आशीष अनचिन्हार

अनचिन्हारजी अपन परिवारक सभसँ छोट छथि। हुनकासँ नमहर दूटा भाय श्री गोविन्द मिश्र (पत्नी-श्रीमती ममता मिश्र), श्री मनोज कुमार मिश्र (पत्नी-श्रीमती हेमा मिश्र) आ बहीनि रिंकी झा (पति-श्री अरूण झा) छथिन। बाबा- स्व. अनिरुद्ध मिश्र (स्व. भुवनेश्वरी देवी)। मामा गाम- जजुआर, नाना- स्व. भाग्यनारायण ठाकुर, नानी-सोन दाइ, जेठ मामा- स्व. वशिष्ठ नारायण ठाकुर, छोट मामा- श्री घनश्याम ठाकुर। अनचिन्हारजीक प्रारंभिक शिक्षा गामक इस्कूलमे भेलनि तकरा बाद मैट्रिक बिस्फीक इस्कूलसँ। एकर बादक शिक्षा कलकत्तासँ पूर्ण भेलनि।

नेनपनेसँ तुकान्त जोड़बाक आदति सन् २००१ मे गजलक रूपमे बदलि गेलनि । प्रारम्भमे अनचिन्हारजी गीत, व्यङ्ग्य, कविता ओ कथा सेहो लिखलाह मुदा सन् २००१ मे ई पूर्ण रूपेण गजल सीखब शुरू केलनि आ सन् २००८ मे गजल केन्द्रित ब्लाग अनचिन्हार आखर केर निर्माण केला । एहि ब्लागसँ एखन धरि अनचिन्हारजी कुल ३०-३२ टा मैथिली गजलकारकेँ प्रशिक्षित कऽ मैथिली गजलकेँ विस्तार देलाह। हिनक एक गीत रेकार्ड भऽ कऽ सेहो "बम-गोला" नामक एलबममे आएल अछि।

• अनचिन्हार आखर (गजल, रुबाइ ओ कता सङ्ग्रह)
• मैथिली गजलक व्याकरण ओ इतिहास(ई भर्सन प्रकाशित)
• मैथिली वेब पत्रकारिताक इतिहास (ई भर्सन प्रकाशित)
• जंघाजोड़ी (गजल संग्रह, ई भर्सन प्रकाशित)
• मैथिली गजलक Ready Reckoner (मैथिली गजल व्याकरणक संक्षिप्त रूप, ई भर्सन प्रकाशित)
• कुमारि इच्छा (गजल संग्रह, ई भर्सन प्रकाशित)
• शब्द-अर्थ-शक्ति (स्वतंत्र रूपे मैथिली गजलक पहिल आलोचना पोथी, ई-भर्सन प्रकाशित)
• संदर्भ सहित (गजल-आलोचना)

संपादित पोथी-

1) स्वतंत्रचेता (अरविन्द ठाकुर: व्यक्तित्व-कृतित्व, विदेहक अरविन्द ठाकुर विशेषांक केर संशोधित रूप, बर्ष-२०२० शशि प्रकाशन, कालिकापुर, सुपौल)

2) नबोनारायण मिश्र समग्र (ई-भर्सन प्रकाशित)

गजेन्द्र ठाकुरक संगे सह-सम्पादित पोथी

• मैथिली गजल:आगमन ओ प्रस्थान बिन्दु (गजलक आलोचना-समालोचना-समीक्षा), ई-भर्सन प्रकाशित
• मैथिलीक प्रतिनिधि गजल (१९०५सँ २०१६ धरि), ई-भर्सन प्रकाशित

एकर अतिरिक्त विभिन्न पत्र-पत्रिकामे विभिन्न विधाक रचना सभ प्रकाशित। हिनक व्यंग्य केर हिंदी अनुवाद सेहो भेल अछि।

गजलक अतिरिक्त अनचिन्हार जी बहुत रास आलोचना लिखने छथि जे कि अपन एकटा खास शैली आ बेबाकीक कारणे विवादित भेल आ बहुसङ्ख्य मैथिलीक गुटबाज साहित्यकार सभ द्वारा अनचिन्हारजीक जानि बूझि कऽ बहिष्कार सेहो भेल मुदा अनचिन्हारजी पुरस्कार ओ गुटबाजीसँ प्रेरित संस्था सभकेँ दरकिनार करैत बेबाक भऽ अपन खास शैलीक आलोचना लिखैत रहला ।

बर्ष २०१४-१५ लेल विदेह भाषा सम्मान(समानान्तर साहित्य अकादेमी सम्मान)सँ पोथी “अनचिन्हार आखर” (गजल संग्रह) लेल सम्मानित।