Sinar Soematra

Surek kaba iko tabik dari 1904 hinggo 1942. Surek kaba iko tabik satiok hari, kecuali hari Minggu jo "hari nan dimuliaan". Redaksi Sinar Soematra baralamaik di Kampung Pondok, sabuah kawasan pecinan di Kota Padang. Parcetakannyo dilakuan dek parusahaan banamo “De Volharding” di alamaik nan samo.

Indak diketahui susunan redaksi awal surek kaba iko. Dari 1918 hinggo 1921, surek kaba iko dipimpin dek Liem Koen Hian. Dalam tulisan-tulisannyo, inyo manunjuakan sikap nasionalisme Tionghoa jo manantang aturan pamarentah Hindia Balando nan manyatoan warga Tionghoa di Indonesia sabagai pandukuang Balando. Sasudah malapeh jabatannyo di Sinar Soematra, inyo pindah ka Surabaya sabagai pamimpin redaksi Pewarta Soerabaia milik The Sian King.

Salanjuiknya, catatan Parada Harahap katiko bakunjuang ka Padang pado 1926 manyabuikan Sinar Soematra dipimpin dek urang dari babagai latar balakang etnik, antaro lain A. van Tijn, Jap Gim Sek, P.H. Bok, jo Abisin Abbas. Lalu, sakitar tahun 1940, surek kaba iko dipimpin dek A.M. Dt. Sinaro.

Halaman sampul surek kabar iko manampilan tanggal edisi dalam versi Latin jo Arab.

Edisi surek kaba iko tabik sabanyak 8 halaman. Sacaro umum, isinyo tabagi dalam duo bagian. Bagian patamo barupo barito, editorial, jo artikel kiriman pambaco. Bagian kaduo didominasi dek iklan.

Sinar Soematra manyadioan rubrik khusus untuak padusi dan manjadi salah satu surek kaba nan banyak maulas tantang babagai aktivitas padusi. Di antaro nan disorot adolah panangkapan Rasimah Ismail jo Rasuna Said, kaduanyo adolah pangurus Partai Persatuan Muslim Indonesia (Permi), dek pamarentah kolonial Balando. Mereka marupoan panentang kabijakan Ordonansi Sekolah Liar dan dengan tegas manyuaroan kamerdekaan Indonesia. Keberanian mereka, ditulih Sinar Soematra, alah mampakek samangaik nasionalisme jo parjuangan masyarakaik Minangkabau untuak merdeka dari kolonialisme Balando.

• Sinar Deli