Lgbt Raits

Laa we afek lezbian, gie, baisexyual, ah chransjenda (LGBT) piipl vieri wuoliip bai konchri ar terichri—ebriting frah liigal rekanishan a siem-sex marid ar ada taip a paadnaship, tu di det penalti az ponishment fi siem-sex ruomantik/sexyual aktiviti ar aidentiti.

LGBT raits kansida az yuuman raits bai Amnesti Intanashinal ah sivl raits bai som. LGBT raits laa ingkluud, bot no limit tu, di falarin:

• lou man uu sex wid man fi doniet blod
• gobament rekanishan a siem-sex rilieshanship (laka vaya siem-sex marid ar simila yuunian)
• lou LGBT adapshan
• rekanishan a LGBT pierentin
• anti-buli lejislieshan ah schuudent nan-diskriminieshan laa fi protek LGBT pitni an/ar schuudent
• imigrieshan ikualiti laa
• anti-diskriminieshan laa fi implaiment ah ouzin
• iet kraim laa we provaid inans kriminal penalti fi prejudis-muotivietid voilens gens LGBT piipl
• iikual iej a kansent laa
• iikual axes tu asis riprodoktiv teknalaji
• axes tu sex riasainment soerjri ah aamuon ripliesment terapi
• liigal rekanishan ah akomodieshan a riasain jenda
• laa we riliet tu sexyual orientieshan ah milichri saabis

Az a 2021, 42 konchri, muos a dem lokiet ina di Amoerkaz ah Westan Yuurop, rekanaiz siem-sex marid ah grant muos (ef no aal) a dieda raits lis tapsaid tu iLGBT sitizndem. Konchri wid siem-sex marid rekanaiz nieshanwaid a: Aajentiina, Airilan, Aislan, Aschria, Aschrielia, Beljiom, Brazil, Chili, Denmaak, Ekuaduor, Finlan, Frans, Joermani, Kasta Riika, Kianada, Kolombia, Logzimboerg, Malta, Mexiko, di Nedalanz (exkluudn Aruuba, Kyuurasao ah Sint Maatn), Nyuu Ziilant (exkluudn Niue, Tokelau ah di Kuk Ailanz), Naawie, Puotigal, Sout Afrika, Spien, Suitsalan, Swiidn, Taiwan, di Yunaitid Kindom (exkluudn som British Uobasiiz Terichri), di Yunaitid Stiet (exkluudn som Nietiv Amoerkan chraib ah Amoerkan Samuowa) ah Yurugwai.

Anti-LGBT laa ingkluud, bot no limit tu, di falarin: sadami laa we piinalaiz kansensyual siem-sex sexyual aktiviti wid fain, jiel toerm, ar di det penalti; anti-"lezbianizim" laa; ah aya iej a kansent fi siem-sex aktiviti.

Ina 2011, di Yunaitid Nieshanz Yuuman Raits Kongsl paas ifos rezaluushan we rekanaiz LGBT raits, we eh-fala op wid wah ripuot frah di UN Yuuman Raits Komishan we dakiument vailieshan a di raits a LGBT piipl, ingkluudn iet kraim, kriminalizieshan a omosexyualiti, ah diskriminieshan. Falarin op pah di ripuot, di UN Yuuman Raits Komishan oerj aal konchri we neh du so yet fi inak laa we protek biesik LGBT raits.

Az a Mie 2016, 16 konchri ab aniikual iej a kansent laa.

As a Mie 2016, 74 konchri azwel faib sob-nashinal jurisdikshan ab laa fi kriminalaiz omosexyualiti, wid muos a dem lokiet ina Ieja ah Afrika. Ina 2006 datde nomba wena 92. Fi faib sob-nashinal jurisdikshan a: di pravins a Ache ah Sout Sumachra (Indoniija), di Kuk Ailanz (Nyuu Ziilant), Gaaza (Palistain) ah Marawi Siti (di Filipiinz).