Film Tenggelamnya Kapal Van Der Wijck: Pilem Indonesia

Film ko diadaptasi dari novel bajudul samo karangan Buya Hamka. Tenggelamnya Kapal Van der Wijck mancaritokan tentang pabedaan latar balakang sosial nan manghalangi hubungan cinto sapasang kekasih sampai kematian. Diproduksi dek Soraya Intercine Films, film ko antaro lain dibintangi dek Pevita Pearce, Herjunot Ali, Reza Rahadian, jo Randy Danistha.

Jo biaya produksi nan tinggi, Tenggelamnya Kapal Van der Wijck manjadi film tamaha nan pernah diproduksi dek Soraya Intercine Films. Proses produksinyo surang manghabiskan waktu salamo limo tahun, jo panulisan skenarionyo dilakuan salamo duo taun. Film ko dirilis pado tanggal 19 Desember 2013.

Balatar tahun 1930-an, dari tanah kalahirannyo Makassar, Zainuddin (Herjunot Ali) balayia manuju kampuang halaman apaknyo di Batipuh, Padang Panjang. Di sinan, inyo batamu jo Hayati (Pevita Pearce), saurang gadih rancak jalito nan manjadi bungo di pasukuannyo. Kaduo mudo-mudi ko jatuah cinto. Namun, adaik jo istiadaik nan kuek maruntuhan cintonyo baduo. Zainuddin hanyo saurang malaraik nan indak basuku; karano amaknyo badarah Bugih jo apaknyo badarah Minang, statusnyo dalam masyarakaik Minang nan matrilineal indak diakui. dek karano itu, inyo dianggap indak mampunyoi patalian darah jo kaluarganyo di Minangkabau. Sadangkan Hayati adolah padusi Minang santun katurunan bangsawan.

Pado akhirnyo, lamaran Zainuddin ditulak kaluarga Hayati. Hayati dipaso manikah jo Aziz (Reza Rahadian), jantan kayo tapandang nan labiah disukoi kaluarga Hayati daripado Zainuddin. Kacewa, Zainuddin pun mamutuihan untuak bajuang, pai dari tanah Minang jo marantau ka tanah Jawa untuak bangkik malawan katapurukan cintonyo. Zainudin bakarajo kareh mambuka lambaran baru hiduiknyo. Sampai akhirnyo inyo manjadi panulih takenal jo karya-karya masyhur nan ditarimo masyarakaik saluruh Nusantara.

Tapi sabuah paristiwa indak disangko datang manghampiri Zainuddin. Di tangah bagalimang harato jo kamansyhurannyo, dalam sabuah patunjuan opera, Zainuddin kambali batamu Hayati, kali ko basamo Aziz, suaminyo. Pado akhirnyo, kisah cinto Zainuddin jo Hayati manemui ujian tabareknyo; Hayati pulang ka kampuang halamannyo jo manaiki kapa Van der Wijck. Di tangah-tangah pajalanan, kapa nan dinaiki Hayati tanggalam. Sabalum kapa tanggalam, Zainuddin mangatahui bahwa Hayati sabananyo masih mancintainyo.

• Pevita Pearce sabagai "Rangkayo" Hayati
• Herjunot Ali sabagai Zainuddin
• Reza Rahadian sabagai Aziz
• Randy Danistha sabagai Muluk
• Arzetti Bilbina sabagai Ibu Muluk
• Kevin Andrean sabagai Sophian
• Jajang C. Noer sabagai Mande Jamilah
• Niniek L. Karim sabagai Mak Base
• Musra Dahrizal Katik Rajo Mangkuto sabagai Datuk Hayati
• Gesya Shandy sabagai Khadijah
• Femmy Prety
• Dewi Agustin

Tenggelamnya Kapal Van der Wijck diadaptasi dari novel mahakarya sastrawan sakaligus budayawan Haji Abdul Malik Karim Amrullah, atau Hamka, nan manjadi film tamaha nan pernah diproduksi dek Soraya Intercine Films. Sutradara film ko, Sunil Soraya, manegaskan bahwa hal ko disebabkan karano harus mambuek suasana carito film sarupo nan dikisahkan pado taun 1930-an sasuai jo era novel. Salain tu, juo banyak riset jo hal-hal lainnyo nan wajib dipanuhi untuak mandapekan gambar nan maksimal, nan juo mambuek ongkos produksi tinggi.

Observasi, proses praproduksi, pamilihan pameran, sampai panulisan skenariopun dimulai sajak taun 2008, nan artinyo alah bajalan salamo limo taun. Sunil manyatokan bahwa inyo sempat ragu kalau film ko dapek disalasaikan karano cukuik panjang prosesnyo. Salah satu elemen tasulik adolah manamukan kapa nan manyarupoi kapal Van der Wijck pado taun 1930-an. Pado akhirnyo, replika kapa dibuek ulang jo mamasan kapa dari Belanda, nan memang manjadi produsen asli kapal Van der Wijck.

Untuak proses panyuntingan dilakukan salamo 4-5 bulan satalah proses syuting salamo 6 bulan jo 300 adegan. Hasilnyo, film ko barakhia jo durasi salamo 2 jam 49 minik. Saluruh kostum dalam film ko dibuek dek parancang busana Samuel Wattimena. Sadangkan untuak panulisan skenario mangalami proses revisi salamo babarapo kali karanosutradara nio manyampaikan samangek jo pasan novel Hamka, indak hanyo manyajikan kisah cinto biaso. Riset nan dilakuan untuak latar jo properti otentik sarupoi oto, baju, jo barang-barang era 1930-an, juo mambutuhkan waktu nan indak singkek. Proses pangambilan gambarnyo surang dilakuan di Medan, Padang, Surabaya, Lombok, jo Jakarta.

Kasulitan lainnyo adolah sang sutradara juo harus mancari lauik nan indak mampunyoi ombak kancang, karano kapa Van der Wijck dicaritokan tanggalam indak karano ombak gadang. Samantaro tampek syuting lauiknyo kancang bana. Akhianyo tim produksi mandatangkan tanago ahli dari luaa untuak manampilkan efek tanggalam tanpa manggunokan animasi. Salah saurang panulih skenario, Donny Dhirgantoro manjalehkan skenario ditulih salamo duo taun jo riset nan mandalam. Basamo jo Imam Tantowi, kaduonyo manyusun skenario nan sasuai jo era tasabuk manganai kapa sampai adaik Minang untuak manjadi bahan bagi para pamain film.

Grup musik Nidji dipacayo sabagai pangisi jalua suaro untuak film ko jo mampasiapkan ampek buah lagu. Gitaris Nidji, Andi Ariel Harsya, baperan sabagai produser untuak album jalua suaro tasabuik. Proses rekaman lagu-lagu ko malibatkan sahabat Nidji dari Inggris, Jason O`Bryan. Singel patamo nan dipiliah bajudul Sumpah & Cinta Matiku. Nidji manyatokan mamasukan konsep pop Britania jo unsua musik gregorian untuak mambari kasan megah jo kolosal.

Satalah poster film ko dirilis, sajumlah masyarakaik Minang nan tagabuang dalam sabuah grup di jajaring sosial Facebook memprotes poster film ko nan manuruiknyo indak sasuai jo adaik jo budayo Minang nan sangaik manjunjuang tinggi ajaran Islam. Inyo mangklaim bahwa poster ko marupokan bantuak "pamarkosaan tahadap karya Hamka, karano Hayati nan diperankan dek Pevita Pearce marupokan gadih Minang nan kuek adaik jo agamo, indak mamakai baju tabukak sarupo nan ado di poster."

Tenggelamnya Kapal Van der Wijck barhasil mandatangkan penonton sabanyak 1.724.110 salamo maso panayangannyo pado taun 2013. dek karano itu, film talaris taun 2013 ko kambali diputa di bioskop pado tanggal 11 September 2014. Film ko alah diputa versi extendednyo jo durasi nan labiah panjang daripado versi nan diputa sabalumnyo, yakni 3,5 jam.

• (Inggirih) Tenggelamnya Kapal van der Wijck di IMDb
• (Indonesia) Situs Resmi Soraya Intercine Films