Slowakije

Slowakije is 'n land in Min'n-Europa in de Karpaoten. Slowakije hrens an Poôl'n, Tsjehhië, Oôsteriek, Honharije en den Oekraïne. Den oôdstad is Bratislava en de staetsvurm is een rippebliek. Aore hroôte stee'n in Slowakije zien Košice en Zvolen. Slowakije ei zen eihen op 1 jannewari 1993 ofescheien van 't toenmaelihe Tsjehhoslowakije.

Slowakije is opedeêld in ach verschill'nde rehio's die an kraje worn enoemd. De naem van deze rehio is 't zelvde as den oôdstad divan. De rehio's zien as volgt:

• Hewest Banská Bystrica (Banskobystrický kraj)
• Hewest Bratislava (Bratislavský kraj)
• Hewest Košice (Košický kraj)
• Hewest Nitra (Nitriansky kraj)
• Hewest Prešov (Prešovský kraj)
• Hewest Trenčín (Trenčiansky kraj)
• Hewest Trnava (Trnavský kraj)
• Hewest Žilina (Žilinský kraj)

Den eêste Slaoven vestihen der eihen in de vuven eêuwe op Slowaoks hrondhebied en in de zeven'n eêuwe wier 't onderdeêl van 't riek van Samo. De onstaen'n protoslaovische staet Hroôt-Moraovië beriekn in de nehen'n eêuwe zen oôgtepunt en Cyrillus en Methodius introduceern in dezen tied 't chrissendom ier.

Toet de veêrtien'n eêuwe maeken Slowakije deêl uut van 't konienkriek Honharije, mè toen a 't Osmaonse Riek hroôte stikkn land op de Balkan behon te verovern, behon 't centrum van dit riek te verschuven en nam de macht of. In deze tied verschoof 't centrum ni Bratislava, 't a in 1536 den oôdstad van 't konienkriek wier.

In 1918 hoeng Slowakije saemn mie Moraovië en de Boheem'n Tsjehhoslowakije vurmen. In 1938 wier Tsjehhoslowakije in opdrach van Hitler onslootn en wier Slowakije een aparte rippebliek onder 't bestier van Nazi-Duutsland. In 1945 bie de bevriedieng deur de Russen wor Tsjehhoslowakije wee saemnevoegd. Op 1 jannewari 1993 schei Slowakije zen eihen diffinitief of van Tsjehhoslowakije en wor ok Tsjehhië evurmd.