Bjedrich Adolf Klin (němsce Friedrich Adolph Klien; * 23.
oktobra">23. oktobra 1792 w Barće, † 4. nowembra 1855 w Budyšinje) bě serbski rěčnik a doktor prawnistwa a wot 1847 hač do swojeje smjerće 1855 z prěnim předsydu Maćicy Serbskeje.
Wón narodźi so jako syn Bartskeho fararja a wopytowaše wot 1806 do 1813 Budyski gymnazij. Wot 1813 do 1818 studowaše w Lipsku prawnistwo. Młódšej bratraj Gustaw a Arnošt Ludwig běštaj z fararjom w Ketlicach resp. profesorom w Moskwje. Po nawróće do Łužicy bu přiwzaty do rjada hornjołužiskich rěčnikow a 1822 přestupi do słužby Budyskeje měšćanskeje rady jako pismawjedźer. Pozdźišo bu wuzwoleny za měšćanskeho radźićela a měješe jako tajki nadawkaj policajskeho direktora a inspektora nad cyrkwjemi a šulemi w měsće. Nimo toho běše zapósłanc sakskeho krajneho sejma w Drježdźanach.
Jako student wobnowješe hromadźe ze šulskim přećelom Handrijom Lubjenskim Serbske prědarske towarstwo nimale sto lět po jeho prěnim załoženju. W zastojnstwje měšćanskeho radźićela zasadźi so wuspěšnje za to, zo so w nowym šulskim zakonju lěta 1835 žada nałožowanje serbšćiny we wučbje, znajmjeńša we wobmjezowanym wobłuku. Wot 1845 wobdźěli so na prócowanjach wo załoženje Maćicy Serbskeje, za kotrejež prěnjeho předsydu bu w lěće 1847 wuzwoleny. Jako připóznaty, skerje konserwatiwny Budyski byrgar zawěsći serbskemu zjednoćenstwu tež we wobłuku rewolucije 1848/49 dowěru wyšnosće přez to, zo wustupowaše přećiwo rewolucionarnemu křidłu serbskeho narodneho hibanja a zastupjerjam słowjanskeje wzajomnosće kaž Janej Arnoštej Smolerjej.
Wot lěta 1827 běše z čłonom Hornjołužiskeje towaršnosće wědomosćow w Zhorjelcu.
Wón bu na Tuchorskim kěrchowje w Budyšinje pochowany.
This article uses material from the Wikipedia Hornjoserbsce article Bjedrich Adolf Klin, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.