Лужиков Александр Михайлович: коми гижысь

Лужиков Александр Михайлович (1964–2006) — коми гижысь.

Александр Лужиков чужӧма 1964 вося рака тöлысь 19-ӧд лунӧ Коми АССР-ын Кулӧмдін районса Кекур грездын. Помалӧма И.А. Куратов нима 1 №-а Сыктывкарса педагогика училищеысь художествоа графика юкöн, служитӧма армияын. Помалӧма Москваын Горький нима Литература институт, уджалыштӧма Коми радиокомитетын литературно-драматическöй вещаниелöн редакторöн. 1992 восянь «Би кинь» журналса шöр редактор.

Кулӧма коркӧ 2006 вося ӧшым тӧлысьӧ. Кулан луныс абу тöдса. Шойсӧ аддзӧма Сыктывкарса керка пӧдвалысь (Пушкин улича, 68 керка). 259 №-а кулӧм йылысь гижӧд лӧсьӧдӧма 2007 вося урасьӧм тӧлысь 7 лунӧ; сэні гижӧма, мый мортыс кувсьӧма 2006 вося ӧшым тӧлысь 25 лун да 2007 вося тӧвшӧр тӧлысь 5 лунъяс костын. Кулӧм йылысь эскӧданпас сетӧма 2009 вося рака тӧлысь 11 лунӧ. Рöдвужыс тöдмалiс кувсьöм йывсьыс 2009 воын. 2007 вося урасьӧм тӧлысь 27-ӧд лунӧ гуалöма кыдзи нимтöм-рöдвужтöм морт Вылыс Човса шойна вылын 13 №-а участок вылын.

Александр Лужиковлöн медводдза кывбуръяс петӧма 1970-öд вояс помын. Сiйö ветлӧма том гижысьяслöн IX Ставсоюзса совещанньӧ вылö. Бура донъялӧмаӧсь сылысь кывбуръяссö роч поэт Егор Исаев да Коми Республикаса народнӧй гижысь Геннадий Юшков. «Йиркап» йылысь поэмаын кылö чужан лун да рöдвуж йылысь тöжд.

Гижöдъясыс петавлӧмаӧсь «Литературнöй газетын», «Литературнöй Россияын», «Север» журналын.

Бура петкöдчӧма драматургия жанрын. Гижӧма «Ыджыд висьöм» пьеса (йöзöдöма: «Арт» журнал, 1997 во, 1 №.).

Сылысь кывбуръяссö вуджöдлӧмаӧсь Елена Исаева, Александр Кувакин, Сергей Филатов.

1991 восянь пырӧ Россияса Гижысь котырö.

• Ме радейта тэнö: кывбуръяс. – Сыктывкар: Коми кн. изд-во, 1989. – 41 л.б.
• Енэжшöpса оpдым: кывбуpъяс / Ред. А.В. Тентюков; серпасалiс А.М. Лужиков. – Сыктывкар: Коми кн. изд-во, 1994. – 127 л.б.
• Лэбӧ лолӧй енэж шӧрті. За душою следом. Кывбуръяс. Стихи / Сост. А.Г. Попов, Н.А. Обрезкова. — Сыктывкар: АУ РК "Редакция газеты "Коми му", 2012 во. — 128 с.

• 2012 воын Войтыркостса Поэзия лунö нуöдöм VI-öд «Поэтическöй эстафета» вöлi сиöма Александр Лужиковлöн паметьлы.
• 2011 воын поэтлöн гöтыр Марина да нылыс Лиза шыöдчисны Коми гижысь котырö А.Лужиков нима премиа лöсьöдöм йылысь мöвпöн. Премиа сетсьö сöмын сиктса да комиöн гижысь том кывбуралысьяслы. 2011 воын премиа босьтiс том гижысь Ольга Баженова, 2012 воын — Алёна Шомысова, 2013 воын — Алёна Старцева, 2014 воын — Татьяна Шахова, 2015 воын — Любовь Ануфриева, 2016 воын — Татьяна Ануфриева (Кирпиченко).

• Ильин Б. Меддводза асшöр книга // Коми му, 1994. 8 февр.
• Мартынов В. Выль видзöдлас, выль рöм // Коми му, 1994. 5 марта.
• Мартынов В.И. Лужиков Александр Михайлович // Литературная энциклопедия земли Коми. – Сыктывкар, 2004.
• Коми республикаса Национальнöй библиотека
• Александр Лужиковöс гуалöма нимтöм гуö // Республика, 2009. Урасьöм тöлысь 27-öд лун. 31 №.
• Фин-йöгра портал