Serbske Pazlicy: Wjes w Budyskim wokrjesu, gmejnski dźěl Njebjelčic
Serbske Pazlicy (němsce Wendischbaselitz, 1937–46 Kleinbaselitz) su wjes, kotraž ke gmejnje Njebjelčicy słuša.
Serbske Pazlicy leža kilometer wuchodnje Njebjelčic w Hornjej Łužicy a maja 272 wobydlerjow, tuž su druhi najwjetši dźěl gmejny.
| ||
| gmejna: | Njebjelčicy | |
| zagmejnowanje: | 1974 | |
| wobydlerstwo: | 272 (31. decembra 2023) | |
| wysokosć: | 190 metrow n.m.hł. | |
51.26527777777814.177222222222190 | ||
| póstowe čisło: | 01920 | |
| předwólba: | 03578 | |
 Njebjelčanska dróha w Serbskich Pazlicach | ||
wikidata: Serbske Pazlicy (Q160555) | ||
Geografija
Wjes leži něhdźe pjeć kilometrow wuchodnje Kamjenca při dróze wot Njebjelčic do Chrósćic, wotpowědowacej staremu wikowanskemu pućej Via regia. Wjesne hona maja přestrjeń wot 3,86 km² a wobsteja zwjetša z polow. Na 196 metrow wysokim kopcu z mjenom Spalena hórka při sewjerozapadnej kromje wsy namakachu palne rownišća Billendorfskeje kultury. Na samsnym městnje wudobywachu z małeje skały granodiorit.
Susodne wsy su Pěskecy w sewjeru, Smječkecy (gmejna Worklecy) a Wěteńca w juhowuchodźe a Njebjelčicy w zapadźe.
Stawizny
Prěnje historiske naspomnjenje pućowca sta so w lěće 1374/82 jako Pazelicz Slavicum („słowjanske Pazlicy“). Přimjeno słužeše rozeznawanju wot njedaloko ležacych Němskich Pazlic. Wjacore wulke wrotowe wobłuki wobknježa napohlad wsy, tak na přikład při statokomaj na Njebjelčanskej čo. 9 a čo. 30.
Hač do 19. lětstotka běchu Serbske Pazlicy mjez dwěmaj ležownostnymaj knjejstwomaj rozdźělene. Mjeztym zo słušeše połojca k wobsydstwu Worklečanskeho ryćerkubła, steješe tamna połojca pod knjejstwom klóštra Marijina hwězda. Dawki płaćeše pak cyła wjes jenož klóštrej.
Wobydlerstwo
| Podaća po cencusu 2011; staw: 9.5.2011 | Serbske Pazlicy | gmejna |
|---|---|---|
| ličba wobydlerjow | 281 | 1196 |
| ličba domjacnosćow | 89 | 411 |
| wosoby na domjacnosć | 3,2 | 2,9 |
| swójby | 87 | 366 |
| bydlenske twarjenja | 79 | 336 |
| bydlenska přestrjeń na wosobu (m²) | 35,8 | 36,6 |
| přerězna staroba w lětach | 41,3 | 41,6 |
| kwocient młodostnycha | 35 | 28 |
| kwocient starychb | 30 | 26 |
| podźěl prózdne stejacych bydlenjow | 7,2 % | 3,8 % |
| a: poměr ličby wosobow pod 18 lětami k 100 wosobam mjez 18 a 65 b: poměr ličby wosobow nad 65 lětami k 100 wosobam mjez 18 a 65 | ||
Po Mukowej statistice mějachu Serbske Pazlicy we 1880tych lětach 179 wobydlerjow, mjez nimi 174 Serbow (97 %) a jenož pjećo Němcy. Arnošt Černik zwěsći 1956 serbskorěčny podźěl gmejnskeho wobydlerstwa wot 88,6 %.
W lěće 1925 bě mjez 244 wobydlerjemi 229 katolskich (93,8 %). Katolscy wěriwi słušeja ze starodawna k Njebjelčanskej, ewangelscy wot lěta 1902 k Smječkečanskej wosadźe.
Wosobiny
- Jurij Grós (1931–2019), Domowinski funkcionar, zapósłanc w Ludowej komorje NDR
- Pawoł Šenkar (1925–1948), prěni brigadnik Serbskeje młodźiny 1947
Hlej tež
Žórła
- Westliche Oberlausitz zwischen Kamenz und Königswartha (= Werte unserer Heimat. Zwjazk 51). 1. nakład. Akademie Verlag, Berlin 1990, ISBN 3-05-000708-7, str. 132.
- Serbske Pazlicy w Digitalnym stawizniskim zapisu městnow Sakskeje (němsce)
Wotkaz
Commons: Serbske Pazlicy – Zběrka wobrazow, widejow a awdiodatajow
This article uses material from the Wikipedia Hornjoserbsce article Serbske Pazlicy, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.