Gassa D'amante

A gassa d'amante (ò groppo d'amante à Vintimiggia) o l'é un groppo de gassa, deuviou pe-o ciù in fin de còrda. O l'é un groppo de origine antiga, assæ seguo, e façile tanto da groppâ comme da desgroppâ.

A gh'à o meito de no ëse corrente, de no scuggiâ ascì con di grendi carreghi, e de restâ de longo façile da desgroppâ, ascì quande unna còrda bagnâ a s'astrenze dòppo ch'a s'é sciugâ. Pe-i sò meiti, a l'é sovente ciammâ a regiña di groppi.

Sciben ch'a l'é segua quande a gh'à un carrego, a gassa d'amante a gh'à o difetto de poeise desgroppâ quand'a no l'é in tenscion. Pe sta raxon, l'é stæto studdiou ciù d'unna variante pe rendila ciù segua.

O primmo exempio d'un groppo pægio a-a gassa d'amante o remonta a-i tempi di antighi egiçi: int'un scavo do 1954, i archeòloghi an contou d'avei descoverto, into cordamme da barca do sô do faraon Cheope, «un groppo stranamente imbroggiou [...] pratticamente pægio à unna gassa d'amante».

A primma mensun scrita a remonta a-o 1691, into libbro The seaman's grammar and dictionary. L'autô, o capitanio John Smith, o descrive un groppo ch'o ciamma Boling knot, un nomme no despægio da quello da gassa d'amante inte l'ingreise d'ancheu: bowline.

Gassa d'amante sencia

A gassa d'amante inta sò forma de base a l'é un groppo façile da realizzâ. O metodo inlustrou chì o l'é quello didattico, deuviou ciù che tutto da-i prinçipianti. O s'arregòrda co-a frase mnemònica «o serpente o sciòrte d'inta taña, o fa un gio de l'erbo, e o ritorna inta taña».

Sta forma da gassa d'amante a se peu desgroppâ quande a còrda a no l'é in tenscion, ò con di carreghi ciclichi. A no l'é donca conseggiâ pe di usi critichi.

Gassa d'amante à doî còlli

Pe redue o reisego ch'o groppo o se imböse, a-o pòsto do còllo sencio l'é poscibile fâne doî.

L'é poscibile ascì de deuviâ un groppo parlâ in cangio di doî còlli.

Gassa d'amante in sciô doggin

Unna variaçion ciù complessa a l'é a gassa d’amante in sciô doggin. A forma doe gasse independente, che se peuan deuviâ uña pe gamba pe imbragâse à unna còrda.

Terminaçion a-a Yosemite

A gassa d'amante con terminaçion a-a Yosemite a l'é unna variaçion deuviâ sovente inte l'arpinixmo. O capo corrente, ch'o deve restâ drento a-a gassa, o va apreuvo a-o còllo do capo dormiente, e o sciòrte parallello a-o dormiente.

Sta variaçion a l'é consciderâ ciù segua perché o corrente o l'é recegou into còllo in cangio d'ëse libero, ma beseugna dâ a mente à strenze a gassa d'amante primma de strenze a terminaçion.

Arpinixmo e arrampinâ

A gassa d'amante a l'é deuviâ inte l'arpinixmo pe ciù d'unna maneuvra de còrda. Dæto a sò tendensa à desgroppâse inte còrde sensa tenscion, de sòlito l'é neçessäio azzonze un groppo de blòcco in sciâ parte corrente.

Navegaçion

Clifford Ashley, in sciâ sò enciclopedia di groppi, o scrive che a gassa d'amante a l'é un groppo coscì bon, che l'é de ræo che i mainæ deuvian di atri groppi de gassa.

A gassa d’amante sencia e e sò variaçioin son deuviæ pe ormezzâ e nave a-e bitte, pe ligâ a scòtta a-o frò, e pe tanti atri uxi. A verscion in sciô doggin, co-e sò doe gasse, a se peu deuviâ comme bäsigo.

Atri uxi

A gassa d'amante in scê sò varie verscioin a l’é deuviâ pe de ciù inte tecniche de cordâ pe-a speleologia, inte tecniche de sarvataggio di pompê e in sce l’aviaçion pe ligâ i aeroplen legi.

• Groppo de bandea

•   Wiki Commons a contêgne di files in sce Gassa d'ammante