Шаблон:Серпасыс абу
Микушев Анатолий Константинович | |
Чужан лун: | 1926-ӧд вося вӧльгым тӧлысь 5-ӧд лун |
---|---|
Чужанін: | |
Кулан кад: | 1993-ӧд вося тӧвшӧр тӧлысь 11-ӧд лун (66 арӧс) |
Канму: | |
Мыйся уджыс: |
Микушев Анатолий Константинович (1926—1993) — коми фольклор да литература туялысь, филология наукаясса доктор, критик, СССР-са гижысь котырö пырысь, Коми АССР-са наукаын нимӧдана уджалысь, РСФСР-са наукаын нимӧдана уджалысь. Батьлӧн вокыс — Айму вӧсна Ыджыд тыш кадся нималана комдив Георгий Микушев.
Анатолий Микушев чужӧма 1926-ӧд вося вӧльгым тӧлысь 5-ӧд лунӧ Усть-Сысольск карын. 1934–1943-ӧд воясӧ велӧдчӧма Сыктывкарын 1-ӧд да 2-ӧд номера шӧр школаясын, 1943–1947-ӧд воясӧ — Коми канмуса педагогика институтысь филология факультетын. Пединститут помалӧм бӧрын 1947-ӧд вося моз тӧлысьсянь 1950-ӧд вося кӧч тӧлысьӧдз уджалӧма велӧдысьӧн да директорӧн Сыктывдін районса Ыб шӧр школаын.
1950-ӧд вося кӧч тӧлысьсянь 1953-ӧд вося вӧльгым тӧлысьӧдз велӧдчӧма Ленинградын Роч литература Институтса аспирантураын «фольклористика» специальносьт серти. Научнӧй веськӧдлысьнас вӧлӧма нималана эпосовед Астахова Анна Михайловна. 1953-ӧд вося вӧльгым тӧлысь 5-ӧд лунӧ дорйӧма «Песенное творчество народа коми в советскую эпоху» тема серти филология наукаясса кандидат ним вылӧ диссертация. Дорйысьӧм бӧрын уджалӧма СССР наукаяс академияысь Коми филиалын: кыв, литература да история юкӧдса младшӧй научнӧй сотрудник (1953-ӧд во, вӧльгым тӧлысь — 1957, ӧшым тӧлысь), кыв да литература юкӧдса старшӧй научнӧй сотрудник (сэсся Кыв, литература да история институтын литература да фольклор секторын) (1957, ӧшым тӧлысь — 1970, ӧшым тӧлысь). 1970-ӧд вося ода-кора тӧлысь 18-ӧд лунӧ дорйӧма «Генезис и эволюция коми песенного фольклора» тема серти филология наукаясса доктор ним вылӧ диссертация. 1970-ӧд вося ӧшым тӧлысьсянь сійӧс индӧма СССР наукаяс академияысь Коми филиаллӧн Кыв, литература да история институтын литература да фольклор секторса веськӧдлысьӧн. 1972-ӧд воын вуджӧдӧма Кыв, литература да история институтын старшӧй научнӧй сотрудник должносьтӧ (нёрпалӧм вӧсна).
1975-ӧд вося ӧшым тӧлысь 2-ӧд лунсянь 1993-ӧд вося тӧвшӧр тӧлысь 11-ӧд лунӧдз — Сыктывкарса канму университетын коми да фин-йӧгра филология кафедраӧн веськӧдлысь. 1977–1978-ӧд воясӧ — Сыктывкарса университетын филология факультетса декан.
Кулӧма 1993-ӧд вося тӧвшӧр тӧлысь 11-ӧд лунӧ Сыктывкарын аслас уджалан пызан сайын. Гуалӧма Сыктывкарын Шӧр шойнаын.
«Коми йӧзкостса сьыланкывъяс» (1966, 1968, 1971) куим тома удж вӧчӧмысь (Прометей Чисталёв да Юрий Рочевкӧд ӧтвылысь) 1972-ӧд воын сылы сетӧма В.А. Савин нима Коми АССР-са канму премия.
СССР-са гижысь котырын 1959-ӧд вося ода-кора тӧлысьсянь.
This article uses material from the Wikipedia Коми article Микушев Анатолий Константинович, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Мӧдтор кӧ абу индӧма, контентыскӧд позьӧ тӧдмасьны CC BY-SA 4.0 лицензия серти. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Коми (DUHOCTRUNGQUOC.VN) is an independent company and has no affiliation with Wiki Foundation.