ညာဏ်ကဵုဇၞော်သၠဲ
စာမျက်နှာသည် အခြားဘာသာဖြင့် မရှိသေးပါ။
ဥာဏ်ကဵုဇၞော်သၠဲ
ပေဲါဗ္တိုက်လောကဓဝ်ဂှ် ဒးသုၚ်စောဲညာဏ်ရ၊ ညာဏ်နွံမ္ဂး ဟွံဒးဒုၚ်ကျကဵုလောကရ၊ ဟိုတ်နွံမှဖိုလ်ဒှ်၊ သ္ဘဴဒှ်ကဵုလီုဂှ် စဒးရံၚ်နကဵု မတ်ညာဏ်ရ၊ ဒှ်လေဝ်လ္ပမိပ်စိုတ် လီုလေဝ်လ္ပအောန်စိုတ်။ လောကဝွံ ဒိုက်သိုက် သၠုၚ်သဝ် အံၚ်ဇၞး ကျဗြမ်တအ် တောဲစပ်မံၚ်ညးသ္ကံဂှ် နကဵုညာဏ်သ္ၚဳရံၚ်ညိ၊ ညာဏ်မၞုံပ္ဍဲမၞိဟ်ဂှ် ဒၞဲါဍေံကဵုဍေံ ဗီုညးကဵုညး သ္ၚဳသပေါတ်လေပ်ရောၚ်၊ ကာလဂှ်မ္ဂး တီကၠိုဟ်ကေတ်သ္ဘဴလောကဏံတုဲ ညံၚ်ဂွံကိတ်ညဳကဵုလိုက်ဂှ် မံၚ်စံၚ် အာလုပ်ရ။ အရာအရာအိုဿီု ညာဏ်ပညာဒးအာက္ဍိုပ်ရ၊လက်ကြဴဂှ် ဝဳရိယလေဝ်ကဵုပါကၠုၚ်ကီု ညာဏ်ပညာဝဳရိယပံၚ်ဗ္စပ်ညးသ္ကံမာန်မ္ဂး၊ ကမၠောန်ဇၞော်မောဝ်မာန်ရ၊ ညာဏ်နွံကဵုဝဳရိယ နွံဂှ်ဟွံတုပ်ညးသ္ကံရ၊ ဝဳရိယနွံဂှ်ဟွံလောဲ ညာဏ်ဂွံနွံဂှ်ဒှ်ဝါတ်ညိရ။ ညာဏ်ဍာံဍာံဂှ် ချပ်တုဲ ဝဳရိယနွံနွံ ကၠောန်မ္ဂးကမၠောန်ဂှ် ဟွံဒှ် လလေၚ်ဖိုလ်ရ၊ ဖိုလ်ဗၞတ်ဒှ်ထေက် ကၠိဂွံတွဵုရ၊ ဒးကၠောန်ကမၠောန်မွဲမွဲ နူကၠာဟွံဂွံကၠောန်ဏီ နကဵုညာဏ် ချပ်ဖျေံလဝ်ကိုန်အစဳဇန်ကၠာညိ၊ ကမၠောန်ဇၞော် ဒးချပ် ပါ်ပဲါဂၠိုၚ် ကမၠောန်ဇကုဍောတ်သွတ်ကီုလေဝ် ဒးချပ် ဖျေံလဝ် ကိုန်အစဳဇန်ကီုရ။ ပရေၚ်ပါ်ပဲါ ချပ်စၚ်ခြၚ်ဂှ် ဝါတ်လ္တူနူပရေၚ်ကံဏီ၊ ကံဟေၚ်မိမလောကဓမ္မတာ ၜိုန်ဟီုလဝ်နွံကီုလေဝ် ဝဳရိယကဵုညာဏ် ဒးပါလုပ်မံၚ်ကီုရ၊ ညာဏ်ဟွံပါလုပ်မ္ဂး ကံကဵုဖိုလ် ဟွံကေတ်သကာရ၊ တိဟိုတ်ကံဂှ် ဒှ်ကံညာဏ်ပါလုပ်ရ။ ဘုံမၞိဟ်ဂှ် ဒှ်ဘုံဍိုက်ပေၚ်ကဵု ကံညာဏ်ဝဳရိယရ၊ ကံမွဲဓဝ်သ္ပဇြဟတ်ဟွံဂွံ ညးလ္ၚဵုဟီုစမံၚ် ညာဏ်နွံကံဟွံမွဲမ္ဂး ဒှ်မၞိဟ်ဝါတ်ခဲါ ဒှ်ကွေံ၊ ဆဂး အောန်လောန်ရ၊ ညာဏ်နွံမ္ဂးဝါတ်ဟွံဂိ ကံအတိက်ကဵု ကံပစ္စုပ္ပန် ဟွံဆာဲမ္ဂး ဒှ်မၞိဟ်ဝါတ်ကျာတ်ဍာံမွဲရ။ ‘‘ ပသဿရစိတ္တံ ’’ စိုတ်မၞုံပ္ဍဲပိုဲမၞိဟ်ဂှ် သ္ဘဴပကတိဍေံဗုဇြုၚ်ကေဝ် လျးတိတ်မံၚ်ဏောၚ် ဟိုတ်နူဍေံပံၚ်ကဵုစေတသိက်ပရေံတုဲ သ္ဘဴစိုတ်လေဝ်ပရေံအာကီုရ၊ ပ္ဍဲဇကုညာဏ်နွံမ္ဂး စိုတ်စေတသိက်ပရေံပရေံတံဂှ် ဟွံဒးပံၚ်ရ၊ ညာဏ်နွံမ္ဂး ဝေၚ်ပဲါပရေံမာန်ရ။ ဟိုတ်မွဲမွဲ ကမၠောန်မွဲမွဲ ပံၚ်ဗ္စပ်ကဵုညာဏ်တုဲ ဖျေံသ္ဂုတ်သွာတ် လ္ပာ်ဍာံမ္ဂး ဒှ်ၚုဟ်မးဇၞော်ရ၊ ကၠောန်ကမၠောန်မ္ဂး ဒးသုၚ်စောဲညာဏ်ရ၊ ညးတၞဟ်ဟီုထ္ၜး ကဵုကသပ် ကလၚ်လဝ် ဖျေံသ္ဂုတ်သွာတ် နကဵုညာဏ် မၞုံပ္ဍဲဇကုညိ။ ကံခိုဟ်သၟးဂှ် ဘဝသၠုၚ်မာန်ဟွံသေၚ် ဒးခိုဟ်သီုညာဏ်ဝဳရိယရောၚ်။မၞိဟ်ညာဏ်အောန်ဂှ် ဒးဒုၚ်ပရတ်ကဵုမၞိဟ်ညာဏ်ဂၠိုၚ်တံရ၊ မၞိဟ်ဝါတ်ခဲါဂှ် ဒှ်မၞိဟ်ညာဏ်အောန်ရ၊ မၞိဟ်ညာဏ်ဇၞော် တတ်ကၠောံဒံၚ်သၠာ် လောကဓဝ်ပရေံပရေံမာန်ရ။ ‘‘ ညာဏ်နွံမ္ဂး စိုတ်ဓါတ်ခိုၚ်ဗိုန်ရ ’’ မၞိဟ်စိုတ်ဓါတ်ခိုၚ်ဂှ် ကၠောန်ကမၠောန် ဇၞော်မောဝ်ဂၠိုၚ်ရ၊ ပညာကလိဂွံနၚ် နူသွာၚ်လောကုတ္တဵုဂှ် ကဆံၚ်သၠုၚ်နူပညာ သွာၚ်လောကဳဏီရ။ ညာဏ်ပညာ ကၠုၚ်နူသွာၚ်လောကတ္တဵုဂှ် သ္ပဂုဏ်ဖိုလ်သွက်ညးလောကတံတုဲ ညာဏ်ပညာကၠုၚ်နူသွာၚ်လောကဳဂှ် လ္ဆောဝ်လ္ဆောဝ် ပ္တုဲဖိုလ်ကဵုညးဂမၠိုၚ်ဒှ်ဒဒိုက်နွံရ၊ အ္စာသိပ္ပံကၠောန်ဗုၚ်ဂျိကၠောန်လွဟ် မကံဂျိ မပ္တံသာ်ဝွံရ။ ‘‘ ဗာဟုသစ္စဥ္စ သိပ္ပဥ္စ ’’ ကွတ်ပညာလုပ်အာအဝေါၚ်မ္ၚဵုဂှ် ဒှ်ကွတ်ပညာ ပ္တုဲဂုဏ်ဖိုလ်ကဵုညးဂမၠိုၚ်ရ၊ ညာဏ်ပညာ ဟွံဒှ်ဂုဏ်ဖိုလ် သွက်မၞိဟ်ဂမၠိုၚ် ဟွံဒှ်မ္ၚဵု ပ္ဍဲလောကမၞိဟ်တံရ။ ညာဏ်ပညာ ပံၚ်ဗ္စပ်ကဵုဒ္ဂေတ်သိက္ခာ စာရိတ္တမၞိဟ်တံဂှ် ဂၠိုၚ်ကၠုၚ်ပ္ဍဲသွာၚ်တၞောဝ်သၟတ်တၟိတံမ္ဂး လောကမၞိဟ်ဝွံ ရာၚ်ဆာဲၜိုဟ် သြိုဟ်ကျေဝ်ဂေါဝ်ကၠုၚ်မာန်ရ။ ကျာ်ဇၞော်အ္စာမဟာထေရ်ပါလိတ
This article uses material from the Wikipedia မန် article ညာဏ်ကဵုဇၞော်သၠဲ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.