Flönz

Flönz es en kölsche Woosch.

De Flönz es jet Ähnliches wie de Blodwoosch un weed och us Blod unn Würfelcher vum Sauspeck gemaht. Ävver Flönz weed gekoch un Blotwoosch geräuch. Un deswäge es Flönz wabbelig un Blodwoosch bliev och in dä Pann stiev wie en Kummelionskääz.

Fröher em nüngzehnte Johrhundert wore Flönz de billigste Wooschste, alsu alles Möögliche, nit nor Blodwoosch. Dat wor dat, wat mer för da Hungk gekauf hätt, de ärm Lügg och för sich selvs. Nohm Adam Wrede hät mer in de Metzgereie mänchmol gehoot: För zwei Grosche Flönz för der Hungk, ävver kein Fleischwoosch dobei, die iß minge Vatter nit.

Met der Zigg hät mer Flönz för de billige Blodwoosch gesaht. Un hügg weiß kaum einer, wat dä Ungerschied es zwesche Flönz und Blodwoosch.

Flönz ka' mer esse als Kölsche Kaviar oder gebrode met Himmel un Ääd. Dozu drink mer e Kölsch, normal.

Wenn ene Kölsche einer för ene Imi häld, weed dem suspekteete Imi gefrog: "Sag ens Blodwoosch!". Ene Imi versök dann, et Wood Blodwoosch lautgetreu nohzespreche, wobei hä off keine Erfolg hät, ävver der Kölsche weiß, dat de richtige Antwood Flönz es. Dat hät der Jupp Schlösser 1948 en e schön Leedche geschrevve; doher kütt och et Wood "Imi".

• Kölsche Kaviar‎
• Himmel un Äd