Lira, Carnota: Parroquia civil do concello de Carnota

Segundo o IGE en 2011 tiña 952 habitantes (478 homes e 474 mulleres), distribuídos en 9 entidades de poboación, o que supón unha diminución en relación ao ano 1999 cando tiña 1.115 habitantes.

Lira
Hórreo de Lira.
Concello	Carnota
Provincia	A Coruña
Coordenadas	42°47′58″N 9°07′33″O / 42.799564, -9.1258949°07′33″O / 42.799564, -9.125894
Poboación	821 hab. (2017)
Entidades de poboación	9
[ editar datos en Wikidata ]

Está situada entre Lariño e Carnota. Lira posúe numerosas praias, como a praia de Mar de Lira (bandeira azul), ou as de Ximprón, A Gavota, Susiños e Ardileiro.

A actividade económica baséase no sector primario, sobre todo marisqueo e pesca, sendo moi famosos os ourizos da pedra mariña. Hai un porto pesqueiro no lugar de Portocubelo, podendo atopar no seu peirao muxos, maragotas e santiaguiños.

Nos últimos anos, dende o afundimento do petroleiro Prestige vense a desenvolver unha importante actividade arredor da protección e explotación dos recursos mariños da parroquia. Creouse a Reserva Mariña dos Miñarzos, co fin de evitar a deterioración da costa e a sobreexplotación pesqueira a que estaba sometida. As medidas tomadas foron a delimitación da zona de protección integral para mellorar a desova dos crustáceos, e a protección dos fondos rochosos e areentos, ademais dos mantos de laminarias, outras algas e esponxas para que os peixes, equinodermos, crustáceos e moluscos se desenvolvan e reproduzan na reserva.

• O castro de Mallou é unha acrópole fortificada da idade de ferro. O castro de Miñarzos está na actual vila de Lira, polo que está moi alterado.
• A Torre dos Mouros foi un recinto fortificado medieval. En xullo de 2012 levouse a cabo unha escavación arqueolóxica..
• O hórreo de Lira, construído entre 1779 e 1814, é xunto co hórreo de Carnota o máis longo de Galicia.
• A igrexa parroquial, construída en 1760 e remodelada en 1825, destaca pola súa grande torre campanario que destaca sobre o resto da estrutura.
• A capela da Nosa Señora dos Remedios foi construída en 1706.

Creouse a iniciativa Mardelira por parte da Confraría de Pescadores de Lira para dinamizar o contorno social da comunidade pescadora coa creación de talleres de pesca, o turismo mariñeiro, a pesca deportiva sostible.

• Remedios Novos: Martes de Pascua.
• Remedios Vellos: O sétimo martes posterior ao Martes de Pascua.
• Festa do Mar: 15 de agosto.

•  
  Igrexa parroquial.
•  
  Capela da Nosa Señora dos Remedios.
•  
  Piscifactoría de rodaballo.

Lugares de Lira

Parroquias de Carnota

Outros artigos

• Lugares de Carnota

Ligazóns externas

• Mardelira, proxecto educativo da Confraría de Pescadores de Lira