Стефан Марковски

Стефан Марковски е роден во Гевгелија, каде завршил основно и средно образование. Дипломирал на Катедрата за општа и компаративна книжевност при Филолошкиот Факултет „Блаже Конески“, како и на Институтот за Филозофија на Филозофскиот факултет при Универзитетот „Св. Кирил и Методиј“ во Скопје.

Магистрирал Филмско и ТВ сценарио на Факултетот за Драмски Уметности.

Пишува уште од основноучилишните денови, кога ги завршил и своите први книги.

За романот „Еднонасочно“ во 2009-та ја добил наградата „Петре М. Андреевски“ за роман на републичко ниво од Фондацијата „Рамковски“.

Во 2014-та му е врачено признанието на Општина Гевгелија – „7 ноември“ за достигнувања во културата и придонес во културната афирмација на градот.

Добитник е на „Гран При“ на поетскиот фестивал „Литературни Искри“ – Гостивар, како и на наградата „Македонска книжевна авангарда“ за збирката раскази „Продавачот на ветар и магла и други приказни“.

За поетската збирка „Сиво сјаат вселените“ во 2016-та ја добил наградата Бели мугри[1] Архивирано на 4 декември 2016 г., а следната година и наградите Крсте Чачански и Книжевно перо од Хрватското книжевно друштво за збирката кратки раскази „Смртта долетува насмевната“, Книжевен круг за „Фауст го трча плебејскиот круг“.

Ја добил и наградата „Празник на липите“ од Друштвото на писателите на Македонија во 2022 година за најдобра песна напишана по повод истоимената манифестација.

Добитник е и на неколку домашни и странски награди за есеи, филмско сценарио, како и на книжевни резиденции.

Застапен е во повеќе меѓународни антологии. Објавува студии и статии во различни списанија за литература, уметност, наука и филозофија од земјата и странство.

Извадоци од неговото творештво и книги се преведени и објавени на повеќе јазици.

Марковски е главен и одговорен уредник на списанието за литература, култура и уметност „Современост“ и е член на редакцијата на ревијата „Стожер“ во издание на Друштвото на писателите на Македонија.

Уредник е и на поетските збирки вклучени во проектот „Метрички карван“.

Член е на Друштвото на писателите на Македонија, платформата Версополис, Македонскиот центар на Меѓународниот театарски институт (ИТИ) и други меѓународни асоцијации.

 

Марковски е автор на дела од повеќе области и жанрови, вклучувајќи прозни, поетски, драмски и теориски книги.

• Романи: Еднонасочно, 2009; Еретички писма или наоѓајќи ги небата што сјаат црвено, 2018; Анатомија на бумбарот, 2021.
• Раскази: Продавачот на ветар и магла и други приказни, 2015; Смртта долетува насмевната, 2017, Фауст го трча плебејскиот круг, 2020.
• Поезија: За некои спомени од онаа некогашност, 2010; Апеирон, 2010; In Nomine, 2016; Сиво сјаат вселените, 2016; По трагата на белиот грифон; 2018, Хипербог, 2019; Алгоритмеа: Евлогија за дигиталните богови, 2022.
• Психолошки и филозофски дела: Хиерархиска еволуција на свеста, 2012; Мета(де)конструкција и општа филозофија, 2012; Среќата е глагол, 2013
• Драма: Мајстори за огледала, 2019.
• Теорија: Потенцијалите на жанрот крими-драма преку сценариото за игран филм „Се викам Слобода“, 2019.

Во 2019-та бил објавен и поетски избор од Марковски на македонски и англиски јазик насловен Promised Land.

Неговите романи „Еретички писма или наоѓајќи ги небата што сјаат црвено“ и „Анатомија на бумбарот“, како и збирката раскази „Фауст го трча плебејскиот круг“ се исто така објавени на англиски јазик и достапни на голем број меѓународни книжевни платформи.

Покрај своето книжевно творештво, Марковски е автор на трудови, меѓу кои и на прегледен труд од областа на неврофилозофијата, насловен „Улогата и влијанието на неврофилозофијата врз современите когнитивистички и физиолошки парадигми за свеста“, објавен во 2018 година, како и „Вештачката интелигенција и можноста за програма-генератор на текстови на македонски литературен јазик“, студија која ги анализира можностите за развивање оперативна вештачка интелигенција на македонски јазик.