Kalio adolah samba tradisional Minangkabau sahari-hari, samba kalio banyak basobok di rumah urang Minang.
Kalio marupokan namo lain dari randang satangah jadi, nan masih bawarna kacoklatan dibandiang randang jadi nan bawarna cokelat kaitaman. Kalio labiah malakek jo basah sarato aroma karamel nan kuek, samantaro randang labiah kariang, teksturnyo kasa, mangaluaan aroma pamasak nan tajam. Umumnyo kalio dijua sabagai randang di Rumah Makan Padang di lua Sumatra Barat karano durasi mamasak labiah pendek sahinggo labiah praktis jo ekonomis untuak disajian. Salain itu, rasonyo indak padeh bana jo dagiang nan dimasak sarato indak pulo sakareh randang.
Samo takah randang, isi kalio biasonyo dagiang jawi, ayam, limpo, hati jawi atau jariang. Hati, limpo, jariang, jo kantang biasonyo labiah banyak dimasak manjadi kalio sabab acok hancua wakatu diaduak dan talampau kareh wakatu alah manjadi randang.
Pamasak nan di pakai untuak mambuek samba kalio adolah lado sirah , bawang sirah , bawang putiah, sipadeh, lingkueh, kunik alah tu garam. Salain dari tu ado dadaunan nan dimasuakan iyolah daun kunik, batang sarai nan batokok, daun limau puruik, jo katumba nan dimasuakan basamo-samo jo bumbu lainnyo dalam kuali sarato jo pati santan karambia. Salapeh santan lah manggalagak, bamasuakan bahan utamonyo nan lah di karek-karek.
This article uses material from the Wikipedia Minangkabau article Kalio, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.