Moustapha Alassane (N'Dougou, 1942) ye un ator, argumentista i rializador nigerino.
Nacido an 1942 an N'Dougou (Níger), Mustapha Alassane ampeça por formar-se an macánica. Nas anstalaçones de la Rouch IRSH an Niamey daprende la técnica cinematográfica, tornando-se un de ls sous percipales ambestigadores. Jean Rouch facelita la sue formaçon i stadie ne l Canadá, adonde conhece l famoso Norman McLaren, que le ansina ls segredos de l'animaçon. Ye un de ls purmeiros cineastas de África, cuntribuindo para que l Níger se tornasse un paíç de refréncia ne l cinema africano, eiquelibrando ls pratos de la baláncia cul Senegal. Ls purmeiros filmes animados de la África susaariana son de la sue outoria, tenendo tamien rializado documentairos i obras de fiçon. Fui Diretor de l Departamiento de Cinema de la Ounibersidade de Niamey durante 15 anhos.
Moustapha Alassane rializou, an 1962, dues cúrties-metraiges anspiradas an cuntos tradecionales: “Aoure” i “La Bague du roi Koda”. Repersentante de la cultura africana ("Dela ó el Barka le cunteur", 1969; "Shaki", 1973), Alassane usa tamien la sátira de questumes ("F.B.B.La., femme, billa, boiture, argent", 1972), denunciando la sede de poder de las “nuobas riquezas” an África. La crítica i l'humor negro stan, aliás, persentes assiduamente ne ls filmes de l rializador. La rana ye l sou animal faborito i personaige percipal de ls sous filmes d'animaçon, por cunsidrar pura i simplesmente qu'animar la figura houmana nun ye tan dibertido. Rializou cerca de trinta filmes d'animaçon, fiçon i documentairo, que sublinhan l mirar satírico an relaçon als questumes sociales de l sou paíç.
Atualmente, la sue ouficina de trabalho stá montada an Tahoua, ua pacata cidade de l'anterior de l Níger, loinge de l'azáfama de la capital Niamey, denotando l'houmildade dun de ls rializadores africanos mais cunceituados an to l mundo, al fugir a las multidones. Ye eilhi que, partindo de las bases de macánica que ten, Moustapha Alassane zambolbe l sou trabalho outelizando bários tipos de material para criar las sues stórias: madeira, arame ó metal, cola, panhos, spuma…
Retrospetibas de la sue filmografie i houmenaiges a la sue carreira ténen sido feitas an dibersos de ls mais prestigiados festibales spalhados por to l mundo.
Moustapha Alassane fui feito Cabalheiro de la Legion de Honra, durante l Festibal de Cannes 2007.
L'arte de Alassane anspirou la que se fazissen dous documentairos subre el: Animation eit creation: Ounibers du cinema de Moustapha Alassane (2002, 19 min), rializado por Debra S. Boyd, Moustapha Alassane, cinéaste du possible (2009, 90 min), rializado por Silbia Bazzoli i Christian Lelong.
This article uses material from the Wikipedia Mirandés article Moustapha Alassane, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenido çponibelizado ne ls termos de la CC BY-SA 4.0, salbo andicaçon an cuntrairo. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mirandés (DUHOCTRUNGQUOC.VN) is an independent company and has no affiliation with Wiki Foundation.