Boqueten

Cél articllo est ècrit en arpetan supradialèctâl / ORB lârge.

Capra ibex

Boqueten (Capra ibex) mâcllo en Vâl d’Aoûta.

Cllassement

Règno	Animalia
Fôrche	Chordata
Sot-fôrche	Vertebrata
Cllâssa	Mammalia
Sot-cllâssa	Theria
Enfra-cllâssa	Eutheria
Ôrdre	Artiodactyla
Famelye	Bovidae
Sot-famelye	Antilopinae
Tribu	Caprini
Genro	Capra

Èspèce

Capra ibex
Linnaeus, 1758

Statut de consèrvacion UECN

LC  : Petiôta prèocupacion

Lo boqueten^,, (Capra ibex) est un mamifèro de la famelye des bovidos, de l’ôrdre des artiodactilos et pués de la tribu des caprins de la sot-famelye des antilopins.

Dens les valâdes arpetanes du Piemont, diont pletout l’estambèc (dèrivâ du nom étalien : lo stambecco). La femèla du boqueten s’apèle en arpetan l’ètagne.

Sôrta de chiévra sârvâge, ègziste dedens l’arc arpenc yô qu’il at mancâ disparêtre u XIX^émo siècllo devant que bènèficiyér de programos de renfatâjos. Houé, l’èspèce est en defôr de dangiér. Les dèrriéres populacions naturâles de boquetens ègzistâvont en Étalia et en France, mas sè rencontre dês ora asse-ben en Suisse, en Alemagnes, en Ôtriche et pués en Slovènia.

N’èspèce prôche, lo boqueten ibèrico (Capra pyrenaica), ocupe la pèninsula ibèrica. Lo genro Capra est reprèsentâ per siéx ôtres èspèces presentes en Asia centrâla, u Moyen-Oriant et pués dens lo nord-èste de l’Africa, sont la chiévra du Côcaso (Capra caucasica), lo markhor (Capra falconeri), lo boqueten de Nubia (Capra nubiana), lo yanghir (Capra sibirica) et pués lo boqueten d’Abissinia (Capra walie). Des côps, la chiévra, Capra hircus, est difèrenciêe de son homologo sârvâjo, la chiévra sârvâge (Capra aegagrus ou ben C. hircus aegagrus).

Renfatâjo de l’èspèce dês l’Arpetania

Tant qu’u XIX^émo siècllo, lo boqueten ére amôrto dedens un mouél de règ·ions de les Ârpes. En Valês, lo dèrriér boqueten est tuâ en 1809, en Vâl d’Aneviérs.

Les resèrves naturâles dedens lo cârro g·eografico de l’Arpetania érant brâvament importants por la sôvegouârda de cel’èspèce en dangiér. La dèrriére colonia de boquetens vivéve dedens lo parc nacionâl du Grant-Paradis en Vâl d’Aoûta, fêt en 1856 per lo rê piemontês-sârdo Victor-Èmanuèl II coment resèrva de chace reyâla et pués vegnu lo 3 de dècembro 1922 lo premiér parc nacionâl d’Étalia^,. Dês cela colonia, de novèles colonies sè sont enstalâyes pendent lo XX^émo siècllo en Suisse et en France.

 

En Suisse, los premiérs boquetens sont renfatâs en 1906 — per un transpôrt ilègâl dês lo parc nacionâl du Grant-Paradis — dedens lo parc de vision Pierro et Pol a Sent-Gâl dens les Prèârpes suisses, qu’at portâ de colonies desus lo massis de montagnes du Säntis, en Apentsèl Rodes-de-Dedens pués Apentsèl Rodes-de-Defôr dês 1955, et en Gresons. Yona de les més grantes colonies de boquetens dedens les Ârpes ègziste enqu’houé sus la chêna de montagnes du piz Languard u levant de Pontresina en Engadina. Dês 1920, na colonia est renfatâye dedens lo parc nacionâl suisso en Engadina-Bâssa.

Dens los ans 1920, l’èspèce est renfatâye en Hiôta Comba de Bâgne, qu’est houé na resèrva naturâla en Valês.

En Savouè, lo parc nacionâl de la Vanouèsa est fêt en 1963 por la protèccion des boquetens, que sont vegnus dês la règ·ion vesena du Grant Paradis en Môrièna.

Dês los ans 1960, des boquetens vivont étot dessus lo massis du Jura, en la resèrva naturâla du Crox-du-Van sus la frontiére entre-mié los cantons de Nôchâtél et de Vôd..

Bibliografia

• (fr) Marcel A. J. Couturier, « Le bouquetin des Alpes, Capra aegagrus ibex ibex L. », Grenoblo, 1962.
• (fr) Hutter Pierre, « Chamois et Bouquetins », 1989.
• (fr) « Les 100 ans du bouquetin dans les Alpes suisses. Une réintroduction réussie », dedens Les Alpes (gazèta du Clube arpenc suisso), 2006.
• (fr) Ferdinand Fenoil, « Le Roi Chasseur et les Bouquetins de la Vallée d'Aoste », Vela, 1878.
• (fr) B. Guichardaz, « Mémoire sur les Bouquetins », Vela, 1850.
• (fr) L. Lavauden, « Le Bouquetin des Alpes. Recherches zoologiques, historiques et cynégétiques. (Etudes sur la faune alpine) », dedens Bulletin de la société Dauphinoise d’études biologiques, vol. IV, Grenoblo, 1912.
• (de) Marcel A. J. Couturier, « Der Steinbock in der Schweiz », dedens Les Alpes (gazèta du Clube arpenc suisso), 1964.

Articllos liyês

Lims de defôr

• (fr) « Le bouquetin. Capra ibex » [PDF], sus lo seto du canton du Valês.
• (fr) « Directive concernant la régulation du bouquetin » [PDF], sus lo seto du canton du Valês.
• (fr) « Le Bouquetin. 2010 : année de réintroduction du Bouquetin en Chartreuse », sus lo seto de l’Obsèrvatior de la Biodivèrsitât de Savouè.

 

Wiki Commons propôse de documents multimèdiâ sus los boquetens.

Notes

Vocabulèro

Rèferences