Koblenz

Laes hie wie v'r mit de versjillende saorte Limburgs ómgaon.

Koblenz is 'n stad in Duutslandj, gelaege aan de munjing van de Mozel en de Rien. De sjtad beheurt toet 't Rienlandj-Palts. Mit 110.643 inwoners in 2013 is 't de op drie nao grótste sjtad van dees deilsjtaot, wovan 't tösse 1947 en 1950 de houfsjtad waas. De naam van de sjtad verwies nao de ligking: hae geit truuk op 't Letien: confluentes "samevleujing". De sjtad ligk veur 't grótste deil oppe linkse Rienkantj.

Op 't puntj wo de Rien en de Mozel samekóme bevindj zich 't Deutsches Eck mit e groot monument det t'r eer van keizer Wilhelm I waerde opgerich en wo saer 1993 'n replica van zie ruterstandjbild sjteit det in 1945 waerde verrinneweerd. De naam van dit monument geit truuk nao de Duutse Orde, de kruutsridderorde die saer eve op dees plaats bezittinge had. 't Deutschherrenhaus van dees orde is nag intak.

Op de rechse kantj van de Rien ligk 't fort Ehrenbreitstein, det oot nao Gibraltar de grótste rotsvesting van Europa waas. Van de väöl brögke in Koblenz dateert de aadste, de Balduinbrögk euver de Mozel, oete veerteenden eew. Van 'n brögk euver de Rien die de Romeine hie in d'n ieëste eew veur Christus hadde geboewd, zeen nag reste truukgevónje.

Koblenz haet 'ne sjtaejebandj mit Mesjtreech.