မၞိဟ်အာယုက်ဇၞော်တိုန်မ္ဂး ကသပ်ချပ်ဂတဂတတေံဂှ် ဒှ်လေပ်ကၠုၚ်မာန်၊ မုကသပ်မွဲချပ်ပ် ဒှ်ဂၠံၚ်လ္ပာ်ခိုဟ် လ္ပာ်ဟွံခိုဟ် နွံၜါရ။ သီုၜါဂှ် ဒးပြံၚ်လှာဲမာန်ရောၚ်။ ပြံၚ်ကဵုကသပ်ဟွံမာန်မ္ဂး ဘဝဟွံသၠုၚ်ဇၞော်မောဝ်တဴတက်ရ။ဂကူမန်တအ် မုဟိုတ်ဒးဝါတ်ဂၠိုၚ်ရော ဟိုတ်နူချပ်လဝ် ဂွံသ္ၚိမွဲမ ဂွံကွဳစက်မွဲဖ္ဍိုက် ဂွံဝါမွဲတၞ ဂွံသ္ပတၠကၠအ်ပ္ၜိုတ်တၞံလ္ၚီၜဝ်ရ။ အယာံမာတ်ၜိုတ်ဏအ်ဓဝ် ချပ်ဟွံထေက် ဒးပြံၚ်လှာဲကသပ်တၞဟ်ဟ်မာန်ရောၚ်။ သၟတ်ကောန်ညးဍုၚ်တဴတက်မံၚ် မပ္တံဂျပါန် အမေရိကာန်တအ် ဗ္တောန်ပညာတုဲမ္ဂး စိုပ်အာယုက် ၂၅-၃၀ မ္ဂး ဒးဒှ်ညးမၞုံကဵုထဝ်သြန်လှာဲလှာ်၊ စိုပ်အာယုက် ၄၀ မ္ဂး ဒဒှ်တၠကုမ္မဏီမွဲ အာယုက်ဇၞော်တိုန်နူပၠန်မ္ဂး ကသပ်ချပ်လဝ်တုဲတုဲတအ်ဂှ် ပြံၚ်လှာဲမံၚ်လၟိုန်ရ။
နကဵုမွဲကသပ်ဓဝ် ဟွံဖအိုတ်ထောံအခိၚ်ဘဝရ။ ကသပ်ဇၞော်ဇၞော် ဒးဂံၚ်ချပ်လဝ်ကီုရောၚ်။ မၞိဟ်ဝါတ်တအ် ဟွံချပ်ကသပ်သေဌဳဂှ် ဒှ်ဟွံထေက်၊ ဇကုချပ်လဝ် သၠုၚ်သၠုၚ်နွံမှ က္ဍဟ်လေဝ် ကၠောန်ကမၠောန်သၠုၚ်ကၠုၚ်မံၚ်ကီုရ။ က္တဵုဒှ်မၞိဟ်တုပ်ပ် ဆ္ဂးမၞိဟ်ကသပ်ဇၞော်ဂှ် ၜက်သၠုၚ်အာနူမၞိဟ်ကသပ်အောန်ရ။ ဂၠဲါလ္ၚတ်လဝ် ဗဟုသုတလမိၚ်လညာတ် ဆဵုဂဗအောန်တုဲ ကသပ်သၠုၚ် ကသပ်ဇၞော် ချပ်ဟွံလေပ် ပါ်ပဲါဟွံလေပ်ဂှ် မၞိဟ်ဂကူဗီုပြၚ်ဏအ်နွံတဴမံၚ်ဗွဲမဂၠိုၚ်ဏီ ထေၚ်ကေတ်သာ်ဏအ်ရ။ဟိုတ်ဂှ်ရ လောကဘုံမၞိဟ်ဝွံ မၞိဟ်ဝါတ်တ်တအ် နွံတဴမံၚ်ဗွဲမဂၠိုၚ်ဂၠၚ်ဂှ် ဟိုတ်နူဟွံဂံၚ်သၠာဲဂတးလညာတ်ကသပ်၊ ဟိုတ်နူဟွံကေၚ်ချပ် ဟွံကေၚ်ပါ်ပဲါရ။
ဇၟာပ်မၞိဟ် ဗၞတ်ကသပ်ဇကုနွံရ၊ ထမံက်ရုပ်ရဴ ကၠောန်ဂစာန်မံၚ်တုဲ ဂျိုၚ်တဴလမျီုရ၊ ဆ္ဂး ကသပ်ဝွံဂတာပ်ခေတ် ကသပ်ဂွံပြံၚ်လှာဲဂှ် မၞိဟ်ဂံၚ်ချပ်စအောန် မၞိဟ်ဂံၚ်ဒုၚ်ကေတ်အောန်တုဲ ဒှ်မံၚ်ကသပ်တိတ်ကၠုၚ် နူက္ဍဟ်အခိုက်ပြဝေဏီ ကသပ်တြေံဝါဒတြေံသၟးဒုၚ်ဂိုၚ်ကေတ်လဝ်ရ။ ဥပမာ- ရဲသၟာဗ္ၚတအ် နကဵုလညာတ်ကသပ်တြေံတြဟ်ဂှ် ရပ်စပ်သုၚ်စောဲကၠုၚ်နွံမံၚ်ဒဵုစိုပ်ခေတ်လၟုဟ်ဏီရ။ နဲကၠောန်ဇိက်ဗ္ၚ၊ နဲကၠုတ်မသြောံ၊ နဲတဵုလွဳ သွက်ဂွံပ္တိတ်သြောံဂၠိုၚ်ၚ်ဂှ် ဟွံဂံၚ်သၠာဲသြောံမ ဟွံဂံၚ်သၠာဲနဲကဲဂတာပ်ခေတ်ဏီဖိုဟ်ရ။
ဂကူမန်တအ် ဂွံပိုၚ်ပြီလဝ်ဒြပ်သယံဇာတနွံဟွံအောန် မပ္တံသတ် ဗ္ၜိုတ် ဒူရေန် မၚ်ဂုတ် ပြိုက် ပၞဴ ခနေၚ် လ္တူဒြပ်တိတ်နူဒေသတိဍာ်မန် ယဝ်ဂကူမန်တအ် ဂံၚ်ချပ်ကသပ်ဇၞော်ဇၞော်နွံမ္ဂး ဒှ်ၚုဟ်မးသွက်ဘဝဇကုကီုရ။ မၞိဟ်ဂံၚ်ချပ်ကသပ်ဇၞော်ဇၞော်နွံမ္ဂး နူလ္တူဍုၚ်ဇၞော်တေံစှ်ေကၠုၚ်ကူရာန် သွံဂတးမာန်ရ။ ၜိုန်ဒှ်ဒြပ်ဇကုအပိုၚ်ကီုလေဝ် ၚုဟ်မးဂှ် ဗီုမၞိဟ်ရာန်ကပေါတ်ကေတ်ဂှ် တၠကၠအ်တအ်လေဝ် ဒုၚ်မံၚ်ကဵုအိုတ်ရ။ ဟိုတ်နူပြံၚ်လှာဲကသပ်ဟွံမာန် ဟီုစထေက်ရ။ ဂကူမန်တအ် ဂွံပါဗက်လ္တူစၚ်ဂၠးတိခေတ်ဂလိုဗယ်ဏအ်မာန် ဒးလးဂၠံၚ်တၟိ လညာတ်တၟိ ကသပ်တၟိ ဒးပြံၚ်လှာဲတြေံကဵုတၟိမာန်ရောၚ်။
ဇၟာပ်တြေံလေဝ် ညံၚ်ရဴဒှ်အရာပရေံဖအိုတ်ဟွံသေၚ် ဇၟာပ်တၟိလေဝ် ခိုဟ်ဖအိုတ်ဟွံဒှ်။
အကြာ ခိုဟ်ကဵု ပရေံဂှ် ဇကုဒးချပ်လေပ်ရောၚ်။ ဟိုတ်နူချပ်ဗၠေတ် လညာတ်အတ္တလုပ်ဇၞော်အာတုဲ ဂကူမန် ဍုၚ်မန် ဒးစိုပ်အာဘဝဍိက်ဂှ် လ္ပဝိုတ်သတိညိ။ သၟတ်ဂကူကဝ်ရဳယျာတအ် အာယုက်ပေၚ် ၁၈ သၞာံတုဲမ္ဂး လုပ်အဝေါၚ်မၞိဟ်ဇၞော်ဇၞော်တုဲ ဍေံတအ်ဟွံကေတ်ဓယံက်မိမကောဒေံ နကဵုကသပ်လညာတ်ဗဟုသုတ ဍေံတအ်ကဵုဍေံတအ် စပ္တန်ကၠုၚ်ဘဝမၞိဟ်ဍေံတအ် ဂွံဗှ်ကေတ်ပ္ဍဲလိက်ပရိုၚ်ရ။ ကသပ်ဇကု ဟွံသၠဲလး၊ လညာတ်ဇကု ဟွံမွဲကဵုပွတဴတက်ဏီမ္ဂး ဒးလုပ်ကဵုတၠကသပ်ညာဏ်ဇၞော် တၠပညာတအ်ဖအိုတ်ရ။
ပ္ဍဲဗွိုက်ဂကူမန်ခေတ်တၟိဏအ် ကသပ်ပံက်ဒက်ကမ္မဏဳ ပံၚ်ကၠောန်ကမၠောန်ဂှ် ချပ်ကဵုဂၠိုၚ်ညိ၊ ယဝ်ညဳသာညးသ္ကအ် ကသပ်ဘဝအနာဂတ် ဂွံဇၞော်မောဝ် ယဝ်ညာတ်တုပ်ဒှ်မွဲကသပ်မ္ဂး ကုမ္မဏီသွံကၠေၚ်သ္ကဲဂၠံၚ်ဇၞော် ညံၚ်ရဴဆေၚ်သွံကၠေၚ်ရာမာန်၊ မေန်တ တအ်ဂှ် ဒှ်ဒြပ်ပူဂဵု (ပုဂ္ဂလိက) တုဲ ဍေံတအ်သွံဂွံ။
ကာလ ဒးပံၚ်ကၠောန်ညးသ္ကအ်ဟွံဂှ် ဒးပြံၚ်လှာဲထောံမာန်ရ။ ဖအောန်ကသပ်အတ္တဇကုမွဲဓဝ်မာန်မ္ဂး ပံၚ်ကၠောန်ညးသ္ကအ်မာန်ရောၚ် ထေက်ကဵုဒးညာတ် ထေက်ကဵုဒးပလေဝ်ကသပ်ပရေံထေက်ရ။ အပါပိုယ်ကၠောန်ဗ္ၚ တဵုကၠအ်တုဲ ပိုယ်ဂွံဗ္တောန်ပညာ ကလိဂွံတဆိပ်ကြာတုဲမ္ဂး ပိုယ်ဒးရပ်စပ်ကမၠောန်မိမပိုယ်ကၠောန်ကၠုၚ်ပၠန်ရောၚ်၊ ကသပ်ဗီုဏအ် ချပ်လဝ်ဟွံထေက်။
လိက်အုပ် အာရီုဆဌမ၊ နာဲအံၚ်ဇၞး (ရုတ္တံၚ်)။ တက်တြးပတိတ်နူ အစဳအဇန် MYMN
This article uses material from the Wikipedia မန် article ပွမပြံၚ်လှာဲကသပ်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.