cazetta,
‘o mazzarièllo addò s’ ‘o mette ?
Si s’ ‘o mette areto a ‘e rine,
fa ‘a cazetta p ‘e pellerìne;
si s’ ‘o mette areta ‘a porta,
fa ‘a cazetta p ‘ ‘ o guardaporta;
si s’ ‘o mette dinte ‘o lato,
fa ‘a cazetta p ‘ ‘o nnammurato;
si s’ ‘o mette ‘inte ‘a cintura,
fa ‘a cazetta p ‘ ‘a criatura;
si s’ ‘o mette sotto ‘o core,
fa ‘a cazetta p ‘ ‘o cunfessore.
Ora pro nobìs,
piglia 'a mazza e vatte a chisto.
Ora pro nobùs
care 'nterra e te rumpe 'o musso.
Dinte a chesta manèlla,
nce stev na vòta na funtanèlla,
venèven a bere ‘e paparelle…
più, più, più…
pizzi pizzi trangula,
la morte alisandrangula
e santrangula e pipì,
e la morte Sarracina.
Serracina faceva lu ppane
tutt' 'e mmosche s' 'o mmagnavano,
s'o mmagnavano a poca a vota.
Pallerò, pallerò,
chi è cchiù bella jesce fore,
jesce fore 'a 'stu ciardino,
pizza doce e tagliulino!
Tagliulino a me, tagliulino a te.
Chella vecchia mariola
s'arrubbaje a don Nicola,
don Nicola aizaje 'o bastone
'o bastone se rumpette,
aizaje 'a scuppetta
a scuppetta nun sparaje.
Uno, roje, tre e quatte.
Sbatte ‘e mmane ca vene papà,
porta ‘o zucchero e ‘o babbà,
nuje ‘o mettimmo a cucenà
e ‘o nennillo s’ ‘o va a magnà…
Sennuzzo, va `o puzzo
va a mare
va add'a cummare
vide che te dice
e vienamello `a dicere.
Sega, sega mastu Ciccio,
na panèlla e nu sasìcc;
a panell cià magnamm
e i sasìcc ciò stipàmm;
ciò stipàmm p Natale,
quann vèn o zampugnàre.
O zampugnàre nun vèn cchiù
a sasìcc t'à mangn tu
Storta bicòscia,
tiene ‘e coscie mosce mosce,
e sotto ‘o suttanìno,
tiene ‘o scoglio ‘e Margellina.
This article uses material from the Wikipedia Nnapulitano article Filastrocche napulitane, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenute suggiette a licienza 'e auso CC BY-SA 4.0 se nun fuje ritto atro. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nnapulitano (DUHOCTRUNGQUOC.VN) is an independent company and has no affiliation with Wiki Foundation.