З.түмэнжаргал, С.баатарсүх Халтар Манан Хөөрөг

Шүлэг: З.Түмэнжаргал

ХАЛТАР МАНАН ХӨӨРӨГ 

Эргэн эргэн золгох бүрийдээ

Эрдэнийн чулуун хөөрөг зөрүүлнэ ээ

Эцэг өвгөдийн минь заншил сахисан

Эрхмийн дээд тэмдэг юм аа хө

Дт: Хайртай л аавын минь үнэр шингэсэн

Халтар манан хөөрөг юм аа хө ...

Учран учран золгох бүрийдээ

Уран чулуун хөөрөг зөрүүлнэ ээ 

Эрийн жудгаар нөхрөө хүндэлсэн 

Ээнэгхэн сэтгэлийн тэмдэг юм аа хө

Дт: Хайрхан уулын минь бүлээн хэлтэрхий

Халтар манан хөөрөг юм аа хө ...

Ахин ахин золгох бүрийдээ

Алтнаас цэнэтэй хөөрөг зөрүүлнэ ээ

Амин хэлхээ нутгаа тахисан

Андгай журмын тэмдэг юм аа хө

Дт: Халуун өвөртөө хадгалж явдаг л

Халтар манан хөөрөг юм аа хө  

Энэ дуу 1993 онд төржээ. Хөгжмийг зохиосон С.Баатарсүх бурхны оронд явсан аавыгаа санан, хөөргийг нь бариад сууж байхад энэ дууны аялгуу ороод ирэхэд нь З.Түмэнжаргалыгаа дуудаж шүлэг бичүүлсэн хэмээн дурсдаг. Тэрээр энэ дуугаа "Хөөрөгний тухай бараг анхны дуу байх шүү" хэмээсэн байдаг.

Шүлгийг бичсэн Загдын Түмэнжаргал арван хэдтэй залуу хүү байхдаа С.Баатарсүхийн "Цэнхэр залаа" гитарын гоцлол анх гараад яваад эхлэнгүүт гоё санагдаад байхаар нь "Цэцгэн заяа" нэртэй шүлэг бичиж ирсэн нь "Цэцгэн зүйрлэл" дуу болж дуучин Х.Галхүүгийн дуулснаар нийтэд түгсэн сонирхолтой түүх байдаг.

Жич: Дуучин СТА Т.Аминагийн урын сангийн хит бүтээлүүдийн нэг, диско бүжгийн хэмнэлтэй шинэ жилийн поп дуу "00" цаг нь хоёр уран бүтээлчийн маань хамтын бүтээл юм.

Энэ дуу МУГЖ Д.Сосорбарам, дуучин Г.Мөнхбаяр, Б.Батжаргал (СТА), Б.Батчулуун, П.Баярмагнай зэрэг уран бүтээлчдийн урын санд орж дуулагдсан байдаг.

YouTube, 2022-12-26, ХАЛТАР МАНАН ХӨӨРӨГ МУСТА Дуучин П.Баярмагнай