Reforma Protestante

Considérase xeneralmente que'l procesu entamó cola espublización de Les 95 tesis de Martín Luteru, en 1517, y nun finó hasta l'acabación de la Guerra de los Trenta Años, en 1648.

Magar qu'hebo intentos anteriores de reformar la Ilesia católica -los de Jan Hus, Pedru Valdo, John Wycliffe o Girolamo Savonarola, por exemplu- considérase davezu que foi Luteru, cola espublización de les sos 95 tesis, el qu'entamó la Reforma. Luteru entamó criticando la venta d'indulxencies, afirmando que'l papa nun tenía autoridá denguna sobro'l purgatoriu y que la doctrina católica de los méritos de los santos nun taba basada en dengú testu bíblicu. La Reforma protestante incorporó cambeos doctrinales como la sola scriptura, la confianza completa na Biblia como única fonte de fe, y la sola fide, la creyencia en que namái la fe en Xesucristu, y non les bones obres, ye l'únicu camín pa obtener el perdón de Dios polos pecaos. Magar que la principal motivación d'esos cambeos doctrinales foi teolóxica, hebo otros factores qu'influyeron nel desarrollu de la Reforma: l'ascensu del nacionalismu; el Cisma d'Occidente, que deterioró la llealtá al papáu; la perceición xeneralizada de la corrupción de la Curia Romana; l'impautu del humanismu; y la influyencia del Renacimientu, que cuestionó sistemáticamente'l pensamientu tradicional.

El movimientu reformista inicial, desarrolláu n'Alemaña, ramificose bien ceo, cola aparición d'otros reformadores independientes de Luteru, un procesu favorecíu por l'espardimientu de la imprenta, que permitió la rápida difusión d'obres relixoses en llingua vernácula. Los movimientos protestantes con más siguidores foron el luteranismu y el calvinismu. Fundáronse ilesies luteranes n'Alemaña, los países bálticos y escandinavos, y ilesies reformaes (calvinistes) en Suiza, Hungría, Francia, Países Baxos y Escocia. El movimientu reformista influyó tamién na Ilesia d'Inglaterra dempués de 1547, nos reinaos d'Eduardu VI y Sabela I, magar que la Reforma anglicana yá entamara anantes, na década de 1530.

Los movimientos reformistes radicales surdíos na Europa continental foron l'orixe de movimientos como l'anabaptismu, la Hermandá de Moravia y otros movimientos pietistes. Los reformistes radicales, amás de formar comunidaes nes que pretendíen vivir al marxe de los estaos, llevaron los cambios doctrinales hasta l'estremu, renegando inclusive de les doctrines de los conceyos de Nicea y Calcedonia.

La Ilesia católica respondió a estos movimientos con una Contrarreforma, encabezada por una nueva orde relixosa, la Compañía de Xesús, a partir de les directrices del conceyu de Trento. La Europa septentrional, sacante Irlanda, Polonia y Lituania, quedó embaxu la influyencia del protestantismu, mentantu que la meridional siguió siendo católica: la Europa central foi l'escenariu de les engarradielles relixoses qu'acabaríen provocando la guerra de los 30 años.

• Comentarios de Calvino sobre la Biblia (n'inglés)
• Protestantismu n'Asturies (en castellanu)